ನೋಂದಣಿ ಮತ್ತು ಮುದ್ರಾಂಕ ಇಲಾಖೆಯ ಪ್ರಥಮ ದರ್ಜೆ ಸಹಾಯಕರೊಬ್ಬರು (ಎಫ್‌ಡಿಎ),
ತಾವು ನೇಮಕಗೊಂಡ ಒಂದು ವರ್ಷದ ನಂತರವೂ ಸಂಬಳ ದೊರೆಯದಿರುವುದಕ್ಕೆ ಮನನೊಂದು, ಕಚೇರಿ ಕೆಲಸಕ್ಕೆ ಧಕ್ಕೆಯಾಗದಂತೆ ರಾತ್ರಿ ಅವಧಿಯಲ್ಲಿ ಸೆಕ್ಯುರಿಟಿ ಕೆಲಸ ಮಾಡಲು ಇಲಾಖೆಯ ಆಯುಕ್ತರ ಅನುಮತಿ ಕೇಳಿರುವುದು (ಪ್ರ.ವಾ., ಆ. 20) ಶೋಚನೀಯ. ಇಲಾಖೆಗೆ ಸಿ ವೃಂದದ 100ಕ್ಕೂ ಹೆಚ್ಚು ಸಿಬ್ಬಂದಿ ನೇಮಕಗೊಂಡು ಒಂದು ವರ್ಷ ಕಳೆದಿದ್ದರೂ ಕೆಲವರಿಗೆ ಮಾತ್ರ ಕೆಲವು ತಿಂಗಳ ಸಂಬಳ ದೊರೆತಿದೆ, ಉಳಿದವರಿಗೆ ನೇಮಕಗೊಂಡ ದಿನದಿಂದಲೂ ಸಂಬಳ ಸಿಕ್ಕಿಲ್ಲದಿರುವುದು ಕಳವಳಕಾರಿ. ಸಂಬಳವೇ ಏಕಮಾತ್ರ ಆದಾಯದ ಮೂಲವಾಗಿ ಇರುವವರು ದೈನಂದಿನ ಜೀವನ ಸಾಗಿಸುವುದಾದರೂ ಹೇಗೆ? ತಾಂತ್ರಿಕ ಕಾರಣಗಳಿದ್ದಲ್ಲಿ, ಜೀವನ ನಿರ್ವಹಣೆಗೆ ಆಗುವಷ್ಟಾದರೂ ಹಣವನ್ನು ಮಧ್ಯಂತರವಾಗಿ ಬಿಡುಗಡೆ ಮಾಡಬಾರದೇಕೆ?
