ವಿಶ್ವಸಂಸ್ಥೆಯು ಮಾರ್ಚ್ 22 ಅನ್ನು ವಿಶ್ವ ಜಲ ದಿನವಾಗಿ ಘೋಷಿಸಿರುವುದು ಜೀವಜಲದ ಪ್ರಾಮುಖ್ಯತೆಯ ಅರಿವನ್ನು ವಿಶ್ವದೆಲ್ಲೆಡೆ ಮೂಡಿಸಬೇಕೆಂಬ ಕಾಳಜಿಯಿಂದ ಹಾಗೂ ನೀರು ಅತ್ಯಮೂಲ್ಯ ಸಂಪತ್ತೆಂಬ ಜಾಗೃತಿಯನ್ನು ತರುವುದಕ್ಕಾಗಿ. ಆದರೆ, ಈ ನಿಟ್ಟಿನಲ್ಲಿ ಸರ್ಕಾರಗಳು ವಹಿಸುತ್ತಿರುವ ಪಾತ್ರ ಹಾಗೂ ಜಲ ಸಂರಕ್ಷಣೆಯಲ್ಲಿ ಜನರ ಆಸಕ್ತಿಯ ಮಟ್ಟ ಅಷ್ಟೇನೂ ಆಶಾದಾಯಕವಾಗಿ ಇಲ್ಲ. ಈ ವರ್ಷದ ಆರಂಭದಲ್ಲಿ ರಾಜ್ಯದ ಬಹುತೇಕ ಜಲಾಶಯಗಳು ಭರ್ತಿಯಾದವು ನಿಜ. ಆದರೆ ಜಲಾಶಯದಿಂದ ಹರಿದು ಹೊರಹೋದ ನೀರಿನ ಪ್ರಮಾಣ ಲೆಕ್ಕವಿಲ್ಲದಷ್ಟು. ಈ ನೀರನ್ನೇನಾದರೂ ಏತ ನೀರಾವರಿ ಮೂಲಕ ಕೆರೆಗಳಿಗೆ ಭರ್ತಿ ಮಾಡಿದ್ದಿದ್ದರೆ ಕುಡಿಯುವ ನೀರಿನ ಸಮಸ್ಯೆಯೂ ಎದುರಾಗುತ್ತಿರಲಿಲ್ಲ, ಅಂತರ್ಜಲ ಮಟ್ಟ ಕೂಡ ಕುಸಿಯುತ್ತಿರಲಿಲ್ಲ. ಸರ್ಕಾರಗಳು ಈ ನಿಟ್ಟಿನಲ್ಲಿ ಪ್ರಯತ್ನಿಸಿದರೆ ಜಲ ದಿನದ ಆಚರಣೆ ಸಾರ್ಥಕವಾಗುತ್ತದೆ.
