ಭೈರಪ್ಪನವರು ಯೋಚಿಸಬೇಕು

ಹಾಗೆ ನೋಡಿದರೆ, ಸ್ವಾತಂತ್ರ್ಯ ಹೋರಾಟವನ್ನು ನೇರವಾಗಿ ವಿರೋಧಿಸಿದವರೆಂದರೆ ಹಿಂದೂ ಮಹಾಸಭಾದವರು. ‘ಭಾರತ ಬಿಟ್ಟು ತೊಲಗಿ’ ಚಳವಳಿಗೆ ಬೆಂಬಲ ನೀಡಬಾರದೆಂದೂ ಬದಲಿಗೆ ಬ್ರಿಟಿಷ್
ಪ್ರಭುತ್ವದೊಂದಿಗೆ ಸಹಕರಿಸಬೇಕೆಂದೂ ‘ಹಿಂದೂ’ಗಳಿಗೆ ಕರೆ ಕೊಟ್ಟವರು ಅದರ ಅಧ್ಯಕ್ಷರಾಗಿದ್ದ ಸಾವರ್ಕರ್ ಅವರು. ಇದು, ಅವರು ಸೆರೆಮನೆಯಿಂದ ಬಿಡುಗಡೆಗೊಳ್ಳಲು ಬ್ರಿಟಿಷ್ ಪ್ರಭುತ್ವಕ್ಕೆ ಬರೆದುಕೊಟ್ಟಿದ್ದ ಕ್ಷಮಾಪಣಾ ಪತ್ರದ ಪಾಲನೆಯೇ ಆಗಿತ್ತು. ಇದಷ್ಟೇ ಅಲ್ಲ, ಎರಡನೇ ಮಹಾಯುದ್ಧದ ಸಂಬಂಧವಾಗಿ ಬ್ರಿಟಿಷ್ಪ್ರಭುತ್ವದೊಂದಿಗೆ ಭಿನ್ನಮತ ತಾಳಿ, ಕಾಂಗ್ರೆಸ್ ತಾನು ಅಧಿಕಾರದಲ್ಲಿದ್ದ ಎಲ್ಲ ಪ್ರಾಂತೀಯ ಸರ್ಕಾರಗಳಿಗೆ ರಾಜೀನಾಮೆ ನೀಡಿದಾಗ ಹಿಂದೂ ಮಹಾಸಭಾ ಮೂರು ಪ್ರಾಂತ್ಯಗಳಲ್ಲಿ ಮುಸ್ಲಿಂ ಲೀಗ್ ಜೊತೆ ಸೇರಿ ಬದಲಿ ಸರ್ಕಾರಗಳನ್ನು ರಚಿಸಿತಲ್ಲದೆ, ಸಿಂಧ್ ವಿಧಾನಸಭೆಯು ಸ್ವತಂತ್ರ ಪಾಕಿಸ್ತಾನಕ್ಕೆ ಆಗ್ರಹಿಸಿ ನಿರ್ಣಯ ಅನುಮೋದಿಸಿದ ನಂತರವೂ ಅದರ ಸಚಿವರು ಆ ಸರ್ಕಾರದಿಂದ ಹೊರಬರಲಿಲ್ಲ.

ಇನ್ನು ಭೈರಪ್ಪನವರು ಜೆಎನ್‍ಯು ವಿದ್ಯಾರ್ಥಿಗಳ ಪ್ರತಿಭಟನೆಯ ಬಗ್ಗೆ ಮಾತನಾಡುತ್ತಾ, ವಿದ್ಯಾರ್ಥಿಗಳು
ಪ್ರಯೋಗಾಲಯದಲ್ಲಿ ಉಪಕರಣಗಳಿಲ್ಲ, ಗ್ರಂಥಾಲಯದಲ್ಲಿ ಪುಸ್ತಕಗಳಿಲ್ಲ ಎಂದು ಪ್ರತಿಭಟಿಸಬೇಕೇ ಹೊರತು ರಾಜಕೀಯ ವಿಷಯಗಳತ್ತ ಗಮನ ಹರಿಸಬಾರದೆಂಬ ಅರ್ಥದ ಮಾತುಗಳನ್ನಾಡಿದ್ದಾರೆ. ಜೆಎನ್‍ಯು ವಿದ್ಯಾರ್ಥಿಗಳು ಪ್ರತಿಭಟಿಸುತ್ತಿರುವುದು ವಿವಿಧ ಶುಲ್ಕಗಳ ಏರಿಕೆಗೆ ಸಂಬಂಧಿಸಿದಂತಹ ಶೈಕ್ಷಣಿಕ ವಿಷಯಗಳ ಬಗ್ಗೆಯೇ ಎಂದು ತಿಳಿಸುತ್ತಾ, ಲೇಖಕರಾದ ಭೈರಪ್ಪನವರು ಬರೆಯಲು ಹಾಳೆಯಿಲ್ಲ, ಲೇಖನಿಗಳು ದೊರಕುತ್ತಿಲ್ಲ ಎಂದು ದೂರಬಹುದೇ ಹೊರತು ರಾಜಕಾರಣದ ಬಗ್ಗೆ ಮಾತಾಡಬಾರದು ಎಂದು ಯಾರಾದರೂ ಹೇಳಿದರೆ ಹೇಗೆ? ಅವರು ಯೋಚಿಸಬೇಕು.

ಡಿ.ಎಸ್.ನಾಗಭೂಷಣ,ಶಿವಮೊಗ್ಗ