ಈ ಪ್ರಯೋಗದ ಇನ್ನೊಂದು ಮಹತ್ವದ ಅಂಶವೆಂದರೆ, ಹೆಲಿಕಾಪ್ಟರಿನ ಯಶಸ್ವಿ ಹಾರಾಟಕ್ಕೆ ಬೇಕಾದ ಬಲ ಪ್ರಮಾಣವನ್ನು ನಿರ್ಧರಿಸಲು ನಾಸಾದ ವಿಜ್ಞಾನಿಗಳು ಬಳಸಿದ್ದು ನ್ಯೂಟನ್ನ ನಿಯಮಗಳನ್ನೇ. ಅಂದರೆ, ಶತಮಾನದಿಂದ ಭೂಮಿಯ ಮೇಲೆ ವಿಮಾನಗಳನ್ನು ಹಾರಿಸಲು ವಿಜ್ಞಾನಿಗಳು ಬಳಸುತ್ತಿದ್ದ ನ್ಯೂಟನ್ನ ನಿಯಮಗಳು ಮಂಗಳದಲ್ಲೂ (ಗುರುತ್ವಶಕ್ತಿ ಮತ್ತು ವಾತಾವರಣದ ಒತ್ತಡದ ಪ್ರಮಾಣಗಳು ಮಾತ್ರ ಬೇರೆ) ಅನ್ವಯವಾಗುತ್ತವೆ ಎಂಬುದು ಈ ಪ್ರಯೋಗದಿಂದ ಸಾಬೀತಾಗಿದೆ.