ಕವಿಗಳಿಗೆ ಸಂದಿಗ್ಧ ಸ್ಥಿತಿ

ರಘುನಾಥ ಚ.ಹ. ಅವರ ‘ಕಾವ್ಯ-ಕಲೆ: ಇದು ಪರ್ಯಾಯ ಪರ್ವ’ ಲೇಖನವು ಇಂದಿನ ಕವಿಗಳಿಗೆ ಭಯ ಹುಟ್ಟಿಸು ವಂತಿದೆ. ಪಂಪ, ಕುಮಾರವ್ಯಾಸರಂತೆ ಒಂದೆರಡು ಮಹಾಕಾವ್ಯಗಳನ್ನು ರಚಿಸಿ ಸಾರ್ವಕಾಲಿಕ ಶ್ರೇಷ್ಠ ಕವಿಗಳೆಂದು ಹೆಸರು ಮಾಡಿದ ಕಾಲವಿತ್ತು. ಕುವೆಂಪು, ಕೆಎಸ್‌ನ ಅವರಂತೆ ಜೀವನವಿಡೀ ಕಾವ್ಯವನ್ನೇ ಉಸಿರಾಗಿಸಿಕೊಂಡು ಮಹಾಕವಿಗಳಂತೆ ಜೀವಿಸಿದ ಉದಾಹರಣೆಗಳಿವೆ. ಕವಿಯೆಂದು ಹೇಳಿಕೊಳ್ಳಲು, ಕರೆಸಿಕೊಳ್ಳಲು ಹೆಮ್ಮೆಪಡುತ್ತಿದ್ದ ಕಾಲವದು. ಮುಂದೆ ಕಾಲ ಸರಿದಂತೆ ಕವಿಗಳು ಸಂಕೋಚಪಡುವ ಸ್ಥಿತಿ ಎದುರಾಯಿತು. ಕವಿಯೆಂದು ಹೇಳಿಕೊಂಡರೆ ಇವನು ಅರೆಹೊಟ್ಟೆಯ ಗಿರಾಕಿ ಎಂದು ಇತರರು, ಅದರಲ್ಲೂ ಕನ್ಯಾಪಿತೃಗಳು ಭಾವಿಸುತ್ತಾರೆ ಎಂಬ ಸಂಕೋಚದ ಸ್ಥಿತಿ! ಆದರೆ ಈಗಿನ ಸ್ಥಿತಿಯಲ್ಲಿ ಕವಿ ಎನಿಸಿಕೊಳ್ಳಲು ಭಯಭೀತರಾಗುವ ಪರಿಸ್ಥಿತಿ ಉಂಟಾಗಿ ಸಂದಿಗ್ಧ ಎದುರಾಗಿದೆ.