ಕಳೆದುಕೊಳ್ಳುವುದೇ ಹೆಚ್ಚು

7

ಕಳೆದುಕೊಳ್ಳುವುದೇ ಹೆಚ್ಚು

Published:
Updated:

‘ಪ್ರಸಕ್ತ ರಾಜಕಾರಣದ ಮೂರು ಮಾದರಿಗಳು' ಲೇಖನಕ್ಕೆ (ಪ್ರ.ವಾ., ಅ. 10) ಪ್ರತಿಕ್ರಿಯೆಯಾಗಿ ಈ ಪತ್ರ. ‘ಕಾಂಗ್ರೆಸ್‌ ರಾಜಕಾರಣದ ನಮೂನೆಯನ್ನು ಸೆಕ್ಯುಲರ್ ಎಂದು ಕರೆಯಲು ಸಾಧ್ಯವಿಲ್ಲ, ವೋಟ್ ಬ್ಯಾಂಕ್ ರಾಜಕಾರಣದ ಲೆಕ್ಕಾಚಾರಗಳಲ್ಲಿ ಕಾಂಗ್ರೆಸ್ ತನ್ನ ಎಲ್ಲ ಪ್ರಜಾತಾಂತ್ರಿಕ ಹಾಗೂ ಸೆಕ್ಯುಲರ್ ಹಿನ್ನೆಲೆಗಳನ್ನು ನಿರ್ಲಕ್ಷಿಸಿ ಇತರ ರಾಜಕೀಯ ಪಕ್ಷಗಳಂತೆ ಎಲ್ಲ ಬಗೆಯ ಕೋಮುವಾದಗಳಿಗೂ ಸಮಾನ ಗೌರವವನ್ನು ಸೂಚಿಸುತ್ತ ಬಂದಿದೆ...’ ಎಂದಿದ್ದಾರೆ. ಎಲ್ಲ ಸರಿ. ಆದರೆ ಹೀಗೆ ಆದುದು ಏಕೆ? ಇದರಲ್ಲಿ ಜನರ ಪಾಲು ಎಷ್ಟು ಮತ್ತು ಇಡೀ ಭಾರತದ ರಾಜಕಾರಣವನ್ನು ಮತೀಯ ರಾಜಕಾರಣವನ್ನಾಗಿಸಿದ ಬಿಜೆಪಿಯ ಪಾಲು ಎಷ್ಟು?

ಕಳೆದ ಶತಮಾನದ ಕೊನೆಯ ದಶಕದ ನಂತರ ದೇಶದಲ್ಲಿ ಆದ ರಾಜಕೀಯ ಪಲ್ಲಟಗಳ ಬಳಿಕವೂ ಕಾಂಗ್ರೆಸ್ ಬಹುಮಟ್ಟಿಗೆ ತನ್ನ ಸೆಕ್ಯುಲರ್ ಸ್ವರೂಪವನ್ನು ಉಳಿಸಿಕೊಂಡು ಹೋಗಿತ್ತು. ಸಂವಿಧಾನದ ಆಶಯ ಗೌರವಿಸುತ್ತ, ಅಲ್ಪಸಂಖ್ಯಾತರ ಹಿತಾಸಕ್ತಿ ರಕ್ಷಿಸುವ ಕೆಲಸವನ್ನೂ ಮಾಡಿತ್ತು. ಆದರೆ ಆಗಲೂ ಜನರಿಗೆ ಬಿಜೆಪಿಯ ಮತೀಯ ರಾಜಕಾರಣವೇ ಇಷ್ಟವಾದುದು ಏಕೆ? ಕಮ್ಯುನಿಸ್ಟ್ ಪಕ್ಷ ಸೈದ್ಧಾಂತಿಕವಾಗಿ ಈಗಲೂ ಆದರ್ಶಯುತವಾದ, ಬದ್ಧತೆಯುಳ್ಳ, ಜನಪರವಾದ ಪಕ್ಷ. ಅದು ಬರೀ ಅಧಿಕಾರಕ್ಕಾಗಿ ತನ್ನ ಸಿದ್ಧಾಂತದೊಂದಿಗೆ ರಾಜಿ ಮಾಡಿಕೊಂಡದ್ದು ಕಡಿಮೆ. ಮೊನ್ನೆ ಮೊನ್ನೆಯಷ್ಟೇ ರಾಜ್ಯದಲ್ಲಿ ಕಮ್ಯುನಿಸ್ಟ್ ಪಕ್ಷದಿಂದ ಕೆಲವರು ಸ್ಪರ್ಧಿಸಿದರು. ಸದಾ ಒಂದಿಲ್ಲೊಂದು ಜನಪರ ಹೋರಾಟಗಳಲ್ಲಿ ತೊಡಗಿಕೊಂಡಿರುವ ಅವರು ಜನಪ್ರತಿನಿಧಿಯಾಗಲು ಸರ್ವ ರೀತಿಯಲ್ಲೂ ಯೋಗ್ಯರು. ಅವರನ್ನು ಜನರು ಹಟ ಹಿಡಿದಂತೆ ಸೋಲಿಸಿದರಲ್ಲ ಯಾಕೆ? ಪ್ರತೀ ಚುನಾವಣೆಯಲ್ಲಿ ಪಕ್ಷೇತರರಾಗಿ ಯೋಗ್ಯರಾದ ಅನೇಕ ಅಭ್ಯರ್ಥಿಗಳು ಚುನಾವಣೆಗೆ ಸ್ಪರ್ಧಿಸುತ್ತಿರುತ್ತಾರೆ. ಅವರನ್ನೆಲ್ಲ ಜನ ಯಾಕೆ ಸೋಲಿಸುತ್ತಾರೆ?

ಜನರು ಯೋಗ್ಯ ಜನಪ್ರತಿನಿಧಿಗಳನ್ನು ಆರಿಸುವಲ್ಲಿ ತಮ್ಮ ಜವಾಬ್ದಾರಿಯನ್ನು ಮರೆತು ಬರೀ ಜಾತಿ, ಮತ ಮತ್ತು ರಾಜಕೀಯ ಪಕ್ಷಗಳಿಗೇ ಆದ್ಯತೆ ನೀಡುವ ರೀತಿಯಲ್ಲಿ ಅವರ ವಿವೇಚನಾಶಕ್ತಿಯೇ ಭ್ರಷ್ಟಗೊಂಡಾಗ ಸಹಜವಾಗಿಯೇ ರಾಜಕೀಯ ಪಕ್ಷಗಳೂ ಅಡ್ಡದಾರಿ ಹಿಡಿಯುತ್ತವೆ. ಇದೊಂದು ತರಹ ಬೀಜ–ವೃಕ್ಷ ನ್ಯಾಯದಂತೆ. ಇಷ್ಟಕ್ಕೂ ರಾಜಕೀಯ ಪಕ್ಷಗಳ ಉದ್ದೇಶ ಅಧಿಕಾರಕ್ಕೆ ಏರುವುದೇ ಅಲ್ಲವೇ?

ರಾಜಕೀಯವನ್ನು ಮತೀಯ ನೆಲೆಯಲ್ಲಿ ಹೊಲಸುಗೊಳಿಸಿ ಬಿಜೆಪಿ ನಿಗದಿಪಡಿಸಿದ ಅಜೆಂಡಾಕ್ಕೆ ಇತರ ಪಕ್ಷಗಳು ಪ್ರತಿಕ್ರಿಯಿಸುವಂತಹ ಪರಿಸ್ಥಿತಿ ನಿರ್ಮಾಣವಾದುದರ ಬಗ್ಗೆ ಹೇಳದಿರುವುದೇ ಒಳಿತು. ಇವತ್ತು ಬಿಜೆಪಿ ಉಗ್ರ ಹಿಂದುತ್ವವನ್ನು ಪ್ರತಿಪಾದಿಸುತ್ತಾ, ಹಿಂದೂಗಳು ಅಪಾಯದಲ್ಲಿದ್ದಾರೆ ಎಂದು ಬೆದರಿಸುತ್ತ, ರಾಮಮಂದಿರ ಮಂತ್ರ ಜಪಿಸುತ್ತ ಹಿಂದೂಗಳ ವೋಟುಗಳನ್ನು ಬಾಚಿಕೊಳ್ಳುತ್ತಿದೆ (ಬಿಜೆಪಿ ನಿಗದಿಪಡಿಸಿದ ಅಜೆಂಡಾಕ್ಕೆ ವಿರುದ್ಧವಾಗಿ ನಿಂತರೆ ಹಿಂದೂ ವಿರೋಧಿ ಎಂಬ ಪಟ್ಟ ಸಿಗುವ ಭಯ ಇತರ ಪಕ್ಷಗಳದ್ದು). ಸದ್ಯದ ರಾಜಕಾರಣದಲ್ಲಿ ಇಂತಹ ಆಟದ ನಿಯಮವನ್ನು ಬಿಜೆಪಿಯೇ ರೂಪಿಸಿರುವುದರಿಂದ ಈಗ ಕಾಂಗ್ರೆಸ್‌ಗೂ ಅದೇ ನಿಯಮದೊಳಗಡೆ ಆಟ ಆಡದೆ ವಿಧಿಯಿಲ್ಲವಾಗಿದೆ. ತಾನು ಹಿಂದೂ ವಿರೋಧಿಯಲ್ಲ ಎಂದು ನಿರೂಪಿಸುವ ಮೂಲಕವಾದರೂ ಅದು ಒಂದಷ್ಟು ಹಿಂದೂ ವೋಟುಗಳನ್ನು ಪಡೆದುಕೊಳ್ಳಲು ಯತ್ನಿಸಬೇಕಾಗಿದೆ.

ಅದನ್ನೇ ಅದು ಮಾಡುತ್ತಿದೆ. ಆದರೆ ಕಾಂಗ್ರೆಸ್‌ಗೆ ಗೊತ್ತಿಲ್ಲದ ಒಂದು ವಿಷಯವೆಂದರೆ- ಕಾಂಗ್ರೆಸ್ ಕೂಡಾ ಇಂತಹ ಮತೀಯ ರಾಜಕಾರಣದಲ್ಲಿ ತೊಡಗಿಕೊಳ್ಳುವುದರಿಂದ ಅದಕ್ಕೆ ಹೆಚ್ಚೇನೂ ಲಾಭವಾಗುವುದಿಲ್ಲ. ಯಾಕೆಂದರೆ ಹಿಂದುತ್ವದಲ್ಲಿ ‘ಉಗ್ರ ಹಿಂದುತ್ವ’ ಮತ್ತು ‘ಮೃದು ಹಿಂದುತ್ವ’ ಎಂದು ಎರಡು ವರ್ಗ ಇಲ್ಲ. ಇರುವುದು 'ಹಿಂದುತ್ವ' ಅಥವಾ ‘ಉಗ್ರ ಹಿಂದುತ್ವ’ ಒಂದೇ. ಹಿಂದುತ್ವದ ಒಲವುಳ್ಳ ಜನ ವೋಟು ಹಾಕುವಾಗ ಉಗ್ರ ಹಿಂದುತ್ವದ ಪರ ವೋಟು ಹಾಕುತ್ತಾರೆಯೇ ವಿನಾ ಇತರ ಹಿಂದುತ್ವದ ಪರವಲ್ಲ. ಹೀಗೆ ಹಿಂದುತ್ವದ ಹಿಂದೆ ಬಿದ್ದಷ್ಟೂ ಕಾಂಗ್ರೆಸ್ ಕಳೆದುಕೊಳ್ಳುವುದೇ ಹೆಚ್ಚು.

ಶ್ರೀನಿವಾಸ ಕಾರ್ಕಳ, ಮಂಗಳೂರು

 

ಬರಹ ಇಷ್ಟವಾಯಿತೆ?

  • 6

    Happy
  • 3

    Amused
  • 0

    Sad
  • 0

    Frustrated
  • 4

    Angry

Comments:

0 comments

Write the first review for this !