ಐಪಿಎಲ್‌: ಮಾರ್ಷ್‌ ಹೊರಗುಳಿಯುವ ಸಾಧ್ಯತೆ

ಸನ್‌ರೈಸರ್ಸ್ ಹೈದರಾಬಾದ್ ತಂಡದ ಆಟಗಾರ ಮಾರ್ಷ್‌‌ ಅವರಿಗೆ ಆರ್‌ಸಿಬಿ ಇನಿಂಗ್ಸ್‌ ವೇಳೆ 5ನೇ ಓವರ್ ಬೌಲಿಂಗ್ ಮಾಡಲು ನಾಯಕ ಡೇವಿಡ್ ವಾರ್ನರ್ ಚೆಂಡು ನೀಡಿದ್ದರು. ಆದರೆ ಗಾಯದ ಹಿನ್ನೆಲೆಯಲ್ಲಿ ನಾಲ್ಕು ಎಸೆತಗಳನ್ನು ಮಾತ್ರ ಎಸೆಯಲುಅವರಿಗೆ ಸಾಧ್ಯವಾಯಿತು. ಅವರ ಓವರ್‌ಅನ್ನು‌‌ ಆಲ್‌ರೌಂಡರ್ ವಿಜಯಶಂಕರ್‌ ಪೂರ್ಣಗೊಳಿಸಿದ್ದರು.

ಹೈದರಾಬಾದ್ ಇನಿಂಗ್ಸ್‌ ವೇಳೆ‌ 10ನೇ ಆಟಗಾರನಾಗಿ ಬ್ಯಾಟ್‌ ಮಾಡಲು ಮಾರ್ಷ್‌‌ ಕಣಕ್ಕಿಳಿದರು. ಆಗಲೂ ಅವರಿಗೆ ನೋವು ಕಾಡಿತು. ಒಂದೂ ರನ್‌ ಗಳಿಸದೆ ಶಿವಂ ದುಬೆ ಅವರಿಗೆ ವಿಕೆಟ್‌ ಒಪ್ಪಿಸಿದರು.

‘ಮಾರ್ಷ್‌ ಅವರಿಗೆ ಗಂಭೀರ ಗಾಯವಾದಂತೆ ಕಾಣುತ್ತಿದೆ. ಅವರು ಮುಂದಿನ ಯಾವುದೇ ಪಂದ್ಯಗಳಲ್ಲಿ ಆಟವಾಡಲು ಸಾಧ್ಯವಾಗುವುದೇ ಎಂಬುದರ ಬಗ್ಗೆ ಖಚಿತವಿಲ್ಲ‘ ಎಂದು ತಂಡದ ಮೂಲಗಳು ತಿಳಿಸಿವೆ.

ಆರ್‌ಸಿಬಿ ಮತ್ತು ಸನ್‌ರೈಸರ್ಸ್‌ ಹೈದರಾಬಾದ್ ನಡುವೆ ದುಬೈನಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ, ಆರ್‌ಸಿಬಿ 10 ರನ್‌ಗಳ ಜಯ ದಾಖಲಿಸಿತ್ತು.