ಬೆಂಗಳೂರಿನಲ್ಲಿ ಮತದಾನದ ಪ್ರಮಾಣ ಕಡಿಮೆಯಾಗಿರುವುದರ ಬಗೆಗಿನ ಸದ್ಯದ ಅಭಿಪ್ರಾಯಗಳು ಅರ್ಧಸತ್ಯವನ್ನಷ್ಟೇ ಹೇಳುತ್ತಿವೆ.
ಮತದಾರರ ಪಟ್ಟಿಗಳೇ ದೋಷಪೂರಿತವಿದ್ದು ಆಮೂಲಾಗ್ರ ಪರಿಷ್ಕರಣೆಗೆ ಒಳಗಾಗುವುದು ಅಗತ್ಯ. ನಗರದ ಹತ್ತಾರು ಪಟ್ಟಿಗಳಲ್ಲಿ ಹೆಸರು ಹೊಂದಿರುವ ಮತದಾರ ಖಂಡಿತವಾಗಿ ಹತ್ತಿರದ ಯಾವುದಾದರೂ ಒಂದು ಮತಗಟ್ಟೆಯಲ್ಲಿ ಮತ ಚಲಾಯಿಸುತ್ತಾನೆ.
ಮತದಾರರ ಹೆಸರುಗಳನ್ನು ಪಟ್ಟಿಗೆ ಸೇರಿಸುವ ಹಾಗೂ ಕೈಬಿಡುವ ಕೆಲಸ ಸರಿಯಾಗಿ ಆಗುತ್ತಿಲ್ಲ. ವಲಸಿಗರು ನಗರದಲ್ಲಿದ್ದಷ್ಟು ಕಾಲ ಸೌಲಭ್ಯಗಳಿಗಾಗಿ ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರಿರುವಂತೆ ನೋಡಿಕೊಳ್ಳುತ್ತಾರೆ.
ಬಳಿಕ ಸ್ವಂತ ಊರಿಗೋ ವಿದೇಶಕ್ಕೋ ಶಾಶ್ವತವಾಗಿ ಹೋದರೂ ಅವರ ಹೆಸರು ಮಾತ್ರ ಮತದಾರರ ಪಟ್ಟಿಯಿಂದ ಮರೆಯಾಗುವುದಿಲ್ಲ. ಇಂಥವರು ಸಾಕಷ್ಟಿದ್ದಾರೆ. ಇಂತಹವರನ್ನು ಪಟ್ಟಿಯಿಂದ ಕೈಬಿಟ್ಟರೆ, ಈಗಿನ ಮತದಾನದ ಅಂಕಿಅಂಶಗಳು ಬದಲಾಗುವುದಂತೂ ಸತ್ಯ.