ಆಸ್ಟ್ರೇಲಿಯಾ ಪ್ರವಾಸ ಕೈಗೊಳ್ಳುವ ಭಾರತ ತಂಡದ ಆಟಗಾರರಿಗೆ ಎರಡು ವಾರ ಕ್ವಾರಂಟೈನ್

’ಸರಣಿಯ ಆರಂಭಕ್ಕೆ ಮುನ್ನ ಎರಡು ವಾರಗಳ ಕ್ವಾರಂಟೈನ್ ಆಗಬೇಕು. ಮೊದಲ ಟೆಸ್ಟ್ ಅಡಿಲೇಡ್‌ನಲ್ಲಿ ನಡೆಯಲಿದೆ. ಅದಕ್ಕೂ ಮುನ್ನ ಆಟಗಾರರ ಕೋವಿಡ್ ಪರೀಕ್ಷೆ, ಪ್ರತ್ಯೇಕವಾಸಕ್ಕಾಗಿ ಎಲ್ಲ ವ್ಯವಸ್ಥೆಗಳನ್ನು ಮಾಡಲಾಗುವುದು. ಎರಡು ವಾರಗಳ ಪ್ರತ್ಯೇಕವಾಸ ಸೂಕ್ತವಾಗಿದೆ‘ ಎಂದು ಕ್ರಿಕೆಟ್ ಆಸ್ಟ್ರೇಲಿಯಾದ ಹಂಗಾಮಿ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ನಿಕ್ ಹಾಕ್ಲಿ ಹೇಳಿದ್ದಾರೆ.

’ಆರೋಗ್ಯ ಪರಿಣತರ ನೆರವನ್ನು ಪಡೆಯುತ್ತೇವೆ. ಸ್ಥಳೀಯ ಆಡಳಿತದ ಮಾರ್ಗದರ್ಶನ ಮತ್ತು ಸಹಕಾರದೊಂದಿಗೆ ಉತ್ತಮ ವ್ಯವಸ್ಥೆಗಳನ್ನು ರೂಪಿಸಲಾಗುವುದು. ಪಂದ್ಯ ಗಳು ನಡೆಯುವ ಕ್ರೀಡಾಂಗಣದ ಅತಿ ಸಮೀಪದ ಹೋಟೆಲ್‌ಗಳನ್ನು ಆಟಗಾರರ ವಸತಿಗಾಗಿ ಗುರುತಿಸಲಾಗುವುದು. ಸೋಂಕು ಪ್ರಸರಣ ತಡೆಗೆ ಎಷ್ಟು ಸಾಧ್ಯವೋ ಅಷ್ಟೂ ಮುನ್ನೆಚ್ಚರಿಕೆಗಳನ್ನು ಚಾಚೂ ತಪ್ಪದೇ ಪಾಲಿಸಲಾಗುವುದು‘ ಎಂದು ನಿಕ್ ಹೇಳಿದ್ದಾರೆ.

ಕೊರೊನಾ ಕಾರಣದಿಂದ ದೀರ್ಘ ಕಾಲ ಕ್ರಿಕೆಟ್ ಚಟುವಟಿಕೆಗಳು ಸ್ಘಗಿತವಾಗಿದ್ದರು. ಇಂಗ್ಲೆಂಡ್‌ನಲ್ಲಿ ವೆಸ್ಟ್‌ ಇಂಡೀಸ್‌ ವಿರುದ್ಧದ ಸರಣಿಯ ಎರಡು ಪಂದ್ಯಗಳು ಯಶಸ್ವಿಯಾಗಿ ನಡೆದಿವೆ. ಇದರಿಂದಾಗಿ ಆಸ್ಟ್ರೇಲಿಯಾ ಕೂಡ ಮುಂದಿನ ದಿನಗಳಲ್ಲಿ ಉತ್ತಮ ನಿರ್ವಹಣೆ ಮಾಡುವ ವಿಶ್ವಾಸದಲ್ಲಿದೆ.

’ಡಿಸೆಂಬರ್ ವೇಳೆಗೆ ಕೊರೊನಾ ವೈರಸ್‌ ನಿಯಂತ್ರಣಕ್ಕೆ ಬರುವ ನಿರೀಕ್ಷೆ ಇದೆ. ಅದರಿಂದಾಗಿ ಅಂತರರಾಷ್ಟ್ರೀಯ ವಿಮಾನಯಾನ ನಿರ್ಬಂಧಗಳೂ ಕೊನೆಗೊಳ್ಳಬಹುದು. ಅದರಿಂದಾಗಿ ಸರಣಿಯನ್ನು ಸುಗಮವಾಗಿ ನಡೆಸಬಹುದು‘ ಎಂದು ನಿಕ್ ಅಭಿಪ್ರಾಯಪಟ್ಟಿದ್ದಾರೆ.