IND vs SA 2nd Test: ರಾಹುಲ್ 50; ಭಾರತ 202ಕ್ಕೆ ಆಲೌಟ್

ಕೆಳ ಕ್ರಮಾಂಕದಲ್ಲಿ ರವಿಚಂದ್ರನ್ ಅಶ್ವಿನ್ ಕೂಡ 46 ರನ್‌ಗಳ ಉಪಯುಕ್ತ ಇನ್ನಿಂಗ್ಸ್ ಕಟ್ಟಿದರು.

ಇದನ್ನೂ ಓದಿ:IND vs SA: ಪೂಜಾರ 3, ರಹಾನೆ ಗೋಲ್ಡನ್ ಡಕ್; ವ್ಯಾಪಕ ಟ್ರೋಲ್‌ಗೆ ಗುರಿ

ಬೆನ್ನು ನೋವಿಗೆ ಒಳಗಾಗಿರುವ ವಿರಾಟ್ ಕೊಹ್ಲಿ ಅನುಪಸ್ಥಿತಿಯಲ್ಲಿ ಇದೇ ಮೊದಲ ಬಾರಿಗೆ ಟೆಸ್ಟ್ ತಂಡವನ್ನು ಮುನ್ನಡೆಸುವ ಅದೃಷ್ಟವು ರಾಹುಲ್‌ ಅವರಿಗೆ ಒಲಿದಿತ್ತು. ಆದರೆ ಪ್ರಮುಖ ಬ್ಯಾಟರ್‌ಗಳು ನಿರಾಸೆ ಮೂಡಿಸುವುದರೊಂದಿಗೆ ತಂಡವು ಅಲ್ಪ ಮೊತ್ತಕ್ಕೆ ಕುಸಿತ ಕಂಡಿದೆ.

ರಾಹುಲ್ ಹಾಗೂ ಮಯಂಕ್ ಅಗರವಾಲ್ (26) ಮೊದಲ ವಿಕೆಟ್‌ಗೆ 36 ರನ್ ಪೇರಿಸಿದರು. ಅಲ್ಲಿಂದ ಬಳಿಕ ಭಾರತದ ಪತನ ಆರಂಭವಾಯಿತು. ಚೇತೇಶ್ವರ ಪೂಜಾರ (3) ಹಾಗೂ ಅಜಿಂಕ್ಯ ರಹಾನೆ (0) ಅವರನ್ನು ಸತತವಾದ ಎಸೆತಗಳಲ್ಲಿ ಔಟ್ ಮಾಡಿದ ಡುವಾನೆ ಒಲಿವಿಯರ್ ಪ್ರವಾಸಿಗರನ್ನು ಮಾರಕವಾಗಿ ಕಾಡಿದರು.

ವಿರಾಟ್ ಸ್ಥಾನದಲ್ಲಿ ಕಾಣಿಸಿಕೊಂಡ ಹನುಮ ವಿಹಾರಿ (20) ಹಾಗೂ ವಿಕೆಟ್ ಕೀಪರ್ ರಿಷಭ್ ಪಂತ್ (17) ಉತ್ತಮ ಆರಂಭ ಪಡೆದರೂ ಅದರ ಸಂಪೂರ್ಣ ಪ್ರಯೋಜನ ಪಡೆಯಲು ಸಾಧ್ಯವಾಗಲಿಲ್ಲ.

ಕೆಳ ಕ್ರಮಾಂಕದಲ್ಲಿ 46 ರನ್‌ಗಳ ಉಪಯುಕ್ತ ಇನ್ನಿಂಗ್ಸ್ ಕಟ್ಟಿದ ಅಶ್ವಿನ್ ತಂಡದ ಮೊತ್ತ 200ರ ಗಡಿ ದಾಟಲು ನೆರವಾದರು. 50 ಎಸೆತಗಳನ್ನು ಎದುರಿಸಿದ ಅಶ್ವಿನ್ ಇನ್ನಿಂಗ್ಸ್‌ನಲ್ಲಿ ಆರು ಬೌಂಡರಿಗಳು ಸೇರಿದ್ದವು.

ಕೊನೆಯ ಹಂತದಲ್ಲಿ ಅಜೇಯ 14 ರನ್ ಗಳಿಸಿದ ಜಸ್‌ಪ್ರೀತ್ ಬೂಮ್ರಾ ಗಮನ ಸೆಳೆದರು. ಬೂಮ್ರಾ ಇನ್ನಿಂಗ್ಸ್‌ನಲ್ಲೂ ಎರಡು ಬೌಂಡರಿ ಹಾಗೂ ಒಂದು ಸಿಕ್ಸರ್ ಸೇರಿದ್ದವು. ಇನ್ನುಳಿದಂತೆ ಶಾರ್ದೂಲ್ ಠಾಕೂರ್ (0), ಮೊಹಮ್ಮದ್ ಶಮಿ (9) ಹಾಗೂ ಮೊಹಮ್ಮದ್ ಸಿರಾಜ್ (1) ರನ್ ಗಳಿಸಿದರು.

ದಕ್ಷಿಣ ಆಫ್ರಿಕಾ ಪರ ಮಿಂಚಿನ ದಾಳಿ ಸಂಘಟಿಸಿದ ಮಾರ್ಕೊ ಜಾನ್ಸೆನ್ ನಾಲ್ಕು ಮತ್ತು ಡುವಾನೆ ಒಲಿವಿಯರ್ ಹಾಗೂ ಕಗಿಸೊ ರಬಾಡ ತಲಾ ಮೂರು ವಿಕೆಟ್‌ಗಳನ್ನು ಕಿತ್ತು ಮಿಂಚಿದರು.