ಈಗಿನ ‘ನಿಗದಿತ ಸಮಯ ನಿರ್ವಹಣಾ ವ್ಯವಸ್ಥೆ’ ಇರುವ ಸಿಗ್ನಲ್‌ನಿಂದ, ವಾಹನ ದಟ್ಟಣೆ ಇಲ್ಲದಿದ್ದರೂ ಜನ ಹೆಚ್ಚಿನ ಸಮಯವನ್ನು ಸಿಗ್ನಲ್‌ನಲ್ಲಿ ಕಳೆಯಬೇಕಾಗಿರುವುದು ಇದರ ವೈಫಲ್ಯ. ಅಹಮದಾಬಾದ್ ಅಂತಹ ನಗರಗಳು ಸ್ವಲ್ಪ ಮುಂದುವರಿದು, ಇ-ಮೆಮೊ ವ್ಯವಸ್ಥೆ ಅಳವಡಿಸಿಕೊಂಡಿವೆ. ಈ ಮೂಲಕ 250ಕ್ಕೂ ಹೆಚ್ಚು ಕ್ಯಾಮೆರಾಗಳನ್ನು ಅಳವಡಿಸಲಾಗಿದ್ದು, ನಿಯಮ ಉಲ್ಲಂಘಿಸಿದವರಿಗೆ ತಕ್ಷಣವೇ ಮೆಮೊ ಜಾರಿ ಮಾಡಲಾಗುತ್ತದೆ. ಇಲ್ಲಿ ಎಲ್ಲವೂ ಸ್ವಯಂಚಾಲಿತ. ಇಂತಹ ವ್ಯವಸ್ಥೆಯನ್ನು ಕರ್ನಾಟಕವೂ ಅಳವಡಿಸಿಕೊಂಡರೆ ನಮ್ಮ ಪೊಲೀಸರು ರಸ್ತೆಯಲ್ಲಿ ನಿಂತು ಪರದಾಡುವ ಸ್ಥಿತಿ ತಪ್ಪುತ್ತದೆ ಮತ್ತು ಅವರ ಕಾರ್ಯಕ್ಷಮತೆಯೂ ಹೆಚ್ಚುತ್ತದೆ. ಮ್ಯಾಗ್ನೆಟಿಕ್ ಸೆನ್ಸರ್ ಮತ್ತು ಮೈಕ್ರೊ ಕಂಟ್ರೋಲರ್ ಬಳಕೆಯ ಮೂಲಕ ಕಡಿಮೆ ವಿದ್ಯುತ್ ಬಳಸಿ ಹೆಚ್ಚು ಸಮರ್ಥವಾಗಿ ಕಾರ್ಯನಿರ್ವಹಿಸಬಲ್ಲ ವಿಧಾನಗಳನ್ನು ಅಳವಡಿಸಿಕೊಂಡು, ಸಂಚಾರ ವ್ಯವಸ್ಥೆಯಲ್ಲಿ ಸುಧಾರಣೆ ತರಬೇಕಿದೆ.
