ಕೇಂದ್ರದ ಜಿಎಸ್ಟಿ , ಸುಪ್ರೀಂ ಕೋರ್ಟ್ ನಿರ್ಣಯದ ಅನ್ವಯಹೊಸ ಕಾರುಗಳಿಗೆ ಮೂರು ವರ್ಷ ಮತ್ತು ದ್ವಿಚಕ್ರ ವಾಹನಗಳಿಗೆ ಐದು ವರ್ಷ ಕಡ್ಡಾಯ ಥರ್ಡ್ ಪಾರ್ಟಿ ವಿಮೆ ಮಾಡಿಸುವ ನಿಯಮ, ರಸ್ತೆ ತೆರಿಗೆಯನ್ನುರಾಜ್ಯ ಸರ್ಕಾರಗಳು ಹೆಚ್ಚಿಸಿರುವುದು, ಹೊಸ ಸುರಕ್ಷಾ ನಿಯಮಗಳು, ಮುಂದಿನ ವರ್ಷದಿಂದ ಜಾರಿಗೆ ಬರಲಿರುವ ಬಿಎಸ್6 ನಿಯಮ... ಹೀಗೆ ಒಂದಾದ ಮೇಲೊಂದರಂತೆ ಜಾರಿಗೆ ಬಂದಿರುವ ಕ್ರಮಗಳು ಆಟೊಮೊಬೈಲ್ ಕ್ಷೇತ್ರವನ್ನು ಹಿಂಡುತ್ತಿವೆ. ಗಮನಿಸಬೇಕಾದ ಅಂಶವೆಂದರೆ, ಈ ಎಲ್ಲಾ ನಿಯಮಗಳು ಒಂದೇ ವರ್ಷದಲ್ಲಿ ಜಾರಿಯಾಗಿದ್ದು, ಕ್ಷೇತ್ರವನ್ನು ಸ್ಥಿರವಾಗಿಸಲು ಅವಕಾಶವನ್ನೇ ಕೊಡುತ್ತಿಲ್ಲ. ಜಿಡಿಪಿಗೆ ಶೇ 11.5ರಷ್ಟು ಕೊಡುಗೆ ನೀಡುವ ಆಟೊಮೊಬೈಲ್ ಕ್ಷೇತ್ರವನ್ನು ಕಡೆಗಣಿಸದೆ, ಅದರ ಪುನರುಜ್ಜೀವನಕ್ಕೆ ಪೂರಕವಾದ ನೀತಿಗಳನ್ನು ತುರ್ತಾಗಿಜಾರಿಗೊಳಿಸಬೇಕಿದೆ.