ಫೆಬ್ರುವರಿ 24ರಿಂದ ಉಕ್ರೇನ್‌ನಲ್ಲಿನ ಘಟನಾಕ್ರಮ ಗಮನಿಸುತ್ತಿರುವವರು, ಭಾರತೀಯ ವಿದ್ಯಾರ್ಥಿಗಳು ಅಲ್ಲಿಗೆ ಏಕೆ ಹೋದರು ಎಂದೂ ಪ್ರಶ್ನಿಸಿಕೊಂಡಿರಬಹುದು. ಗಮನಾರ್ಹ ಸಂಖ್ಯೆಯಲ್ಲಿ ಮೆಡಿಕಲ್ ಕಾಲೇಜುಗಳಿರುವ ಕರ್ನಾಟಕವಷ್ಟೇ ಅಲ್ಲ, ಒಡಿಶಾದಿಂದಲೂ ಉಕ್ರೇನ್‌ಗೆ ವೈದ್ಯಕೀಯ ಪದವಿ ಪಡೆಯಲು ಹೋಗುತ್ತಾರೆ. ಈ ಸಂಬಂಧದ ವಿವರಗಳನ್ನು ಪರಿಶೀಲಿಸಿದರೆ- ಅಲ್ಲಿ ಪ್ರವೇಶ ಪರೀಕ್ಷೆಯೇ ಇಲ್ಲವಂತೆ, ಜತೆಗೆ ಶಿಕ್ಷಣ ಅಗ್ಗ. ಇಲ್ಲಿ ‘ನೀಟ್’ನಲ್ಲಿ ಸಲ್ಲದವರು ಅಲ್ಲಿಗೆ ಹೋಗಿ ಅವಧಿ ದೀರ್ಘ ಆದರೂ ಇಲ್ಲಿ ತಗಲುವ ಫೀ ಮತ್ತು ವಸತಿ ವೆಚ್ಚದ ಸಣ್ಣ ಭಾಗದಲ್ಲಿ ಮೆಡಿಕಲ್ ಗ್ರ್ಯಾಜುಯೇಟ್ ಅನಿಸಿಕೊಳ್ಳಬಹುದು. ಆದರೆ ಗುಣಮಟ್ಟ? ಇಲ್ಲಿ ಪ್ರ್ಯಾಕ್ಟೀಸ್ ಮಾಡಬೇಕೆಂದರೆ ಬರೆಯಬೇಕಾಗುವ ಪರೀಕ್ಷೆಯಲ್ಲಿ ಐವರಲ್ಲಿ ಒಬ್ಬರೂ ತೇರ್ಗಡೆ ಆಗುತ್ತಿಲ್ಲವಂತೆ, ಆದವರಿಗೂ ಇಂಟರ್ನ್‌ಶಿಪ್ ಕಡ್ಡಾಯ ಮಾಡಬೇಕಾಗಿ ಬಂದಿದೆ.
