ಭಾಷಾ ಶಿಕ್ಷಕನ ಅಳಲು

ನನಗೆ ತಿಳಿದ ಮಟ್ಟಿಗೆ, ಖಾಸಗಿ ಶಿಕ್ಷಣ ಸಂಸ್ಥೆಗಳಲ್ಲಿ ವಿದ್ಯಾರ್ಥಿಗಳು ಕನ್ನಡವನ್ನು ದ್ವಿತೀಯ ಭಾಷೆಯಾಗಿ ತೆಗೆದುಕೊಂಡು, ಕೇವಲ ಪರೀಕ್ಷಾ ದೃಷ್ಟಿಯಿಂದ ಓದುತ್ತಾರೆ. ಇವರು ಕನ್ನಡವನ್ನು ಗಂಭೀರವಾಗಿ ಓದುವವರಲ್ಲ. ಹಾಗಾಗಿ ಕನ್ನಡ ಭಾಷಾ ಬೋಧನೆಗೆ ಪ್ರತ್ಯೇಕವಾಗಿ ಶಿಕ್ಷಕರ ಅಗತ್ಯವಿಲ್ಲವೆಂದು ಭಾವಿಸುವ ಶಿಕ್ಷಣ ಸಂಸ್ಥೆಯ ಮಾಲೀಕರು, ಇರುವ ಶಿಕ್ಷಕರಲ್ಲೇ ಯಾರೋ ಒಬ್ಬರು ಕನ್ನಡವನ್ನು ಹೇಳಿಕೊಡುವ ವ್ಯವಸ್ಥೆ ಮಾಡಿಬಿಡುತ್ತಾರೆ. ಹಾಗಾಗಿ, ಹಲವೆಡೆ ಪ್ರತ್ಯೇಕ ಕನ್ನಡ ಶಿಕ್ಷಕರ ನೇಮಕದ ಪ್ರಶ್ನೆಯೇ ಉದ್ಭವಿಸುವುದಿಲ್ಲ. ಎಲ್ಲಿಯವರೆಗೆ ಸರ್ಕಾರ ಕನ್ನಡವನ್ನು ಪ್ರಥಮ ಭಾಷೆಯಾಗಿ ಎಲ್ಲಾ ಖಾಸಗಿ ಶಿಕ್ಷಣ ಸಂಸ್ಥೆಗಳಲ್ಲಿ ಕಡ್ಡಾಯವಾಗಿ ಜಾರಿಗೆ ತರುವುದಿಲ್ಲವೋ, ಅಲ್ಲಿಯವರೆಗೆ ಕನ್ನಡದ ಬಗೆಗಿನ ಈ ಉದಾಸೀನ ಭಾವನೆಯೂ ಹೋಗುವುದಿಲ್ಲ, ಕನ್ನಡ ಭಾಷೆಯೂ ಉದ್ಧಾರವಾಗುವುದಿಲ್ಲ, ಭಾಷಾವಾರು ಪ್ರಾಂತ್ಯ ರಚನೆಯ ಉದ್ದೇಶ ಸಹ ಈಡೇರುವುದಿಲ್ಲ.