ಚಂಡೀಗಡ: ಇಲ್ಲಿನ ಗುರುದಾಸ್ಪುರ ವಲಯದ ಕಾಸ್ಸೊವಲ್ ಗಡಿ ಪ್ರದೇಶದ ಹೊರ ಠಾಣೆಯ ಬಳಿ ಭಾರಿ ಪ್ರಮಾಣದ ಶಸ್ತ್ರಾಸ್ತ್ರ ಹಾಗೂ ಸ್ಫೋಟಕ ಸಾಮಗ್ರಿಗಳನ್ನು ಗಡಿ ಭದ್ರತಾ ಪಡೆಯು (ಬಿಎಸ್ಎಫ್) ವಶಪಡಿಸಿಕೊಂಡಿದೆ.
ಈ ಶಸ್ತ್ರಾಸ್ತ್ರ ಹಾಗೂ ಸ್ಫೋಟಕ ಸಾಮಗ್ರಿಗಳನ್ನು ಬಿಳಿ ಬಣ್ಣದ ಚೀಲದಲ್ಲಿಟ್ಟು, ನೆಲದಲ್ಲಿ ಹುದುಗಿಸಲಾಗಿತ್ತು. ಶ್ವಾನದ ನೆರವಿನಿಂದ ಚೀಲ ಪತ್ತೆ ಮಾಡಲಾಯಿತು ಎಂದು ಬಿಎಸ್ಎಫ್ನ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
‘6 ಮ್ಯಾಗಜಿನ್ ಜತೆ ಎಕೆ–47 ರೈಫಲ್ಗಳು, 250 ಸುತ್ತು ಗುಂಡುಗಳು, 2 ಪಿಸ್ತೂಲಿನ ಮ್ಯಾಗಜಿನ್, 6 ಕೈ ಬಾಂಬುಗಳನ್ನು ವಶಕ್ಕೆ ಪಡೆಯಲಾಗಿದೆ’ ಎಂದು ಬಿಎಸ್ಎಫ್ನ ಮಹಾ ನಿರ್ದೇಶಕ ರಾಜೇಶ್ ಶರ್ಮಾ ಹೇಳಿದ್ದಾರೆ.
ಇಲ್ಲಿನ ಭಾರತ–ಪಾಕಿಸ್ತಾನ ಗಡಿ ಪ್ರದೇಶದ ಬಳಿ ಅನುಮಾನಾಸ್ಪದ ಚಟುವಟಿಕೆ ಕಂಡಿದ್ದರಿಂದ ಶೋಧ ಕಾರ್ಯಾಚರಣೆ ಕೈಗೊಳ್ಳಲಾಗಿತ್ತು.