ಅರಮನೆಯ ಕಂಬ; ಕ್ರಿಕೆಟ್‌ ಪ್ರತಿಬಿಂಬ

7
ಕರ್ನಾಟಕ ಪ್ರೀಮಿಯರ್ ಲೀಗ್‌ ಕ್ರಿಕೆಟ್ ಟೂರ್ನಿ: ಮಿರುಗುವ ಚಿನ್ನದ ಟ್ರೋಫಿ ಅನಾವರಣ

ಅರಮನೆಯ ಕಂಬ; ಕ್ರಿಕೆಟ್‌ ಪ್ರತಿಬಿಂಬ

Published:
Updated:
Deccan Herald

ಬೆಂಗಳೂರು: ಕರ್ನಾಟಕ ಪ್ರೀಮಿಯರ್ ಲೀಗ್ (ಕೆಪಿಎಲ್‌) ಟೂರ್ನಿಯ ಏಳನೇ ಆವೃತ್ತಿಗೆ ಮಿರುಗುವ ಚಿನ್ನದ ಟ್ರೋಫಿ ಸಿದ್ಧಗೊಂಡಿದೆ. ಇದರಲ್ಲಿ ಮೈಸೂರು ಅರಮನೆಯ ವಾಸ್ತುಶಿಲ್ಪ ಮತ್ತು ಕ್ರಿಕೆಟ್ ಪ್ರತಿಬಿಂಬಿಸಿದೆ. ನಾಲ್ಕು ಕೆಜಿ ತೂಕದ ಟ್ರೋಫಿ 19.5 ಇಂಚು ಎತ್ತರ ಇದ್ದು ಸಹೋದರರಾದ ದಿನೇಶ್ ಕುಮಾರ್ ಮತ್ತು ಸತೀಶ್ ಕುಮಾರ್‌ ಅವರು ವಿನ್ಯಾಸಗೊಳಿಸಿದ್ದಾರೆ.

ಅರಮನೆಯ ಕಂಬದ ಸೊಬಗು ಟ್ರೋಫಿಯ ಮಧ್ಯದಲ್ಲಿ ಪ್ರತಿಬಿಂಬಿಸಿದ್ದು ಅದಕ್ಕೆ ಆನೆದಂತದ ಆಕಾರದ ಆವರಣವಿದೆ. ಸುತ್ತಲೂ ಹೂವಿನ ಸಿಂಗಾರವೂ ಇದೆ. ಕಂಬದ ತುದಿಯಲ್ಲಿ ಕ್ರಿಕೆಟ್ ಚೆಂಡನ್ನು ಇರಿಸಲಾಗಿದ್ದು ಟ್ರೋಫಿಯ ತುದಿಯಲ್ಲಿ, ಕೆಪಿಎಲ್ ಟೂರ್ನಿಯನ್ನು ವಿಶ್ವಮಾನ್ಯಗೊಳಿಸಿದ ದಿವಂಗತ ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್‌ ಅವರ ಚಿತ್ರವನ್ನು ಇರಿಸಿ ಗೌರವ ಸಮರ್ಪಿಸಲಾಗಿದೆ.

ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸೋಮವಾರ ಸಂಜೆ ನಡೆದ ಕಾರ್ಯಕ್ರಮದಲ್ಲಿ ಟ್ರೋಫಿ ಅನಾವರಣಗೊಳಿಸಿದ ಮೈಸೂರು ರಾಜವಂಶಸ್ಥೆ ಹಾಗೂ ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್‌ ಅವರ ಪತ್ನಿ ಪ್ರಮೋದಾ ದೇವಿ ಒಡೆಯರ್‌ ‘ಪತಿ ಕ್ರೀಡಾಪ್ರೇಮಿ ಹಾಗೂ ಕ್ರೀಡಾಪಟು ಆಗಿದ್ದರು. ಅವರಿಗೆ ಕ್ರಿಕೆಟ್ ಬಗ್ಗೆ ಅಗಾಧ ಪ್ರೀತಿ ಇತ್ತು. ಗ್ರಾಮೀಣ ಪ್ರತಿಭೆಗಳನ್ನು ಬೆಳಕಿಗೆ ತರುವುದು ಕೆಪಿಎಲ್‌ನ ಪ್ರಮುಖ ಉದ್ದೇಶವಾಗಿತ್ತು. ಅದು ಸಾರ್ಥಕವಾಗಿದೆ’ ಎಂದು ಅಭಿಪ್ರಾಯಪಟ್ಟರು.

ನ್ಯೂಜಿಲೆಂಡ್‌ನ ಹಿರಿಯ ಕ್ರಿಕೆಟಿಗ ಸ್ಕಾಟ್ ಸ್ಟೈರಿಸ್ ‘ಐಪಿಎಲ್‌ನಲ್ಲಿ ಯುವ ಆಟಗಾರರು ಅತ್ಯುತ್ತಮ ಆಟ ಆಡಲು ಕೆಪಿಎಲ್‌ನಂಥ ಟೂರ್ನಿಗಳು ಕಾರಣವಾಗಿವೆ' ಎಂದರು.

ಕೆಎಸ್‌ಸಿಎ ಗೌರವ ಕಾರ್ಯದರ್ಶಿ ಸಂಜಯ್ ದೇಸಾಯಿ ‘ಮುಂದಿನ ಬಾರಿ ಶಿವಮೊಗ್ಗದಲ್ಲಿ ಕೆಪಿಎಲ್‌ ಪಂದ್ಯಗಳನ್ನು ಆಯೋಜಿಸಲಾಗುವುದು. ನಂತರದ ವರ್ಷಗಳಲ್ಲಿ ರಾಜ್ಯದ ಇತರ ಭಾಗಗಳಲ್ಲೂ ಪಂದ್ಯಗಳನ್ನು ಆಯೋಜಿಸಲು ಬೇಕಾದ ಸೌಲಭ್ಯ ಕಲ್ಪಿಸಲಾಗುತ್ತಿದೆ’ ಎಂದರು.

ಕೆಎಸ್‍ಸಿಎ ಜಂಟಿ ಕಾರ್ಯದರ್ಶಿ ಸಂತೋಷ್ ಮೆನನ್‌, ವಕ್ತಾರ ವಿನಯ್ ಮೃತ್ಯುಂಜಯ ಮತ್ತಿತರರು ಇದ್ದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !