ಏಷ್ಯಾ ಕ್ರಿಕೆಟ್‌ಗೆ ಭಾರತ ಅಧಿಪತಿ

3
ಹರ್ಷ ತ್ಯಾಗಿ ಮಿಂಚಿನ ಬೌಲಿಂಗ್‌: ಸಿಮ್ರನ್‌, ಬದೋನಿ ಅಬ್ಬರದ ಆಟ: ಲಂಕಾಗೆ ನಿರಾಸೆ

ಏಷ್ಯಾ ಕ್ರಿಕೆಟ್‌ಗೆ ಭಾರತ ಅಧಿಪತಿ

Published:
Updated:
Deccan Herald

ಢಾಕಾ: ಹರ್ಷ ತ್ಯಾಗಿ (38ಕ್ಕೆ6) ಭಾನುವಾರ ಶೇರ್‌ ಎ ಬಾಂಗ್ಲಾ ರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಬೀಸಿದ ಸ್ಪಿನ್‌ ಬಲೆಯೊಳಗೆ ಶ್ರೀಲಂಕಾದ ಬ್ಯಾಟ್ಸ್‌ಮನ್‌ಗಳು ಬಂದಿಯಾದರು.

ಹರ್ಷ ಅವರ ಮಿಂಚಿನ ಬೌಲಿಂಗ್‌ ನೆರವಿನಿಂದ ಭಾರತ ತಂಡ 19 ವರ್ಷದೊಳಗಿನವರ ಏಷ್ಯಾಕಪ್‌ ಕ್ರಿಕೆಟ್‌ ಟೂರ್ನಿಯಲ್ಲಿ ಪ್ರಶಸ್ತಿ ಗೆದ್ದಿತು. ಫೈನಲ್‌ನಲ್ಲಿ ಪ್ರಭ್‌ ಸಿಮ್ರನ್‌ ಸಿಂಗ್‌ ಬಳಗ 144ರನ್‌ಗಳಿಂದ ಸಿಂಹಳೀಯ ನಾಡಿನ ತಂಡವನ್ನು ಸೋಲಿಸಿತು.

ಮೊದಲು ಬ್ಯಾಟಿಂಗ್‌ ಮಾಡಿದ ಭಾರತ 50 ಓವರ್‌ಗಳಲ್ಲಿ 3 ವಿಕೆಟ್‌ಗೆ 304ರನ್‌ ಕಲೆಹಾಕಿತು. ಕಠಿಣ ಗುರಿ ಬೆನ್ನಟ್ಟಿದ ಶ್ರೀಲಂಕಾ 160ರನ್‌ಗಳಿಗೆ ಆಲೌಟ್‌ ಆಯಿತು.

ಇನಿಂಗ್ಸ್‌ ಆರಂಭಿಸಿದ ಭಾರತಕ್ಕೆ ಯಶಸ್ವಿ ಜೈಸ್ವಾಲ್‌ (85; 113ಎ, 8ಬೌಂ, 1ಸಿ) ಮತ್ತು ಅನುಜ್‌ ರಾವತ್‌ ಉತ್ತಮ ಆರಂಭ ನೀಡಿದರು. ಇವರು ಮೊದಲ ವಿಕೆಟ್‌ ಪಾಲುದಾರಿಕೆಯಲ್ಲಿ 151 ಎಸೆತಗಳಲ್ಲಿ 121ರನ್‌ ದಾಖಲಿಸಿದರು.

79 ಎಸೆತಗಳಲ್ಲಿ ಮೂರು ಸಿಕ್ಸರ್‌ ಮತ್ತು ನಾಲ್ಕು ಬೌಂಡರಿ ಸಹಿತ 57 ರನ್ ಗಳಿಸಿದ ರಾವತ್‌, 26ನೇ ಓವರ್‌ನ ಮೊದಲ ಎಸೆತದಲ್ಲಿ ದುಲಿತ್‌ ವೆಲ್ಲಾಲಾಗೆಗೆ ವಿಕೆಟ್‌ ನೀಡಿದರು. ಅರ್ಧಶತಕ ಗಳಿಸಿದ ನಂತರವೂ ಜೈಸ್ವಾಲ್‌, ಬ್ಯಾಟಿಂಗ್ ವೈಭವ ಮುಂದುವರಿಸಿದರು. ಅವರ ಜೊತೆಗೂಡಿದ ಕರ್ನಾಟಕದ ದೇವದತ್ತ ಪಡಿಕ್ಕಲ್ (31; 43ಎ, 1ಬೌಂ, 1ಸಿ) ಎರಡನೇ ವಿಕೆಟ್‌ಗೆ 59 ರನ್ ಸೇರಿಸಿದರು. ಇವರಿಬ್ಬರು ಮೂರು ಓವರ್‌ಗಳ ಅಂತರದಲ್ಲಿ ಪೆವಿಲಿಯನ್ ಸೇರಿದರು.

ಸಿಮ್ರ‌ನ್‌–ಬದೋನಿ ಸ್ಫೋಟಕ ಆಟ: ನಾಯಕ ಪ್ರಭ್‌ ಸಿಮ್ರನ್ ಸಿಂಗ್ (ಔಟಾಗದೆ 65; 37ಎ, 4ಸಿ, 3 ಬೌಂ) ಮತ್ತು ಆಲ್‌ರೌಂಡರ್‌ ಆಯುಷ್ ಬದೋನಿ (ಔಟಾಗದೆ 52, 28ಎ, 5ಸಿ, 2ಬೌಂ) ಎದುರಾಳಿ ತಂಡದ ಬೌಲರ್‌ಗಳ ಬೆವರಿಳಿಸಿದರು. ಈ ಜೋಡಿ ನಾಲ್ಕನೇ ವಿಕೆಟ್‌ಗೆ 55 ಎಸೆತಗಳಲ್ಲಿ 110 ರನ್‌ ಸೇರಿಸಿ ತಂಡವನ್ನು 300 ರನ್‌ಗಳ ಗಡಿ ದಾಟಿಸಿತು.

ಗುರಿ ಬೆನ್ನಟ್ಟಿದ ಸಿಂಹಳೀಯ ನಾಡಿನ ತಂಡ ಆರಂಭದಿಂದಲೇ ವಿಕೆಟ್‌ ಕಳೆದುಕೊಂಡು ಸಾಗಿತು. ನಿಶಾನ್‌ ಮದುಷ್ಕಾ (49; 67ಎ, 1ಬೌಂ, 2ಸಿ) ಮತ್ತು ನವೋದ್‌ ಪರಣವಿತರಣಾ (48; 61ಎ, 2ಬೌಂ, 2ಸಿ) ದಿಟ್ಟ ಹೋರಾಟ ನಡೆಸಿದರು. ಆದರೆ ಮಧ್ಯಮ ಮತ್ತು ಕೆಳ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ಪೆವಿಲಿಯನ್‌ ಪರೇಡ್‌ ನಡೆಸಿದ್ದರಿಂದ ತಂಡದ ಪ್ರಶಸ್ತಿಯ ಕನಸು ಕಮರಿತು.

ಸಂಕ್ಷಿಪ್ತ ಸ್ಕೋರ್‌: ಭಾರತ: 50 ಓವರ್‌ಗಳಲ್ಲಿ 3 ವಿಕೆಟ್‌ಗೆ 304 (ಯಶಸ್ವಿ ಜೈಸ್ವಾಲ್‌ 85, ಅನುಜ್ ರಾವತ್‌ 57, ದೇವದತ್ತ ಪಡಿಕ್ಕಲ್‌ 31, ಪ್ರಭ್‌ ಸಿಮ್ರನ್‌ ಸಿಂಗ್‌ ಔಟಾಗದೆ 65, ಆಯುಷ್ ಬದೋನಿ ಔಟಾಗದೆ 52; ದುಲಿತ್‌ ವೆಲ್ಲಾಲಾಗೆ 24ಕ್ಕೆ1, ಕಲಹರಾ ಸೇನಾರತ್ನೆ 45ಕ್ಕೆ1).

ಶ್ರೀಲಂಕಾ: 38.4 ಓವರ್‌ಗಳಲ್ಲಿ 160 (ನಿಶಾನ್‌ ಮದುಷ್ಕಾ49, ನಿಪುಣ್‌ ಧನಂಜಯ 12, ‍ಪಸಿಂಧು ಸೂರ್ಯಭಂಡಾರ 31, ನವೋದ್‌ ಪರಣವಿತರಣಾ 48; ಹರ್ಷ ತ್ಯಾಗಿ 38ಕ್ಕೆ6, ಸಿದ್ದಾರ್ಥ್‌ ದೇಸಾಯಿ 37ಕ್ಕೆ2, ಮೋಹಿತ್‌ ಜಾಂಗ್ರಾ 18ಕ್ಕೆ1).

ಫಲಿತಾಂಶ: ಭಾರತಕ್ಕೆ 144ರನ್‌ ಗೆಲುವು.

ಪಂದ್ಯಶ್ರೇಷ್ಠ: ಹರ್ಷ ತ್ಯಾಗಿ.

ಸರಣಿ ಶ್ರೇಷ್ಠ: ಯಶಸ್ವಿ ಜೈಸ್ವಾಲ್‌.

ಬರಹ ಇಷ್ಟವಾಯಿತೆ?

  • 2

    Happy
  • 0

    Amused
  • 0

    Sad
  • 0

    Frustrated
  • 1

    Angry

Comments:

0 comments

Write the first review for this !