ನವದೆಹಲಿ (ಪಿಟಿಐ): ಭಾರತ ಮಹಿಳಾ ಕ್ರಿಕೆಟ್ ತಂಡದ ವಿಕೆಟ್ಕೀಪರ್ ರಿಚಾ ಘೋಷ್ ಮತ್ತು ಬ್ಯಾಟರ್ ಜೆಮಿಮಾ ರಾಡ್ರಿಗಸ್ ಅವರು ಭಾರತ ಕ್ರಿಕೆಟ್ ನಿಯಂತ್ರಣ ಮಂಡಳಿಯ ಕೇಂದ್ರ ಗುತ್ತಿಗೆಯಲ್ಲಿ ಬಡ್ತಿ ಗಳಿಸಿದ್ದಾರೆ.
ಆದರೆ ಶಿಖಾ ಪಾಂಡೆ ಹಾಗೂ ತಾನಿಯಾ ಭಾಟಿಯಾ ಈ ಪಟ್ಟಿಯಿಂದ ಸ್ಥಾನ ಕಳೆದುಕೊಂಡಿದ್ದಾರೆ. ರಿಚಾ ಮತ್ತು ಜೆಮಿಮಾ ಅವರು ಸಿ ಯಿಂದ ಬಿ ವಿಭಾಗಕ್ಕೆ ಬಡ್ತಿಯಾಗಿದ್ದಾರೆ.
ಭಾರತ ತಂಡದ ನಾಯಕಿ ಹರ್ಮನ್ಪ್ರೀತ್ ಕೌರ್ ಹಾಗೂ ಸ್ಮೃತಿ ಮಂದಾನ ಎ ಕೆಟಗರಿಯಲ್ಲಿ ಮುಂದುವರಿದಿದ್ದಾರೆ. ಈ ವಿಭಾಗದಲ್ಲಿ ಮೂವರಿಗೆ ಮಾತ್ರ ಸ್ಥಾನ ನೀಡಲಾಗಿದೆ. ಆದರೆ ಸ್ಪಿನ್ನರ್ ರಾಜೇಶ್ವರಿ ಗಾಯಕವಾಡ ಅವರಿಗೆ ಬಿ ಕೆಟಗರಿಗೆ ಹಿಂಬಡ್ತಿ ನೀಡಲಾಗಿದೆ. ಲೆಗ್ಸ್ಪಿನ್ನರ್ ಪೂನಂ ಯಾದವ್ ಹೋದ ವರ್ಷ ಎ ವಿಭಾಗದಲ್ಲಿದ್ದರು. ಆದರೆ ಈಗ ಗುತ್ತಿಗೆಯ ಪಟ್ಟಿಯಿಂದ ಹೊರಬಿದ್ದಿದ್ದಾರೆ. 2022ರ ಮಾರ್ಚ್ನಲ್ಲಿ ಅವರು ಕೊನೆಯ ಪಂದ್ಯ ಆಡಿದ್ದರು.
ಹೋದ ವರ್ಷ ಗುತ್ತಿಗೆಯಲ್ಲಿರದ ರೇಣುಕಾ ಠಾಕೂರ್ ಅವರು ಈ ಬಾರಿ ನೇರವಾಗಿ ಬಿ ವಿಭಾಗದಲ್ಲಿ ಸ್ಥಾನ ಗಳಿಸಿದ್ದಾರೆ.
ಗುರುವಾರ ಬಿಸಿಸಿಐ ಪಟ್ಟಿ ಪ್ರಕಟಿಸಿದೆ. ಇದು ಈ ಅಕ್ಟೋಬರ್ನಿಂದ ಮುಂದಿನ ಸೆಪ್ಟೆಂಬರ್ವರೆಗೆ ಜಾರಿಯಾಗಲಿದೆ.
ಎ ಕೆಟಗರಿಯ ಆಟಗಾರ್ತಿಯರಿಗೆ ₹ 50 ಲಕ್ಷ, ಬಿ ಮತ್ತು ಸಿ ಕೆಟಗರಿಯವರಿಗೆ ಕ್ರಮವಾಗಿ ₹ 30 ಹಾಗೂ 10 ಲಕ್ಷ ವಾರ್ಷಿಕವಾಗಿ ನೀಡಲಾಗುತ್ತದೆ.
ಒಟ್ಟು 17 ಆಟಗಾರ್ತಿಯರು ಗುತ್ತಿಗೆ ಪಡೆದುಕೊಂಡಿದ್ದಾರೆ. ಹೋದ ವರ್ಷ ಮಹಿಳಾ ಕ್ರಿಕೆಟಿಗರಿಗೂ ಸಮಾನ ವೇತನವನ್ನು ಬಿಸಿಸಿಐ ಘೋಷಿಸಿತ್ತು.
ಕೇಂದ್ರ ಗುತ್ತಿಗೆಯಲ್ಲಿರುವವರು:
ವಿಭಾಗ ಎ: ಹರ್ಮನ್ಪ್ರೀತ್ ಕೌರ್, ಸ್ಮೃತಿ ಮಂದಾನ, ದೀಪ್ತಿ ಶರ್ಮಾ.