ಬೆಲ್‌ಫಾಸ್ಟ್‌: ಟಿಮ್‌ ಮುರ್ಟಾಗ್‌ (39ಕ್ಕೆ3) ಪರಿಣಾಮಕಾರಿ ಬೌಲಿಂಗ್‌ ಮತ್ತು ಜೇಮ್ಸ್‌ ಮೆಕ್ಲಮ್‌ (54; 69ಎ, 6ಬೌಂ, 1ಸಿ) ಅರ್ಧಶತಕದ ಬಲದಿಂದ ಐರ್ಲೆಂಡ್‌ ತಂಡ ಜಿಂಬಾಬ್ವೆ ಎದುರಿನ ಮೂರನೇ ಏಕದಿನ ಪಂದ್ಯದಲ್ಲಿ 6 ವಿಕೆಟ್‌ಗಳಿಂದ ಗೆದ್ದಿದೆ. ಇದರೊಂದಿಗೆ ಮೂರು ಪಂದ್ಯಗಳ ಸರಣಿಯಲ್ಲಿ ‘ಕ್ಲೀನ್‌ ಸ್ವೀಪ್‌’ ಸಾಧಿಸಿದೆ.
ಸಿವಿಲ್‌ ಸರ್ವಿಸ್‌ ಕ್ಲಬ್‌ನ ಮೈದಾನದಲ್ಲಿ ಭಾನುವಾರ ರಾತ್ರಿ ಮೊದಲು ಬ್ಯಾಟ್‌ ಮಾಡಿದ ಜಿಂಬಾಬ್ವೆ 46.5 ಓವರ್‌ಗಳಲ್ಲಿ 190ರನ್‌ಗಳಿಗೆ ಆಲೌಟ್‌ ಆಯಿತು. ಈ ತಂಡದ ಸೀನ್‌ ವಿಲಿಯಮ್ಸ್‌ (67; 103ಎ, 6ಬೌಂ) ಅರ್ಧಶತಕ ಸಿಡಿಸಿ ಆಸರೆಯಾದರು.
191ರನ್‌ಗಳ ಗುರಿಯನ್ನು ವಿಲಿಯಂ ಪೋರ್ಟರ್‌ಫೀಲ್ಡ್‌ ನೇತೃತ್ವದ ಐರ್ಲೆಂಡ್‌ 41.2 ಓವರ್‌ಗಳಲ್ಲಿ 4 ವಿಕೆಟ್‌ ಕಳೆದುಕೊಂಡು ಮುಟ್ಟಿತು.
