ವಿಶೇಷ ಅತಿಥಿಯ ಹುಡುಕಾಟ

7

ವಿಶೇಷ ಅತಿಥಿಯ ಹುಡುಕಾಟ

Published:
Updated:
Deccan Herald

ನಾಡಿನ ಪ್ರಖ್ಯಾತ ವ್ಯಂಗ್ಯಚಿತ್ರಕಾರರು ಒಂದು ಕಡೆ ‌ಸೇರಿದ್ದರು. ಜೀವನದಲ್ಲಿ ಅದೇ ಮೊದಲ ಬಾರಿಗೆ ಅವರು ಅಲ್ಲಿ ಸೀರಿಯಸ್ಸಾಗಿ ಯೋಚನೆ ಮಾಡುತ್ತಿದ್ದರು. ವಿಷಯ ಇಷ್ಟೇ. ರಾಜ್ಯಮಟ್ಟದ ವ್ಯಂಗ್ಯಚಿತ್ರಕಾರರ ಸಮ್ಮೇಳನ ಏರ್ಪಡಿಸುವ ನಿರ್ಧಾರ ಆಗಲೇ ಮಾಡಿದ್ದರಿಂದ, ಅವರಿಗೀಗ ಒಬ್ಬರು ವಿಶೇಷ ಅತಿಥಿ ಬೇಕಾಗಿದ್ದರು. ಯಾವ ‘ಕುರಿ’ ಸಿಗಬಹುದೆಂದು ಚರ್ಚೆ ನಡೆಯುತ್ತಿತ್ತು.

ತಟ್ಟನೆ ಒಬ್ಬರು, ‘ನಮ್ಮ ಸೋಮರಸ ನಾಯಕ ಹೇಗೆ?’
‘ಅವರು ಸಿಕ್ಕಿದರೆ ತುಂಬಾ ಒಳ್ಳೆಯದು. ಒಳ್ಳೆ ಕಾರ್ಟೂನ್ ತರಾನೇ ವರ್ತಿಸ್ತಾರೆ’. ಅಧ್ಯಕ್ಷರ ಒಪ್ಪಿಗೆ ಸಿಕ್ಕಿದ್ದೇ ತಡ, ಸೋಮರಸರಿಗೆ ಕರೆ ಹೋಗೇಬಿಟ್ತು.
‘ಸಾರ್, ನಿಮ್ಮ ಕಾಲ್‌ಶೀಟ್ ಬೇಕಾಗಿತ್ತು’
(ಫೋನ್ ಕೆಲ ನಿಮಿಷ ಸ್ತಬ್ಧ!)
‘ಸಾರ್... ಸಾರ್… ಕೇಳಿಸ್ತಾ ಇದೆಯಾ?’

ಸೋಮರಸ ನಾಯಕರು ಬಹಳ ವರ್ಷಗಳ ನಂತರ ‘ಕಾಲ್‌ಶೀಟ್’ ಶಬ್ದ ಕೇಳಿ ದಂಗಾಗಿದ್ದರು! ಅವರು ಸುಧಾರಿಸಿಕೊಂಡು ‘ನೋಡಿ ಇವರೇ, ಮನೆಗೆ ಬನ್ನಿ… ಸಿನಿಮಾದ ಕತೆ, ನಿರ್ದೇಶಕ ಇತ್ಯಾದಿ ಇತ್ಯಾದಿ ಬಗ್ಗೆ ಕೂರ್ಕೊಂಡು, ಐ ಮೀನ್ ಹೀರ್ಕೊಂಡು ಮಾತನಾಡೋಣವಂತೆ’.

‘ಸಾರ್, ನಮಗೆ ಬೇಕಾದದ್ದು ಆ ಕಾಲ್‌ಶೀಟ್ ಅಲ್ಲ… ವ್ಯಂಗ್ಯಚಿತ್ರಕಾರರ ಸಮ್ಮೇಳನ ನಡೆಯಲಿದೆ… ಅದಕ್ಕೆ ತಮ್ಮನ್ನು ವಿಶೇಷ ಅತಿಥಿಯಾಗಿ ಆಹ್ವಾನಿಸಲು ಫೋನ್ ಮಾಡಿದೆ ಸಾರ್. ವ್ಯಂಗ್ಯಚಿತ್ರಕಾರರ ಭಾಷೆಯಲ್ಲಿ ‘ಕಾಲ್‌ಶೀಟ್’ ಅಂದುಬಿಟ್ಟೆ... ಕ್ಷಮಿಸಿ’.

ಸೋಮರಸ ನಾಯಕರ ಮುಖದಲ್ಲಿ ಯಾವ ಕಾರ್ಟೂನ್ ಎಕ್ಸ್‌ಪ್ರೆಶನ್ ಬಂತೋ ಗೊತ್ತಿಲ್ಲ. ‘ಶಿಟ್!’ ಅಂದದ್ದು ಮಾತ್ರ ಕೇಳಿಸಿತು.

ಹಾಸ್ಯನಟ ಚಿಕನ್ ಅವರ ಹೆಸರು ಮೇಲೆ ಬಂತು. ಕಾರ್ಯದರ್ಶಿ ಕೈಯಲ್ಲಿ ಚಿಕನ್ ಅವರ ಫೋನ್ ನಂಬರ್ ಇತ್ತು.

‘ಹಲೋ… ಚಿಕನ್ ಸಾರ್’

‘ಆರ್ಡರಾ? ಹೇಳಿ, ಚಿಕನ್ ಸಾರ್ ಎಷ್ಟು?’ ಆ ಕಡೆಯಿಂದ ಕೀರಲು ಧ್ವನಿ. ಫೋನ್ ತಪ್ಪಿ ಯಾವುದೋ ಹೋಟೆಲ್‌ಗೆ ಹೋಗಿತ್ತು. ಕಾರ್ಯದರ್ಶಿ ತಾನು ಕಾರ್ಟೂನ್ ಆದದ್ದು ಉಳಿದವರಿಗ್ಯಾರಿಗೂ ಗೊತ್ತಾಗಬಾರದೂಂತ ಈ ‘ಚಿಕ್ಕ-ನ್’ ಘಟನೆಯನ್ನು ಬಹಿರಂಗಪಡಿಸದೆ ಸುಮ್ಮನೆ ‘ರಾಂಗ್ ನಂಬರ್’ ಅಂದುಬಿಟ್ಟರು.

ಅಧ್ಯಕ್ಷರು ನೆಲ ನೋಡುತ್ತಲೇ ಹೇಳಿದರು. ‘ಸಿ.ಎಂ. ಅವರನ್ನು ಟ್ರೈ ಮಾಡೋಣವೇನ್ರೀ?’

ಕಾರ್ಯದರ್ಶಿ ಕೂಡಲೇ ‘ಸಿ.ಎಂ. ಬಂದರೆ ಭಾಷಣವನ್ನೇ ಮಾಡಲಿಕ್ಕಿಲ್ಲ! ವ್ಯಂಗ್ಯಚಿತ್ರಕಾರರ ದುಃಸ್ಥಿತಿ ಗೊತ್ತಿದ್ದರೆ ಅವರು ಗೊಳೋ ಎಂದು ಅಳಬಹುದು. ಅವರಿಗಿಂತ ಅವರ ಅಣ್ಣ ಮೂಢಣ್ಣರನ್ನು ಕರೆಸೋಣ. ಸಿಕ್ಕಾಪಟ್ಟೆ ಕಾಮಿಡಿ ಮಾಡುತ್ತಾರೆ’ ಎಂದು ಸಲಹೆಯಿತ್ತರು. ಸರಿ, ‘ಹೈಲೆವಲ್’ ಕಾರ್ಟೂನಿಸ್ಟ್ ಫೋನ್ ಹೊಡೆದೇಬಿಟ್ಟರು.

‘ಹೌದು, ಇದ್ದಾರೆ. ಏನ್ ವಿಷ್ಯ?’ ಪಿ.ಎ. ಗುನುಗಿದ.

‘18ನೇ ತಾರೀಕಿಗೆ ಬೆಂಗಳೂರಿನಲ್ಲಿ ಸಮ್ಮಿಶ್ರ ವ್ಯಂಗ್ಯಚಿತ್ರಕಾರರ ಸಮ್ಮೇಳನ ಏರ್ಪಡಿಸಿದ್ದೇವೆ. ಸಚಿವರನ್ನು ವಿಶೇಷ ಅತಿಥಿಯಾಗಿ ಆಹ್ವಾನಿಸೋಣಾಂತ…’

‘ಸರಿ, ಹೋಲ್ಡಾನ್… (ಹತ್ತು ನಿಮಿಷಗಳ ನಂತರ) ನೋಡಿ, ಮಂಗಚಿತ್ರಕಾರರೇ, ಅವರು ಬರಲು ತಯಾರಿದ್ದಾರೆ… ಆದರೆ ನಿಮ್ಮ ಸಮ್ಮೇಳನವನ್ನು ಹಾಸನದಲ್ಲಿ ಏರ್ಪಡಿಸಬೇಕಂತೆ. ಅಷ್ಟೇ ಅಲ್ಲ, ಬೆಳಗಿನ ಜಾವ 5 ಗಂಟೆಗೆ ಉದ್ಘಾಟನೆ ಮಾಡ್ಬೇಕಂತೆ. ಓಕೇನಾ?... ಹಲೋ … ಹಲೋ…’ ಪಿ.ಎ.ಗೆ ಅರ್ಥವಾಯಿತು.

ಅಧ್ಯಕ್ಷರು ಮತ್ತೆ ನೆಲ ನೋಡುತ್ತಲೇ, ‘ಯಾರೂ ಬೇಡ, ನಮ್ಮ ಉಪಟಳ ರಾಜರು ಸಿಗಬಹುದು’ ಎಂದು ಸ್ವತಃ ಅವರೇ ಫೋನ್ ಮಾಡಿದರು.  

‘ಸಾರ್, ಇದು ನಮ್ಮ ಸಂಘದ ಕೊನೆಯ ಆಸೆ. ದಯವಿಟ್ಟು ಇಲ್ಲ ಅನ್ನಬಾರದು. ‘ಅಧ್ಯಕ್ಷರು ತುಂಬಾ ವೇದನೆಯಿಂದ ಹೇಳಿದರು. ಉಪಟಳರು ‘ಏನ್ ಕತೆ? ನಿಮ್ಮ ಸಂಘ ಏನಾದರೂ ರಾಜ್ಯ ಬಂದ್‌ಗೆ ಕರೆ ನೀಡಬೇಕೆಂದಿದೆಯಾ? ನನ್ನ ಬೆಂಬಲ ಖಂಡಿತ ಇದೆ’ ಅನ್ನಬೇಕೇ!

‘ಸಾರ್ ಇದು ಬಂದ್ ವಿಚಾರ ಅಲ್ಲ… ನಮ್ಮ ಸಮ್ಮೇಳನಕ್ಕೆ ನೀವು ವಿಶೇಷ ಅತಿಥಿಯಾಗಿ ಬರಬೇಕಷ್ಟೇ’. ಅಧ್ಯಕ್ಷರ ಮಾತಿಗೆ ಉಪಟಳರು ದಿಲ್ಖುಷ್ ಆದರು. ‘ಅಯ್ಯೋ ಅಷ್ಟೇನಾ? ನಾನು ಬರ್ತೀನಿ, ಜತೆಗೆ ಎಮ್ಮೆಯನ್ನೂ ಕರ್ಕೊಂಡು ಬರ್ತೀನಿ. ಆಮಂತ್ರಣ ಪತ್ರಿಕೆಯಲ್ಲಿ ವಿಶೇಷ ಅತಿಥಿಗಳು ಎಂದು ಹಾಕಿ’.

ಅಧ್ಯಕ್ಷರು ‘ಓಹ್, ಅದಕ್ಕೇನಂತೆ... ಎಮ್ಮೆಯನ್ನೂ ಕರ್ಕೊಂಡು ಬನ್ನಿ. ಆದರೆ ಸಾರ್, ಟೋಪಿ ಮತ್ತು ಕೂಲಿಂಗ್ ಗ್ಲಾಸ್ ಇಲ್ಲದೆ ನಿಮ್ಮ ಕ್ಯಾರಿಕೇಚರ್ ರಚಿಸಬೇಕೂಂತ ಎಲ್ಲಾ ವ್ಯಂಗ್ಯಚಿತ್ರಕಾರರ ಆಸೆ...’

ಆ ಕಡೆಯಿಂದ ಉಪಟಳರು ಗುಡುಗಿದರು! ‘ಬ-ಬ-ಬದ್ಮಾಶ್! ಫೋ-ಫೊ- ಫೋನ್ ಇಡ್ರೀ!’

ಪಾಪ, ವ್ಯಂಗ್ಯಚಿತ್ರಕಾರರ ಸಮ್ಮೇಳನಕ್ಕೆ  ವಿಶೇಷ ಅತಿಥಿ  ಕೊನೆಗೂ ಸಿಗಲಿಲ್ಲ!

ಬರಹ ಇಷ್ಟವಾಯಿತೆ?

  • 8

    Happy
  • 2

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !