ಬುಧವಾರ ರಾತ್ರಿ ನಡೆದ ಪಂದ್ಯದಲ್ಲಿ ಕನ್ನಡಿಗ ಕೆ.ಎಲ್.ರಾಹುಲ್ (100; 64 ಎಸೆತ, 6 ಸಿಕ್ಸರ್, 6 ಬೌಂಡರಿ) ಅವರ ಅಬ್ಬರದ ಆಟದ ನೆರವಿನಿಂದ ಕಿಂಗ್ಸ್ ಇಲೆವನ್ ಪಂಜಾಬ್ ತಂಡ 197 ರನ್ ಗಳಿಸಿತ್ತು. ಕಠಿಣ ಗುರಿ ಬೆನ್ನತ್ತಿದ ಮುಂಬೈ ಇಂಡಿಯನ್ಸ್ ಆರಂಭದಿಂದಲೇ ರನ್ ಗಳಿಕೆಗೆ ಒತ್ತು ನೀಡಿತು. ಆದರೆ ವಿಕೆಟ್ಗಳು ಕಳೆದುಕೊಂಡ ಕಾರಣ ಒಂದು ಹಂತದಲ್ಲಿ ಸೋಲಿನ ಸುಳಿಯಲ್ಲಿ ಸಿಲುಕಿತ್ತು. ಈ ಸಂದರ್ಭದಲ್ಲಿ ಪೊಲಾರ್ಡ್ ಛಲದಂಕ ಮಲ್ಲನಂತೆ ಕ್ರೀಸ್ನಲ್ಲಿ ತಳವೂರಿದರು. ಅಂತಿಮ ಓವರ್ನಲ್ಲಿ ಅವರು ಔಟಾದರು. ಆದರೆ ವೆಸ್ಟ್ ಇಂಡೀಸ್ನ ಮತ್ತೊಬ್ಬ ಆಟಗಾರ ಅಲ್ಜಾರಿ ಜೋಸೆಫ್ ಗೆಲುವಿನ ರನ್ ಗಳಿಸಿ ಸಂಭ್ರಮ ಉಕ್ಕಿಸಿದರು.