ನಾನೊಂದುದೇಶದ ಎಕ್ಕಡ

ಸೋಮವಾರ, ಮೇ 20, 2019
33 °C

ನಾನೊಂದುದೇಶದ ಎಕ್ಕಡ

Published:
Updated:
Prajavani

ಎಂದು ಬರುವಳೊ ಅಂತರಂಗದ ಗಂಗೆ

ಬಟಾಬಯಲ ಬಡವರ ತುಂಗೆ

ಕಾದಿರುವೆ ಅವಳದೇ ಅನುಗಾಲದ ಪಾದಕ್ಕೆ ನಮಿಸಿ

 

ಒತ್ತು ತಿರುಗುವೆ ದಿಗಂತಗಳ

ಸುತ್ತಿ ಮೆರೆಸಿ ಕುಣಿವೆ ಆಕಾಶದಗಲ

ಅವಳ ಹೆಜ್ಜೆ ಹೆಜ್ಜೆಗೂ ಮಣಿದು ಮುನ್ನಡೆವೆ

 

ಒಂದೊಂದು ನಕ್ಷತ್ರ ಅವಳ ಒಂದೊಂದು ಹೆಜ್ಜೆ

ಒತ್ತಿದಂತೆಲ್ಲ ಹೊತ್ತು ಮೂಡಿ ಅವಳ ಸೂರ್ಯೋದಯ

ಕಾಲಕಾಲದ ನನ್ನ ತಲೆ ಮೇಲೆ ಅವಳದೇ ಚಂದ್ರೋದಯ

 

ಕಾದಿರುವೆ, ನಾನೊಂದು ಅನಾದಿ ದೇಶದ ಎಕ್ಕಡ

ತುಳಿಯುತ್ತಿರುವವರ ಮೆಟ್ಟುತ್ತಿರುವವರ

ಎಂದಾದರೂ ದೂರ ತಳ್ಳಿರುವೆನೇ

 

ದಿಕ್ಕರಿಸಿ ದಂಗೆ ಎದ್ದಿರುವೆನೇ

ಹುಲ್ಲು ಕಡ್ಡಿಗಿಂತಲು ಹಗುರ ನಿಮ್ಮೆಲ್ಲರ ಪಾದ

ಧರೆಗೆ ಗಿರಿಯು ಭಾರವೇ ಅವಳ ಪಾದವಿನ್ನು ಹೊರೆಯೆ

 

ತುಳಿಯುತ್ತಲೇ ಬರಲಿ ಅವಳು ನನ್ನೆದೆಯ ಮೇಲೆಯೇ

ಆತ್ಮದ ಮೇಲೆಯೇ ಅಂತರಾಳದ ಜೀವದ ಮೇಲೆಯೇ

ಅವಳ ಒಂದೊಂದು ಪಾದವೂ ನನ್ನೆದೆಯ ನಾದದ ನದಿ

 

ನರ್ತಿಸಲು ಅವಳು ನನ್ನ ನೆತ್ತಿಯ ಮೇಲೆಯೇ

ಅಪಮಾನವಿಲ್ಲ ಬಹುಮಾನವಿಲ್ಲ ಬಹುಜನ್ಮವಿಲ್ಲ

ಸಾಕಾಯ್ತು ಜನ್ಮಾಂತರಗಳ ಎಕ್ಕಡದ ಬಾಳು

 

ನನ್ನೆದೆಯ ದಮನಿಗಳಲಿ ಬರುತ್ತಿರುವ ಅವಳ

ಹೆಜ್ಜೆಯ ಸಪ್ಪಳ ಆಕಾಶದಿಂದಿಳಿದು ಬಂದ ಗಂಗೆಯಂತೆ

ಭೂಮಿಯಾಳದಿಂದ ಚಿಮ್ಮಿ ಬಂದ ಚಿಲುಮೆಯಂತೆ

 

ನಾನೊಂದು ಅನಾದಿ ಕಾಲದ ಎಕ್ಕಡ ತಾಯೇ

ನಿನಗೀಗೋ ದೇಶ ಭಕ್ತರ ಸಂಭ್ರಮ

ದೇಶದ್ರೋಹಿಗಳ ಸಂಹಾರದ ಸಡಗರ

 

ಬಂದೇ ಬರುವಳೊ ಬರದೆ ಮರೆವಳೊ

ದೇಶದ ಎಲ್ಲ ಪಾದಗಳ ಅನಾದಿ ಎಕ್ಕಡ ತಾಯೇ

ಒಂದಿರುಳಿಗಾದರೂ ಬರಲಿ ಅವಳು

 

ಹೊತ್ತು ಮೆರೆಸುವೆ ಆಕಾಶದ ದಿಗಂತಗಳ

ತಾರಾಮಂಡಲದ ಸೌರವ್ಯೂಹದ

ಖಗೋಳ ಭ್ರಂಹಾಂಡವ

ಹೊತ್ತಾಯಿತು ತಾಯೇ, ನೀನಾದರೂ ಮೆಟ್ಟಿಕೊ, ಹೊತ್ತುಕೊಳ್ಳುವೆ ನಿನ್ನನೇ.

ಇರ್ತಾರಾ ಮೋದಿ? ಬರ್ತಾರಾ ರಾಹುಲ್?

ಲೋಕಸಭೆ ಫಲಿತಾಂಶಕ್ಕಾಗಿ ವಿಶ್ವವೇ ಬೆರಗುಗಣ್ಣಿನಿಂದ ಕಾಯುತ್ತಿದೆ. ನರೇಂದ್ರ ಮೋದಿ ಗೆಲ್ತಾರಾ? ರಾಹುಲ್‌ ಗಾಂಧಿ ಬರ್ತಾರಾ? ರಾಜಕಾರಣದ ಕ್ಷಣಕ್ಷಣದ ಮಾಹಿತಿ, ತಾಜಾ ಅಪ್‌ಡೇಟ್‌ಗಳಿಗಾಗಿ www.prajavani.net/prajamatha ನೋಡಿ.

ಫೇಸ್‌ಬುಕ್‌ನಲ್ಲಿ ನಮ್ಮನ್ನು ಲೈಕ್ ಮಾಡಿ ಅಥವಾ ಟ್ವಿಟರ್, ಯೂಟ್ಯೂಬ್, ಇನ್‌ಸ್ಟಾಗ್ರಾಂನಲ್ಲಿ ಫಾಲೊ ಮಾಡಿ.

ತ್ವರಿತ ಸುದ್ದಿ, ನಿಖರ ವಿಶ್ಲೇಷಣೆಗೆ www.prajavani.net ಓದಿ. 'ಪ್ರಜಾವಾಣಿ' ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 11

    Happy
  • 0

    Amused
  • 0

    Sad
  • 0

    Frustrated
  • 1

    Angry

Comments:

0 comments

Write the first review for this !