ಯುವ ಹುಮ್ಮಸ್ಸೇ ಅಂತಹುದು. ಗೊತ್ತಿದ್ದೂ ಹಾಳು ಬಾವಿಗೆ ಹಾರುವ ಧಾವಂತ. ತನ್ನ ಎದುರಿಗೆ ನಿಂತ ನಾಯಕ ಹೇಳಿದ್ದೆಲ್ಲವನ್ನೂ ವೇದವಾಕ್ಯ ಎಂದು ತಿಳಿದು, ಆತನಿಗೆ ತನ್ನ ಭಕ್ತಿ, ಗೌರವ ತೋರುವ ಭರದಲ್ಲಿ, ಸರ್ಕಾರಿ ನಿಯಮಗಳು ಏನು ಹೇಳುತ್ತವೆ, ಏನು ಮಾಡಿದರೆ ತಾನು ಮಾಡುವ ಕೆಲಸಕ್ಕೆ ಮಾನ್ಯತೆ ಸಿಗುತ್ತದೆ ಎಂದೇ ಯೋಚಿಸದ ಮನಸ್ಸು. ಹೀಗಾಗಿ ತಾನು ಖರ್ಚು ಮಾಡುವ ಹಣಕ್ಕೆ ಖಾತರಿಯ ಭದ್ರತೆ ಎಷ್ಟರಮಟ್ಟಿಗೆ ಇರುತ್ತದೆ ಎಂಬುದರ ಕಡೆ ಗಮನವನ್ನೇ ಕೊಡದೆ ಮುನ್ನುಗ್ಗುತ್ತದೆ ಆ ಯುವ ಮನಸ್ಸು. ಅಂತಹ ಉದಾಹರಣೆ ನಮ್ಮ ಸಂತೋಷ ಪಾಟೀಲ. ತನ್ನೂರ ದೇವಿ ಜಾತ್ರೆಯೇ ಮುಳುವಾಗಬೇಕೆ ಆತನಿಗೆ? ಜಾತ್ರೆಯಲ್ಲಿ ತನ್ನೂರು ಸುಂದರವಾಗಿ ಕಾಣಬೇಕು, ತಾನು ಆರಾಧಿಸುವ ನಾಯಕಮಣಿಗಳು ತನ್ನೂರಿಗೆ ಆಗಮಿಸಬೇಕು, ತಾನು ನಿಸ್ಪೃಹವಾಗಿ ದುಡಿದದ್ದನ್ನ ತನ್ನ ಜನರ ಮುಂದೆ ಹೊಗಳಬೇಕು... ಇಂತಹ ಕನಸುಗಳ ಕಾರಣಕ್ಕಾಗಿಯೇ ರಸ್ತೆ ಮುಂತಾದ ಕಾಮಗಾರಿಗಳಿಗೆ ಆತ ಎದೆಯೊಡ್ಡಿ ನಿಂತ. ಸಾಲ ಮಾಡಿ ಕೋಟ್ಯಂತರ ರೂಪಾಯಿಗಳನ್ನು ತೊಡಗಿಸಿದ. ಊರು ಸುಂದರವಾಯಿತಾದರೂ ತನ್ನ ಸಂಸಾರವನ್ನು ತೀವ್ರ ಸಂಕಷ್ಟಕ್ಕೆ ಈಡುಮಾಡಿ ಜೀವ ಚೆಲ್ಲಿದ.