ನೈತಿಕವಾಗಿ ಸಮರ್ಥನೀಯವಲ್ಲದ ನಡೆ

ಮಂತ್ರಿಯಾಗಿ ತಾವು ಗಣ್ಯಾತಿಗಣ್ಯರು ಎಂದು ಭಾವಿಸಿರುವ ಬಿ.ಸಿ.ಪಾಟೀಲ ಅವರು, ಸರ್ಕಾರಿ ವೈದ್ಯಕೀಯ ಸಿಬ್ಬಂದಿಯನ್ನೇ ತಮ್ಮ ಮನೆಗೆ ಕರೆಸಿಕೊಂಡು ಕೋವಿಡ್ ಲಸಿಕೆ ಹಾಕಿಸಿಕೊಂಡಿದ್ದಾರೆ. ಲಸಿಕೆಯನ್ನು ಹಾಕಿಸಿಕೊಳ್ಳಲು ಅಪೇಕ್ಷಿಸುವವರು ಮೊದಲು ಕ್ರಮಪ್ರಕಾರ ತಮ್ಮ ಹೆಸರನ್ನು ನೋಂದಾಯಿಸಿಕೊಳ್ಳಬೇಕು, ನಂತರ ಗೊತ್ತುಮಾಡಿದ ಸ್ಥಳಕ್ಕೆ ಹೋಗಿಯೇ ಚುಚ್ಚುಮದ್ದು ಹಾಕಿಸಿಕೊಳ್ಳಬೇಕು ಎಂಬುದು ಮಾರ್ಗಸೂಚಿಯಲ್ಲಿನ ನಿರ್ದೇಶನ. ಆದರೆ ನಮ್ಮ ಮಂತ್ರಿಮಹಾಶಯರು ಈ ಕ್ರಮವನ್ನು ಅನುಸರಿಸದೆ, ಮಾರ್ಗಸೂಚಿ ಬಗ್ಗೆ ತಮಗೆ ತಿಳಿದಿರಲಿಲ್ಲ ಎಂದು ಸಮಜಾಯಿಷಿ ನೀಡಿದ್ದಾರೆ. ಕೋವಿಡ್ ಪಿಡುಗಿನ ಅವಾಂತರ, ಲಸಿಕೆ ಸಿದ್ಧವಾಗಿದ್ದು, ಮೊದಲ ಹಂತದ ಲಸಿಕೆ ನೀಡುವಿಕೆ, ಎರಡನೇ ಹಂತದ ಲಸಿಕೆ ನೀಡಿಕೆ ಪ್ರಾರಂಭ, ಅಲ್ಲಿ ಅನುಸರಿಸಬೇಕಾದ ಕ್ರಮ ಎಲ್ಲವೂ ಸಾಮಾನ್ಯರಿಗೂ ತಿಳಿದಿರುವಾಗ ಸಚಿವರಿಗೆ ಮಾತ್ರ ಈ ಯಾವುದೂ ತಿಳಿಯದು! ಎಂಥಾ ಮುಗ್ಧತೆ. ಇಲ್ಲಿ ಗಮನಿಸಬೇಕಾದ ಇನ್ನೊಂದು ವಿಷಯವೆಂದರೆ, ಸರ್ಕಾರಿ ಸೇವೆಯಲ್ಲಿರುವ ವೈದ್ಯರು ತಮಗೆ ಕರೆ ಬಂದಾಗ, ಮಾರ್ಗಸೂಚಿ ಇರುವುದನ್ನು ಸಚಿವರ ಗಮನಕ್ಕೆ ತರದೆ, ಅದನ್ನು ಕಡೆಗಣಿಸಿ ಅವರ ನಿವಾಸಕ್ಕೆ ಹೋಗಿದ್ದು ತಪ್ಪು. ಮೇಲಧಿಕಾರಿಗಳು ಇದನ್ನು ಗಂಭೀರವಾಗಿ ಪರಿಗಣಿಸಿ ಅವರ ವಿರುದ್ಧ ಶಿಸ್ತುಕ್ರಮಕ್ಕೆ ಮುಂದಾಗಬೇಕು.

ನೈತಿಕತೆಯ ನೆಲೆಯಲ್ಲಿ ಈ ಇಬ್ಬರು ಮುಖಂಡರ ಧೋರಣೆ ಸರ್ವಥಾ ಮಾನ್ಯವಲ್ಲ. ಉತ್ತರದಾಯಿತ್ವದ ಸ್ಥಾನದಲ್ಲಿರುವವರು ನೈತಿಕತೆಗೆ ಹೊರತಾಗಿ ನಡೆದುಕೊಳ್ಳುವುದರಿಂದ ತಮಗೂ ತಾವು ಪ್ರತಿನಿಧಿಸುವ ಸರ್ಕಾರಕ್ಕೂ ಶೋಭೆ ತರುವುದಿಲ್ಲ ಎನ್ನುವುದನ್ನು ಅರಿಯದಷ್ಟು ಮುಗ್ಧರಾಗಿರಬಲ್ಲರೆಂದು ಊಹಿಸುವುದೂ ಸಾಧ್ಯವಿಲ್ಲ!

- ಸಾಮಗ ದತ್ತಾತ್ರಿ, ಬೆಂಗಳೂರು