ಬೆಂಗಳೂರಿನ ಕುಡಿಯುವ ನೀರಿನ ಸಮಸ್ಯೆಗೆ ಕಾರಣಗಳ ಪಟ್ಟಿ ತುಂಬಾ ದೊಡ್ಡದಿದೆ. ಆದರೆ ಇದಕ್ಕೆ, 450 ಕಿ.ಮೀ. ದೂರದಿಂದ ಪೈಪ್‌ನಲ್ಲಿ ನೀರು ತರುವುದು ಶಾಶ್ವತ ಪರಿಹಾರವಲ್ಲ. ಒಂದು ವೇಳೆ ಮೂರ್ನಾಲ್ಕು ವರ್ಷ ಮುಂಗಾರು ಕೈಕೊಟ್ಟು ಜಲಾಶಯ ಭರ್ತಿಯಾಗದಿದ್ದರೆ ಏನು ಮಾಡುವುದು? ಎಲ್ಲಿಂದ ನೀರನ್ನು ತರುವುದು? ಆದ್ದರಿಂದಲೇ ಸಮಸ್ಯೆಗೆ ಸ್ಥಳೀಯವಾಗಿ ಕಾರ್ಯನಿರ್ವಹಿಸಿ ಪರಿಹಾರ ಕಂಡುಕೊಳ್ಳಬೇಕಿದೆ. ಬೆಂಗಳೂರಿನ ಕೆರೆಗಳ ರಕ್ಷಣೆ, ಮೇಲ್ಚಾವಣಿಯ ನೀರನ್ನು ಸಂಗ್ರಹಿಸಿ ಬಳಸುವುದು, ಅಂತರ್ಜಲ ಮರುಪೂರಣ, ನದಿ ಮೂಲಗಳ ರಕ್ಷಣೆ, ನೀರಿನ ಮಿತಬಳಕೆ, ನಗರಗಳಿಗೆ ವಲಸೆ ತಡೆಯುವುದು ಇವೇ ಮುಂತಾದವು ಸ್ಥಳೀಯ ಪರಿಹಾರ ಆಗಬಲ್ಲವು. ಸರ್ಕಾರ ಮತ್ತು ನಾಗರಿಕರು ಈ ಬಗ್ಗೆ ಗಮನಹರಿಸಬೇಕು.
