ಹೋರಾಟ ನೆನಪಾಗಲಿಲ್ಲವೇಕೆ?

ಕೇಂದ್ರದಲ್ಲಿ ಅಧಿಕಾರ ಕಳೆದುಕೊಂಡಾಗಿನಿಂದ ಕಾಂಗ್ರೆಸ್ ಪಕ್ಷದ ನಾಯಕತ್ವ ‘ಕೋಮಾ’ಕ್ಕೆ ಜಾರಿದೆ. ರಾಜ್ಯದಲ್ಲಿ ಅಧಿಕಾರ ವಂಚಿತರಾದಾಗಿನಿಂದ ರಾಜ್ಯದ ನಾಯಕರು ಬೆಲೆ ಏರಿಕೆ ಬಗ್ಗೆ, ಕೊರೊನಾ ನಿಯಂತ್ರಣ ಕ್ರಮಗಳ ಬಗ್ಗೆ ಜನರ ನಿರೀಕ್ಷೆಗೆ ತಕ್ಕಷ್ಟು ಹೋರಾಡುತ್ತಿಲ್ಲ. ಬದಲಿಗೆ, ‘ಹೊಣೆಗೇಡಿ’ ಆಡಳಿತಕ್ಕೆ ಪತ್ರಿಕಾ ಹೇಳಿಕೆಗಳಿಂದ ಛೀಮಾರಿ ಹಾಕುವುದಕ್ಕೆ ಸೀಮಿತರಾಗಿದ್ದಾರೆ. ಹಿಂದೆ ಬಿಜೆಪಿ ನಿರಂತರವಾಗಿ ಕೂಗು ಹಾಕುತ್ತಿದ್ದುದು, ಹೋರಾಟ ಮಾಡುತ್ತಿದ್ದುದಾದರೂ ಕಾಂಗ್ರೆಸ್ಸಿಗೆ ನೆನಪಾಗಲಿಲ್ಲವೇ?

ಪಶ್ಚಿಮ ಬಂಗಾಳದಲ್ಲಿ ಬಿಜೆಪಿಯ ಬೆನ್ನು ಮೂಳೆ ಮುರಿದರೂ ಇನ್ನೂ ಮಮತಾ ಬ್ಯಾನರ್ಜಿ ಅವರಿಗೆ ಅದು ‘ತಲೆನೋವು’ ಆಗಿರುವುದು, ಬಿಹಾರದಲ್ಲಿ ಯುವನಾಯಕ ತೇಜಸ್ವಿ ಯಾದವ್, ಕಮ್ಯುನಿಸ್ಟ್ ಪಕ್ಷದ ಯುವ ಮುಂದಾಳು ಕನ್ಹಯ್ಯ ಕುಮಾರ್ ಅವರ ಗರ್ಜನೆಗಳೂ ಕಾಂಗ್ರೆಸ್ಸಿಗರ ಗಮನಕ್ಕೆ ಬರಲಿಲ್ಲವೇ? ಅಧಿಕಾರದಲ್ಲಿದ್ದಾಗಲೇ ಜನರ ವಿಶ್ವಾಸ ಕಳೆದುಕೊಂಡಿದ್ದ ಕಾಂಗ್ರೆಸ್, ಆಗೊಮ್ಮೆ ಈಗೊಮ್ಮೆ ನೀಡುವ ಪತ್ರಿಕಾ ಹೇಳಿಕೆಗಳು, ಟ್ವಿಟರ್‌ನಲ್ಲಿನ ಬಾಲಿಶ ಟೀಕೆಗಳು ಜನರ ವಿಶ್ವಾಸ ಗಳಿಸಬಲ್ಲವೇ?

- ಪಿ.ಸಿ.ಕೇಶವ,ಬೆಂಗಳೂರು