ತ್ಯಾಜ್ಯ: ಕಲ್ಯಾಣ ಮಂಟಪಗಳಿಗೆ ಸೂಚನೆ

7
ಕಸ ವಿಲೇವಾರಿಗೆ ಪ್ಲಾಸ್ಟಿಕ್‌ ಚೀಲ ಬಳಕೆ ಬೇಡ– ಬಿಬಿಎಂಪಿ

ತ್ಯಾಜ್ಯ: ಕಲ್ಯಾಣ ಮಂಟಪಗಳಿಗೆ ಸೂಚನೆ

Published:
Updated:

ಬೆಂಗಳೂರು: ನಗರದಾದ್ಯಂತ ಪ್ಲಾಸ್ಟಿಕ್‌ ವಸ್ತುಗಳ ಬಳಕೆಯನ್ನು ಸಂಪೂರ್ಣ ನಿಷೇಧಿಸಿರುವ ಹಿನ್ನೆಲೆಯಲ್ಲಿ ಎಲ್ಲ ಕಲ್ಯಾಣ ಮಂಟಪಗಳು, ಸಭಾಂಗಣಗಳಲ್ಲಿ ತ್ಯಾಜ್ಯ ವಿಲೇವಾರಿ ಮಾಡಲು ಕ್ರಮ ಕೈಗೊಳ್ಳುವಂತೆ ಬಿಬಿಎಂಪಿ ಸೂಚಿಸಿದೆ. 

‘ಕಲ್ಯಾಣ ಮಂಟಪಗಳಲ್ಲಿ ಪ್ಲಾಸ್ಟಿಕ್‌ ತಟ್ಟೆ, ಲೋಟ, ಶೀಟ್‌ಗಳನ್ನು ಬಳಸಬಾರದು. ತ್ಯಾಜ್ಯ ವಿಂಗಡಿಸಿ ಸಂಗ್ರಹಿಸಬೇಕು. ಅದರ ಸಂಗ್ರಹ ಅಥವಾ ವಿಲೇವಾರಿಗೆ ಪ್ಲಾಸ್ಟಿಕ್‌ ಚೀಲಗಳನ್ನು ಬಳಸಬಾರದು. ಪ್ಲಾಸ್ಟಿಕ್‌ ಬಳಕೆ ನಿಷೇಧಕ್ಕೆ ಸಂಬಂಧಿಸಿದ ಸೂಚನಾ ಫಲಕವನ್ನು ಸಭಾಂಗಣದಲ್ಲಿ ಪ್ರದರ್ಶಿಸಬೇಕು. ತ್ಯಾಜ್ಯ ವಿಂಗಡಣೆಗೆ ಬೇಕಾದ ಸಲಕರಣೆಗಳನ್ನು ಹೊಂದಿರಬೇಕು’ ಎಂದು ಬಿಬಿಎಂಪಿ ಹೇಳಿದೆ.

ಕಲ್ಯಾಣ ಮಂಟಪದ ಸಾಮರ್ಥ್ಯಕ್ಕೆ ಅನುಗುಣವಾಗಿ ಅಗತ್ಯ ಪ್ರಮಾಣದ ಸ್ಟೀಲ್‌/ ಸೆರಾಮಿಕ್‌ ಅಥವಾ ಮೆಲಮೈನ್‌ನಿಂದ ತಯಾರಿಸಿದ ಊಟದ ತಟ್ಟೆ, ಲೋಟ, ಚಮಚೆಗಳನ್ನು ಹೊಂದಿರಬೇಕು. ನೀರು ಶುದ್ಧೀಕರಣ ಘಟಕ ಹೊಂದಿದ್ದು ಅದರ ನೀರನ್ನು ಕುಡಿಯಲು ಕೊಡಬೇಕು. ಇದರಿಂದಾಗಿ ಪ್ಲಾಸ್ಟಿಕ್‌ ಬಾಟಲಿಗಳಲ್ಲಿ ನೀರು ಕೊಡುವುದನ್ನು ತಪ್ಪಿಸಬಹುದು. ಪಾತ್ರೆ ಸ್ವಚ್ಛಗೊಳಿಸಲು ಸಮರ್ಪಕ ವ್ಯವಸ್ಥೆ ಇರಬೇಕು. ಪಾತ್ರೆ ತೊಳೆಯುವ ಸಂದರ್ಭ ನೀರು ಪೋಲಾಗದಂತೆ ನೋಡಿಕೊಳ್ಳಬೇಕು.

ತ್ಯಾಜ್ಯ ಸಂಗ್ರಹಕ್ಕೆ ಸರಿಯಾದ ವ್ಯವಸ್ಥೆ ಇರಬೇಕು. ಹಸಿ ತ್ಯಾಜ್ಯ, ಒಣ ತ್ಯಾಜ್ಯ ಸಂಗ್ರಹಕ್ಕೆ ಪ್ರತ್ಯೇಕ ಡಬ್ಬಿ ಇರಬೇಕು. ಹಸಿ ತ್ಯಾಜ್ಯವನ್ನು ಬಯೊಗ್ಯಾಸ್‌ ತಯಾರಿಕೆ ಅಥವಾ ಕಾಂಪೋಸ್ಟ್‌ ತಯಾರಿಕೆಗೆ ಬಳಸಬಹುದು. ಸ್ಯಾನಿಟರಿ ತ್ಯಾಜ್ಯಗಳನ್ನು ಮುಚ್ಚಿದ ಡಬ್ಬಿಗಳಲ್ಲಿ ಸಂಗ್ರಹಿಸಬೇಕು ಎಂದು ಬಿಬಿಎಂಪಿ ಸೂಚಿಸಿದೆ.

ತ್ಯಾಜ್ಯ ಸಂಗ್ರಹಕಾರರಿಗೆ ಏಪ್ರನ್‌, ಕೈಗವಸು, ಪಾದರಕ್ಷೆ ಸೇರಿದಂತೆ ಸುರಕ್ಷತಾ ಸಲಕರಣೆಗಳನ್ನು ಒದಗಿಸಬೇಕು ಎಂದು ಬಿಬಿಎಂಪಿ ಆಯುಕ್ತ ಎನ್‌. ಮಂಜುನಾಥ ಪ್ರಸಾದ್‌ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. 

**

ಪ್ಲಾಸ್ಟಿಕ್ ತಟ್ಟೆ, ಲೋಟ, ಶೀಟ್‌ಗಳನ್ನು ಬಳಸಬಾರದು

ಪ್ಲಾಸ್ಟಿಕ್ ಬಳಕೆ ನಿಷೇಧದ ಫಲಕ ಸಭಾಂಗಣದಲ್ಲಿ ಇರಬೇಕು

ನೀರು ಶುದ್ಧೀಕರಣ ಘಟಕ ಇದ್ದರೆ ಪ್ಲಾಸ್ಟಿಕ್ ಬಾಟಲಿ ಬಳಕೆ ತಪ್ಪಿಸಬಹುದು

ಬರಹ ಇಷ್ಟವಾಯಿತೆ?

  • 14

    Happy
  • 1

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !