ಇಸ್ಲಾಮಾಬಾದ್: ‘ಮಾಜಿ ಜನರಲ್ ಪರ್ವೇಜ್ ಮುಷರಫ್ ಅವರ ರಾಷ್ಟ್ರೀಯ ಗುರುತಿನ ಚೀಟಿ (ಎನ್ಐಸಿ) ಪಾಸ್ಪೋರ್ಟ್ ಅನ್ನು ತಡೆಹಿಡಿಯುವಂತೆ ಆಂತರಿಕ ಸಚಿವಾಲಯಕ್ಕೆ ಪಾಕಿಸ್ತಾನ ಸರ್ಕಾರವು ಆದೇಶ ನೀಡಿದೆ’ ಎಂದು ಮಾಧ್ಯಮವೊಂದು ವರದಿ ಮಾಡಿದೆ.
ಮುಷರಫ್ ವಿರುದ್ಧ ರಾಜದ್ರೋಹದ ಪ್ರಕರಣ ದಾಖಲಾಗಿದ್ದು, ಇದುವರೆಗೂ ನ್ಯಾಯಾಲಯದ ಮುಂದೆ ಹಾಜರಾಗಿಲ್ಲ. ಇದರ ಬೆನ್ನಲ್ಲೇ ವಿಶೇಷ ನ್ಯಾಯಾಲಯದ ಆದೇಶದಂತೆ ಸರ್ಕಾರವು ಈ ಕ್ರಮ ಕೈಗೊಂಡಿದೆ ಎಂದು ಎಕ್ಸ್ಪ್ರೆಸ್ ಟ್ರಿಬ್ಯೂನ್ ವರದಿ ಮಾಡಿದೆ.
‘ಮುಷರಫ್ ಈಗ ದುಬೈನಲ್ಲಿದ್ದಾರೆ. ಒಂದೊಮ್ಮೆ ಪಾಸ್ಪೋರ್ಟ್ ತಡೆಹಿಡಿದರೆ ಅವರು ಅಲ್ಲಿಂದ ಬೇರೆ ದೇಶಕ್ಕೂ ತೆರಳಲು ಸಾಧ್ಯವಾಗುವುದಿಲ್ಲ. ಇದಲ್ಲದೇ ಪಾಕಿಸ್ತಾನದಲ್ಲಿರುವ ಅವರ ಬ್ಯಾಂಕಿಂಗ್ ವ್ಯವಹಾರ, ಆಸ್ತಿಯನ್ನು ಮಾರಾಟ ಮಾಡಲು ಅವಕಾಶ ಇರುವುದಿಲ್ಲ’ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.