ಋತುರಾಜ್, ಗಿಲ್ ಅಮೋಘ ಆಟ: ಭಾರತ ‘ಎ’ ತಂಡಕ್ಕೆ ಜಯಭೇರಿ

ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ಎ ತಂಡವು 50 ಓವರ್‌ಗಳಲ್ಲಿ 8ಕ್ಕೆ279 ರನ್ ಗಳಿಸಿತು. ಗುರಿ ಬೆನ್ನತ್ತಿದ ಆತಿಥೇಯ ತಂಡವು 41.1 ಓವರ್‌ಗಳಲ್ಲಿ 187 ರನ್‌ಗಳಿಗೆ ಕುಸಿಯಿತು. ಎಡಗೈ ಮಧ್ಯಮವೇಗಿ ಖಲೀಲ್ ಅಹಮದ್ ನಾಲ್ಕು ವಿಕೆಟ್ ಗಳಿಸಿ ಭಾರತ ಎ ಗೆಲುವಿಗೆ ತಮ್ಮ ಕಾಣಿಕೆ ನೀಡಿದರು.

ಆರಂಭಿಕ ಬ್ಯಾಟ್ಸ್‌ಮನ್ ಋತುರಾಜ್ (93; 103ಎಸೆತ) ನಾಯಕ ಗಿಲ್ (50; 66ಎಸೆತ) ಎರಡನೇ ವಿಕೆಟ್ ಜೊತೆಯಾಟದಲ್ಲಿ 89 ರನ್‌ ಸೇರಿಸಿದರು. ಕನ್ನಡಿಗ ಮಯಂಕ್ ಅಗರವಾಲ್ (8 ರನ್) ಹೆಚ್ಚು ರನ್ ಗಳಿಸುವಲ್ಲಿ ವಿಫಲರಾದರು.

ಆದರೆ ಗಿಲ್ ಮತ್ತು ಋತುರಾಜ್ ಅವರ ಅಬ್ಬರದ ಆಟಕ್ಕೆ ಬೌಲರ್‌ಗಳು ಬಸವಳಿದರು. ಗಿಲ್ ಹೊಡೆತಕ್ಕೆ ಚೆಂಡು ಏಳು ಬಾರಿ ಬೌಂಡರಿಗೆರೆಯನ್ನು ಮುತ್ತಿಕ್ಕಿ ಹೋಯಿತು. ಅವರು ಔಟಾದ ನಂತರ ಗಾಯಕವಾಡ್ ಅವರೊಂದಿಗೆ ಸೇರಿದ ಸೂರ್ಯಕುಮಾರ್ ಯಾದವ್ (50; 48ಎ) ಅಬ್ಬರಿಸಿದರು. ಬ್ಯಾಟಿಂಗ್ ಅವಕಾಶ ಪಡೆದ ಕೃಣಾಲ್ ಪಾಂಡ್ಯ (31ಎಸೆತಗಳಲ್ಲಿ 41) ಕೂಡ ಮಿಂಚಿದರು. ಆದರೆ, ಸಂಜು ಸ್ಯಾಮ್ಸನ್ (4) ಮತ್ತು ವಿಜಯಶಂಕರ್ (13) ಸಿಕ್ಕ ಅವಕಾಶ ಬಳಸಿಕೊಳ್ಳಲಿಲ್ಲ.

ನ್ಯೂಜಿಲೆಂಡ್ ತಂಡದ ಜೇಕಬ್ ಭೂಲಾ (50) ಮತ್ತು ಜ್ಯಾಕ್ ಬಾಯ್ಲ್ (42) ಮೊದಲ ವಿಕೆಟ್ ಜೊತೆಯಾಟದಲ್ಲಿ 82 ರನ್ ಗಳಿಸಿ ಉತ್ತಮ ಆರಂಭ ನೀಡಿದರು. ಆದರೆ ಖಲೀಲ್ ಮತ್ತು ಮೊಹಮ್ಮದ್ ಸಿರಾಜ್ (33ಕ್ಕೆ2) ಉತ್ತಮ ದಾಳಿಯಿಂದಾಗಿ ತಂಡವು ಗೆದ್ದಿತು.

ಸಂಕ್ಷಿಪ್ತ ಸ್ಕೋರು: ಭಾರತ ‘ಎ’ : 50 ಓವರ್‌ಗಳಲ್ಲಿ 8ಕ್ಕೆ279 (ಋತುರಾಜ್ ಗಾಯಕವಾಡ್ 93, ಸೂರ್ಯಕುಮಾರ್ ಯಾದವ್ 50, ಶುಭಮನ್ ಗಿಲ್ 50), ನ್ಯೂಜಿಲೆಂಡ್: 41.1 ಓವರ್‌ಗಳಲ್ಲಿ 187 (ಜೇಕಬ್ ಭೂಲಾ 50, ಖಲೀಲ್ ಅಹಮದ್ 4ಕ್ಕೆ43) ಫಲಿತಾಂಶ: ಭಾರತ ‘ಎ’ ತಂಡಕ್ಕೆ 92 ರನ್‌ಗಳ ಜಯ.