‘ಗನ್ನಿಗೆ ಬಗ್ಗದ ಪೆನ್ನು ನಮ್ಮದು’

7
ಗೌರಿ ಲಂಕೇಶ್‌ ಆಶಯಗಳನ್ನು ಜೀವಂತಾಗಿಡಲು ‘ನ್ಯಾಯಪಥ ‌’ ಪತ್ರಿಕೆ ಬಿಡುಗಡೆ

‘ಗನ್ನಿಗೆ ಬಗ್ಗದ ಪೆನ್ನು ನಮ್ಮದು’

Published:
Updated:
Deccan Herald

ಬೆಂಗಳೂರು: ‘ಆದಿವಾಸಿಗಳು ಹಾಗೂ ದಲಿತ ಹಕ್ಕುಗಳ ಹೋರಾಟಗಾರರನ್ನು, ಬುದ್ಧಿಜೀವಿಗಳನ್ನು ಹಾಗೂ ವಕೀಲರರನ್ನು ಬಂಧಿಸುವ ಮೂಲಕ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ ದಬ್ಬಾಳಿಕೆ ನಡೆಸುತ್ತಿದೆ’ ಎಂದು ’ದಿ ವೈರ್‌’ ಸಂಪಾದಕ ಸಿದ್ಧಾರ್ಥ ವರದರಾಜನ್‌ ಆರೋಪಿಸಿದರು.

ಗೌರಿ ದಿನಾಚರಣೆಯಲ್ಲಿ ಬುಧವಾರ ಮಾತನಾಡಿದ ಅವರು,‘ಅನ್ಯಾಯದ ವಿರುದ್ದ ಧ್ವನಿ ಎತ್ತಿದವರವನ್ನು ದಮನಿಸುವ ಪ್ರಯತ್ನಗಳು ದೇಶದಲ್ಲಿ ನಡೆಯುತ್ತಿವೆ. ಮೋದಿ ಬಳಿ ಜಾರಿ ನಿರ್ದೇಶನಾಲಯ, ಸಿಬಿಐನಂಥ ಸಂಸ್ಥೆಗಳಿರಬಹುದು. ಅಧಿಕಾರ ಇರಬಹುದು. ಆದರೆ ನಮ್ಮ ಬಳಿ ಲೇಖನಿ ಇದೆ. ಗನ್ನಿಗೆ ಬಗ್ಗದ ಪೆನ್ನು ನಮ್ಮದು. ದಬ್ಬಾಳಿಕೆ ವಿರುದ್ಧದ ಸಮರವನ್ನು ಈ ಲೇಖನಿಯಿಂದಲೇ ಗೆಲ್ಲುತ್ತೇವೆ’ ಎಂದರು.

‘ಇತ್ತೀಚೆಗೆ ಅಭಿವ್ಯಕ್ತಿ ಸ್ವಾತಂತ್ರ್ಯದ ಮೇಲೆ ನಡೆಯುತ್ತಿರುವ ದಾಳಿಗಳು, ಬುದ್ಧಿಜೀವಿಗಳ ಬಂಧನ ಆಡಳಿತ ಪಕ್ಷದ ಹತಾಶೆಯ ಪ್ರತೀಕ. ಆಡಳಿತ ನಡೆಸುವವರ ಪರವಾಗಿರುವ ಗೂಂಡಾಗಳು ಹೋರಾಟಗಾರರ ಮೇಲೆ ದಾಳಿ ನಡೆಸಿದ ಸಂದರ್ಭದಲ್ಲಿ ಸರ್ಕಾರ ಯಾವುದೇ ಕ್ರಮ ಕೈಗೊಂಡಿಲ್ಲ’ ಎಂದು ದೂರಿದರು.

‘ಗೌರಿ ಸಂವಿಧಾನ, ಜಾತ್ಯತೀತ ತತ್ವ, ಶಾಂತಿಯ ಬಗ್ಗೆ ನಂಬಿಕೆ ಹೊಂದಿದ್ದವರು. ಆದಿವಾಸಿ ಹಾಗೂ ದಲಿತರ ಹಕ್ಕುಗಳ ಬಗ್ಗೆ ಬದ್ಧತೆ ಹೊಂದಿದ್ದರು. ಆಕೆಯ ಹತ್ಯೆಯಿಂದ ನಾವೆಲ್ಲ ಆತಂಕಕ್ಕೊಳಗಾಗುತ್ತೇವೆ ಎಂದು ಅವರು ಭಾವಿಸಿರಬಹುದು. ನಾವೆಲ್ಲ ಒಂದು ಕುಟುಂಬವಾಗಿ ಹೋರಾಡಿ ಆಕೆಯ ಆತ್ಮ ಸಮರ್ಪಣೆಗೆ ನ್ಯಾಯ ಒದಗಿಸುತ್ತೇವೆ’ ಎಂದರು.

ಬಿ.ಜಯಶ್ರೀ, ವಾಸು ದೀಕ್ಷಿತ್, ಎಂ.ಡಿ.ಪಲ್ಲವಿಯವರಂತಹ ಖ್ಯಾತ ಗಾಯಕರು ಹಾಡುಗಳನ್ನು ಹಾಡುವ ಮೂಲಕ ಗೌರಿ ಆಶಯಗಳಿಗೆ ಧ್ವನಿ ಸೇರಿಸಿದರು. ನಾದ ಮಣಿನಾಲ್ಕೂರು, ಪಿಚ್ಚಳ್ಳಿ ಶ್ರೀನಿವಾಸ್‌ ಅವರು ಸೌಹಾರ್ದ ಗೀತೆಗಳನ್ನು ಹಾಡಿದರು.
ಆರತಿ ರಾವ್‌ ಅವರ ಕವನವನ್ನು ಆಧರಿಸಿ ನಿರ್ಮಿಸಿರುವ ವಿಡಿಯೊ ತುಣುಕನ್ನು ಬಿಡುಗಡೆ ಮಾಡಲಾಯಿತು.

** 

‘ಗೌರಿ ದಿನ’ದಲ್ಲಿ ಕೇಳಿಸಿದ್ದು

ಕೊಲೆಯ ಹಿಟ್‌ ಲಿಸ್ಟ್‌ನಲ್ಲಿ ಇರುವವರೆಲ್ಲ ಶ್ರೇಷ್ಠ ಹಿಂದೂಗಳು. ಅವರನ್ನು ಕೊಂದು ಪ್ರಭುತ್ವ ಸ್ಥಾಪಿಸಲು ಹಿಂದುತ್ವ ಕಸರತ್ತು ನಡೆಸುತ್ತಿದೆ. ಗಾಂಧೀಜಿಯ ಕೊಲೆ ನಡೆದ ಸಂದರ್ಭದಲ್ಲಿ ಹಿಂದುತ್ವ ಅಧಿಕಾರದಲ್ಲಿ ಇರಲಿಲ್ಲ. ಈಗ ಗೋಡ್ಸೆ ಪರಿವಾರವೇ ಅಧಿಕಾರ ನಡೆಸುತ್ತಿದೆ. ಇತ್ತೀಚೆಗೆ ನಡೆದ ಕೊಲೆಗಳಿಗೆ ಪ್ರಭುತ್ವದ ಆಶೀರ್ವಾದ ಇದೆ ಎಂಬುದು ಗಾಬರಿಪಡಬೇಕಾದ ವಿಷಯ. ಮೋದಿ ಆಡಳಿತದ ಕೃಪಾಪೋಷಿತ ನಾಟಕ ರೂಪದಲ್ಲಿ ಇವು ನಡೆಯುತ್ತಿವೆ. ದೇಶ ಉಳಿಯ ಬೇಕಾದರೆ ಫ್ಯಾಸಿಸ್ಟರನ್ನು ಮೊದಲು ಅಧಿಕಾರದಿಂದ ಕೆಳಗಿಳಿಸಬೇಕು

–ಎ.ಕೆ.ಸುಬ್ಬಯ್ಯ, ಹಿರಿಯ ರಾಜಕಾರಣಿ

**

ನೀವೆಷ್ಟೇ ಪೆನ್ನುಗಳನ್ನು ಮುರಿದುಹಾಕಿ. ನಾವು ಬೆರಳಿನ ರಕ್ತವನ್ನೇ ಶಾಯಿಯಾಗಿ ಬಳಸಿ ಬರೆಯುತ್ತೇವೆ. ಗೌರಿ ಅವರ ಮೌಲ್ಯಗಳನ್ನು ಉಳಿಸುತ್ತೇವೆ. ದೇಶದ ಸ್ಥಿತಿ ಬಿಕ್ಕಟ್ಟಿನಲ್ಲಿದೆ. ಬೆಂಗಳೂರಿನ ನಾಗರಿಕರು ಧೈರ್ಯದಿಂದ ಒಟ್ಟಾಗಿದ್ದಾರೆ. ಈ ಸಂಘರ್ಷದಲ್ಲಿ ನಾವು ಗೆಲ್ಲುತ್ತೇವೆ. 

 ಜಿಗ್ನೇಶ್‌ ಮೇವಾನಿ, ಗುಜರಾತ್‌ ಶಾಸಕ 

**

ಲೇಖನಿ ಆಯುಧವಾದಾಗ ಸುಧಾರಣೆ ಆರಂಭವಾಗುತ್ತದೆ. ಯಾರೂ ಹೆದರಬಾರದು. ಹೋರಾಡಬೇಕು. ಗೆಲುವಿನ ಹಾದಿ ಮುಂದೆ ಇದೆ. ನೀವು (ಪ್ರಧಾನಿ ಮೋದಿ) ನಮ್ಮ ಸಂಸ್ಕೃತಿ ಜತೆ ಚೆಲ್ಲಾಟವಾಡುತ್ತಿದ್ದೀರಿ. ಇಂಥವರ ವಿರುದ್ಧ ಎಲ್ಲ ಪ್ರಗತಿಪರ ಶಕ್ತಿಗಳು ಒಂದಾಗಿ ಹೋರಾಡಬೇಕು.

– ಕನ್ಹಯ್ಯ ಕುಮಾರ್‌, ವಿದ್ಯಾರ್ಥಿ ನಾಯಕ

**

ಸನಾತನವಾದಿ ಭಯೋತ್ಪಾದನೆಯು ಉಗ್ರವಾದಿ ಧಾರ್ಮಿಕ ರಾಜಕಾರಣ. ಚರಿತ್ರೆಯುದ್ದಕ್ಕೂ ಅನೇಕ ಸಂತರನ್ನು ಗುಂಡಿಟ್ಟು ಕೊಲ್ಲಲಾಗಿದೆ. ಕೊಂದವರು ಖಾವಿ ಬಟ್ಟೆ ತೊಟ್ಟಿದ್ದರು. ಅದೇ ಪರಂಪರೆ ಇಂದಿಗೂ ಮುಂದುವರಿಯುತ್ತಿದೆ. 21ನೇ ಶತಮಾನದಲ್ಲಿ ಭಯೋತ್ಪಾದನೆಯ ಮುಂದಾಳತ್ವವನ್ನು ಕಾವಿ ಬಟ್ಟೆ ತೊಟ್ಟವರು ವಹಿಸಿದ್ದಾರೆ

– ಪ್ರಸನ್ನ, ರಂಗಕರ್ಮಿ

**

ಉಗ್ರವಾದಿಗಳು ಬಾಯಿ ಮುಚ್ಚು ನೀನು ಎಂದು ಹೇಳಲು ಬೆದರಿಕೆ ಒಡ್ಡುತ್ತಾರೆ. ಅವರ ಹಿಟ್‌ ಲಿಸ್ಟ್‌ನಲ್ಲಿ ನನ್ನ ಹೆಸರಿರುವ ಬಗ್ಗೆ ನನಗೆ ಹೆಮ್ಮೆ ಇದೆ. ಏಕೆಂದರೆ ನಾನು ಸತ್ಯವನ್ನು ಮಾತನಾಡುವವ. ನನ್ನ ಬಗ್ಗೆ ಅವರಿಗೆ ಭಯ ಇದೆ ಎಂಬುದೇ ಇದರ ಅರ್ಥ.

ನರೇಂದ್ರ ನಾಯಕ್‌, ವಿಚಾರವಾದಿ 

** 

ಹಿಂದಿನ ಪ್ರಧಾನಿ ಮನಮೋಹನ ಸಿಂಗ್‌ ಸ್ವಭಾವತಃ ಮೌನಿ. ಆದರೆ, ಈಗಿನ ಪ್ರಧಾನಿಯದ್ದು ರಾಕ್ಷಸನ ಮೌನ. ಪ್ರಗತಿಪರರ ಬಾಯಿ ಮುಚ್ಚಿಸುವ ಮೂಲಕ ಗಮನ ಬೇರೆಡೆ ಸೆಳೆಯಲು ಯತ್ನಿಸುತ್ತಾರೆ.

 ಪ್ರಕಾಶ್‌ ರೈ, ನಟ

** 

ಗೌರಿ ಬಲಿದಾನದ ನಂತರ ಸಾವಿರಾರು ಗೌರಿಯರು ಹುಟ್ಟಿದ್ದಾರೆ. ಗೌರಿಯವರು ತಮ್ಮ ತಂದೆಯ ಪರಂಪರೆಯನ್ನು ಮುಂದುವರಿಸಿದ್ದರು. ಆ ಪರಂಪರೆ ಮುಂದುವರಿಯಬೇಕು. 

– ತೀಸ್ತಾ ಸೆಟಲ್ವಾಡ್‌, ಪತ್ರಕರ್ತೆ

 **

ಗೌರಿ ಹತ್ಯೆಯನ್ನು ನೋಡಿದರೆ, ಕೋಮುವಾದಿಗಳಿಗೆ ಗೌರಿ ಅವರ ವಿಚಾರಧಾರೆಗಳು ಎಷ್ಟು ಭಯ ಹುಟ್ಟಿಸಿದ್ದವು ಎಂಬುದು ಅರಿವಾಗುತ್ತದೆ. ನನ್ನ ಮೇಲೆ ಹಲ್ಲೆ ಮಾಡುವ ಮೂಲಕ ನನ್ನ ಧ್ವನಿಯನ್ನು ಅಡಗಿಸುವ ಪ್ರಯತ್ನ ಮಾಡಿದರು. ದೇಶದ್ರೋಹಿ ಎಂಬಂತೆ ಬಿಂಬಿಸಿದರು. ದೇಶದ್ರೋಹಿ ನಾನಲ್ಲ; ರೈತರ ಸಾಲ ಮನ್ನಾಕ್ಕೆ ಹಣವಿಲ್ಲವೆಂದು ಕಾರ್ಪೊರೇಟ್‌ ಕಂಪನಿಗಳ ಸಾಲ ಮನ್ನಾ ಮಾಡಿದವರು, ಬೇಟಿ ಬಚಾವೋ ಎನ್ನುತ್ತಲೇ ಅತ್ಯಾಚಾರಿಗಳನ್ನು ಸಮರ್ಥಿಸುವವರು ದೇಶದ್ರೋಹಿಗಳು

–  ಉಮರ್‌ ಖಾಲಿದ್‌, ವಿದ್ಯಾರ್ಥಿ ನಾಯಕ 

 **

ನನ್ನದು ಓದು ಬರಹದಲ್ಲಿ ಏಕಾಂತ. ಗೌರಿಯದು ಲೋಕಾಂತ. ಅನ್ಯಾಯದ ವಿರುದ್ಧ ವಜ್ರದಷ್ಟು ಕಠಿಣ ನಿಲುವುಳ್ಳವಳು. ಅಷ್ಟೇ ಕೋಮಲವಾದ ಪ್ರೀತಿಯನ್ನೂ ಹೊಂದಿರುವವಳು. ಇಡೀ ಲೋಕಕ್ಕೇ ಐಕಾನ್‌ ಆಗಿದ್ದು ವಿಶೇಷ.

ಎಂ.ಎಸ್‌.ಆಶಾದೇವಿ, ಲೇಖಕಿ

**

ದೇಶದಲ್ಲಿ ಗಾಂಧೀಜಿ ಹತ್ಯೆ ಪ್ರಕರಣದ ತನಿಖೆ ನಡೆಸಿದಷ್ಟೇ ಪಕ್ಕಾ ಕಸುಬುದಾರಿಕೆಯಲ್ಲಿ ಗೌರಿ ಪ್ರಕರಣವನ್ನೂ ಪೊಲೀಸರು ತನಿಖೆ ನಡೆಸಿದ್ದಾರೆ. ಹೀಗಾಗಿ ಪ್ರಕರಣದ ತನಿಖೆ ತಾರ್ಕಿಕ ಅಂತ್ಯಕ್ಕೆ ಬಂದಿದೆ. 

– ದಿನೇಶ್‌ ಅಮೀನ್‌ ಮಟ್ಟು, ಪತ್ರಕರ್ತ

**

ಉದಾರವಾದಿ ಸಿದ್ಧಾಂತದ ನೆಲೆ ಕ್ಷೀಣಿಸುತ್ತಿದೆ. ಉದಾರವಾದಿ ಚಿಂತಕರು ಬಿಕ್ಕಟ್ಟಿನ ಸಂದರ್ಭದಲ್ಲಿ ಮಾತ್ರ ಒಗ್ಗಟ್ಟಾಗುತ್ತಾರೆ. ಈ ಪರಿಸ್ಥಿತಿ ಬದಲಾಗಬೇಕು. ಮಾನವತೆಯ ಮೇಲೆ ದಾಳಿ ನಡೆದಾಗಲೆಲ್ಲ ಕಟು ಶಬ್ದಗಳಿಂದ ಖಂಡಿಸಬೇಕು

ಪ್ರೊ.ವಿ.ಎಸ್‌.ಶ್ರೀಧರ್‌, ಚಿಂತಕ

**

ಗೌರಿ ಒಂದು ರೀತಿ ಕೂಗುಮಾರಿ ಹಕ್ಕಿ. ದೇಶದಲ್ಲಿ ಫ್ಯಾಸಿಸಂ ಆವರಿಸಿಕೊಳ್ಳುತ್ತಿರುವ ಬಗ್ಗೆ ಆಕೆ ಎಚ್ಚರಿಸಿದ್ದಳು. ಆದರೆ ನಾವು ಎಚ್ಚೆತ್ತುಕೊಳ್ಳಲಿಲ್ಲ. ಆಕೆ ನರೇಂದ್ರ ಮೋದಿಯನ್ನು, ಬಿಜೆಪಿಯನ್ನು ಏಕೆ ವಿರೋಧಿಸಿದಳು ಎಂದು ಅರ್ಥ ಮಾಡಿಕೊಳ್ಳಲಿಲ್ಲ.

– ನೂರ್‌ ಶ್ರೀಧರ್‌, ಹೋರಾಟಗಾರ

**

‘ದ್ವೇಷ ಮತ್ತು ಹಿಂಸೆಗೆ ಪ್ರಭುತ್ವದ ಬೆಂಬಲ ಸಿಕ್ಕಿದರೆ ಆಗುವ ಅನಾಹುತಗಳ ಬಗ್ಗೆ ನಾಲ್ಕು ವರ್ಷಗಳಿಂದ ನೋಡುತ್ತಿದ್ದೇವೆ. ನಮಗೆ ದ್ವೇಷದ ಭಾರತವಲ್ಲ, ಪ್ರೀತಿಯ ಭಾರತ ಬೇಕು. ಇಂದು ಯಾರು ಏನನ್ನೇ ತಿನ್ನಬೇಕಾದರೂ ಭಯದಿಂದಲೇ ತಿನ್ನಬೇಕಾದ ಸ್ಥಿತಿಯಿದೆ. ಆಹಾರ ಪದ್ಧತಿಯನ್ನು ಬೇರೆ ಯಾರೋ ನಿರ್ಧರಿಸುವಂತಾಗಿದೆ. ಇದು ಆತಂಕಕಾರಿ

-ರಹಮತ್‌ ತರೀಕೆರೆ

**

1975ರಲ್ಲಿ ಕಂಡ ತುರ್ತು ಪರಿಸ್ಥಿತಿ ಮತ್ತೆ ಮತ್ತೆ ಬರುತ್ತಲೇ ಇದೆ. ಅದರ ಗಂಭೀರತೆಯನ್ನು ಅರ್ಥೈಸಿಕೊಂಡು, ಅರಗಿಸಿಕೊಂಡು ಹೋರಾಟಕ್ಕೆ ನಾವು ಸಜ್ಜಾಗಬೇಕು

–ಚಂದ್ರಶೇಖರ ಪಾಟೀಲ, ಸಾಹಿತಿ

**

ನಾವು ಮೋದಿ ವಿರೋಧಿಗಳಲ್ಲ. ಅವರು ಪ್ರತಿಪಾದಿಸುವ ತತ್ವಗಳ ವಿರೋಧಿಗಳು. ತಮ್ಮ ಕೊಲೆಗೆ ಸಂಚು ನಡೆದಿದೆ ಎಂಬ ಹಸಿ ಸುಳ್ಳನ್ನು ದೇಶದಾದ್ಯಂತ ಹಬ್ಬುತ್ತಿದ್ದಾರೆ. ಇವರನ್ನು ಕೊಲೆ ಮಾಡುವವರು 65 ವರ್ಷ ದಾಟಿದವರು. ಇವರು ಪ್ರಧಾನಿ ವಿರುದ್ಧ ಸಂಚು ನಡೆಸುತ್ತಾರೆ ಎಂದರೆ ನಾವು ನಂಬಬೇಕೇ?

ಜಿ.ವಿ.ಶ್ರೀರಾಮರೆಡ್ಡಿ, ಸಿಪಿಎಂ ಮುಖಂಡ

**

ಮೋದಿಯವರು ಎಲ್ಲಿಂದಲೋ ಇಳಿದು ಬಂದವರಲ್ಲ. ನಮ್ಮಿಂದಲೇ ಆಯ್ಕೆಯಾದ ಸೇವಕರು. ಪುಂಡಾಟಿಕೆ ಮಾಡಲು ನಮಗೂ ಬರುತ್ತದೆ. ಸಂವಿಧಾನದ ಆಶಯಕ್ಕೆ ಗೌರವ ಕೊಡುವ ದೃಷ್ಟಿಯಿಂದ ಸುಮ್ಮನಿದ್ದೇವೆ. ಆದರೆ, ಹೋರಾಟದಿಂದ ಹಿಂದೆ ಸರಿಯುವುದಿಲ್ಲ

–ಬಿ.ಟಿ.ಲಲಿತಾ ನಾಯಕ್‌, ಲೇಖಕಿ

**

ನೀವು (ಪ್ರಧಾನಿ) ನಮ್ಮ ಮೌನ ಮುರಿದಿದ್ದೀರಿ. ಇನ್ನು ನೀವು ಮೌನ ಮುರಿಯುವವರೆಗೂ ನಾವು ಕೂಗಾಡುತ್ತಲೇ ಇರುತ್ತೇವೆ. ನಿಮ್ಮನ್ನು ಕುರ್ಚಿಯಿಂದ ಇಳಿಸುವವರೆಗೂ ಹೋರಾಡುತ್ತೇವೆ–
ವಿಜಯಮ್ಮ, ಲೇಖಕಿ

**

‘ಆರ್‌ಎಸ್‌ಎಸ್‌ ಬಹುಮುಖಿ ರಾಕ್ಷಸ’

‘ಆರ್‌ಎಸ್‌ಎಸ್‌ ಎಂದರೆ ಬಹುಮುಖಿ ರಾಕ್ಷಸ. ಬೇರೆ ಬೇರೆ ಹೆಸರುಗಳಲ್ಲಿ ಅದರ ಅಸ್ತಿತ್ವ ಇದೆ. ಅದರ ನಾಯಕ ಹಿಟ್ಲರ್‌. ಈ ಸಂಘಟನೆಯ ನಾಯಕರೆಲ್ಲಾ ಅದೇ ತತ್ವವನ್ನು ಪಾಲಿಸುವವರಾಗಿದ್ದಾರೆ. ಆರ್‌ಎಸ್‌ಎಸ್‌ನದ್ದು ರಾಜಕೀಯ ಹಿಂದುತ್ವ’ ಎಂದು ಸ್ವಾಮಿ ಅಗ್ನಿವೇಶ್‌ ಹೇಳಿದರು.

ಗೌರಿ ದಿನದ ಅಂಗವಾಗಿ ನಡೆದ ರಾಜಭವನ ಚಲೋ ಕಾರ್ಯಕ್ರಮದ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ಅವರು, ಹಿಂದೂಗಳ ಏಕತೆ ಬಗ್ಗೆ ಮಾತನಾಡುವ ಇವರಿಗೆ ದಾಭೋಲ್ಕರ್‌, ಪಾನ್ಸರೆ, ಪ್ರೊ.ಎಂ.ಎಂ.ಕಲಬುರ್ಗಿ, ಗೌರಿ ಹಿಂದೂಗಳಾಗಿ ಕಾಣಲಿಲ್ಲವೇ’ ಎಂದು ಪ್ರಶ್ನಿಸಿದರು.

‘ಆರ್‌ಎಸ್‌ಎಸ್‌ನ ಬಹುಮುಖಿ ಸಂಸ್ಥೆಗಳಲ್ಲಿ ಸನಾತನ ಸಂಸ್ಥೆಯೂ ಒಂದು. ಅದು ಸಾಮಾನ್ಯ ಧರ್ಮ ಪ್ರಚಾರಕ ಸಂಸ್ಥೆ ಅಲ್ಲ. ಅದೊಂದು ಭಯೋತ್ಪಾದನಾ ಸಂಸ್ಥೆ. ಅದರ ಮೇಲೆ ಸರ್ಕಾರ ನಿಗಾ ಇಡಬೇಕು’ ಎಂದು ಒತ್ತಾಯಿಸಿದರು.

‘ಸನ್ಯಾಸಿಯಾದ ನನ್ನ ಮೇಲೆ ಹಲ್ಲೆ ನಡೆದಾಗ ನೀವೇಕೆ ಒಂದೂ ಮಾತಾಡಲಿಲ್ಲ’ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಪ್ರಶ್ನಿಸಿದರು. ‘ನಿಮ್ಮ ಮೌನ ನೋಡಿದರೆ ಇಂಥ ಘಟನೆಗಳಿಗೆ ನೀವೇ ಹೊಣೆ’ ಎಂದು ಅವರು ಆರೋಪಿಸಿದರು.

ಬರಹ ಇಷ್ಟವಾಯಿತೆ?

  • 37

    Happy
  • 2

    Amused
  • 1

    Sad
  • 1

    Frustrated
  • 13

    Angry

Comments:

0 comments

Write the first review for this !