‘ಓಲ್ಡ್‌’ ಟ್ರಾಫರ್ಡ್‌ ನೆನಪುಗಳಲ್ಲಿ ತೇಲಿದ ಶಾಸ್ತ್ರಿ

ಭಾರತ ಕ್ರಿಕೆಟ್ ತಂಡದ ಕೋಚ್ ರವಿಶಾಸ್ತ್ರಿ ಮಂಗಳವಾರ ನೆನಪಿನಂಗಳದಲ್ಲಿ ತೇಲಿದರು. ಭಾರತವು ಮೊದಲ ವಿಶ್ವಕಪ್ ಗೆದ್ದು 36 ವರ್ಷಗಳು (ಜೂನ್ 25, 1983) ತುಂಬಿದ ದಿನವನ್ನು ಸ್ಮರಿಸಿದರು. ಆ ಟೂರ್ನಿಯ ಮೊದಲ ಪಂದ್ಯವು ಜೂನ್ 9ರಂದು ವಿಂಡೀಸ್‌ ಎದುರು ನಡೆದಿತ್ತು. ಅದರಲ್ಲಿ ಭಾರತ ಗೆದ್ದಿತ್ತು. ಆಗ ತಂಡದಲ್ಲಿದ್ದ ರವಿಶಾಸ್ತ್ರಿ ಮೂರು ವಿಕೆಟ್ ಗಳಿಸಿದ್ದರು.

ಇದೇ ಮೈದಾನದಲ್ಲಿ ಗುರುವಾರ ಭಾರತ ತಂಡವು ವೆಸ್ಟ್ ಇಂಡೀಸ್ ತಂಡವನ್ನು ಎದುರಿಸಲಿದೆ. ಈ ಕುರಿತು ಬಿಸಿಸಿಐ ಡಾಟ್ ಟಿವಿಗೆ ನೀಡಿದ ಸಂದರ್ಶನದಲ್ಲಿ ಶಾಸ್ತ್ರಿ ಮಾತನಾಡಿದರು.

‘ಆಗಿದ್ದ ಕ್ರೀಡಾಂಗಣಕ್ಕೂ ಈಗಿನದ್ದಕ್ಕೂ ಬಹಳ ವ್ಯತ್ಯಾಸವಿದೆ. ಈ ಮೈದಾನದ ಹಿಂದೆ ಒಂದು ರೈಲ್ವೆ ಟ್ರ್ಯಾಕ್ ಇತ್ತು. ಆ ಪಂದ್ಯದಲ್ಲಿ ಜೋಯೆಲ್ ಗಾರ್ನರ್ ಆಡಿದ ಒಂದು ಹೊಡೆತಕ್ಕೆ ಚೆಂಡು ಆ ಟ್ರ್ಯಾಕ್‌ ಮೇಲೆ ಹೋಗಿಬಿದ್ದಿತ್ತು. ಅದನ್ನು ಮರೆಯಲು ಸಾಧ್ಯವೇ ಇಲ್ಲ. ಆ ಇನಿಂಗ್ಸ್‌ನ ಕೊನೆಯ ವಿಕೆಟ್‌ ಅನ್ನು ನಾನು ಪಡೆದಿದ್ದೆ. ಅದು ಎಂದಿಗೂ ಹಸಿರಾದ ನೆನಪು’ ಎಂದು ಶಾಸ್ತ್ರಿ ಹೇಳಿದರು.

‘ಅಂದು ಇಲ್ಲಿ ವಿಂಡೀಸ್ ಎದುರು ಗಳಿಸಿದ್ದ ಜಯವು ನಮ್ಮ ವಿಶ್ವಾಸವನ್ನು ದ್ವಿಗುಣಗೊಳಿಸಿತ್ತು. ಆ ನಂಬಿಕೆಯೇ ನಮ್ಮನ್ನು ವಿಶ್ವಕಪ್ ವಿಜೇತರಾಗುವತ್ತ ಮುನ್ನಡೆಸಿತ್ತು. ಭಾರತದ ಕ್ರಿಕೆಟ್‌ನ ಚಹರೆಯನ್ನೇ ಬದಲಿಸಿದ್ದ ಸಾಧನೆ ಅದು. ಇದೀಗ ಮತ್ತೆ ಈ ಕ್ರೀಡಾಂಗಣಕ್ಕೆ ಮರಳಿದ್ದೇವೆ’ ಎಂದರು.

ಆ ಪಂದ್ಯದಲ್ಲಿ ಭಾರತ ತಂಡವು 60 ಓವರ್‌ಗಳಲ್ಲಿ 8ಕ್ಕೆ262 ರನ್‌ ಗಳಿಸಿತ್ತು. ಯಶಪಾಲ್ ಶರ್ಮಾ 89 (120ಎಸೆತ) ರನ್ ಗಳಿಸಿದ್ದರು. ವಿಂಡೀಸ್ ಬಳಗವು 228 ರನ್ ಗಳಿಸಿ ಆಲೌಟ್ ಆಗಿತ್ತು. ರೋಜರ್ ಬಿನ್ನಿ ಮತ್ತು ರವಿಶಾಸ್ತ್ರಿ ಅವರು ತಲಾ ಮೂರು ವಿಕೆಟ್ ಕಬಳಿಸಿದ್ದರು.

ಆ ಟೂರ್ನಿಯಲ್ಲಿ ಫೈನಲ್‌ನಲ್ಲಿ ಭಾರತಕ್ಕೆ ಮತ್ತೆ ವಿಂಡೀಸ್ ಮುಖಾಮುಖಿಯಾಗಿತ್ತು. ಲಾರ್ಡ್ಸ್‌ನಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ್ದ ಭಾರತ 183 ರನ್‌ಗಳ ಗುರಿ ನೀಡಿತ್ತು. ವಿಂಡೀಸ್ ತಂಡವನ್ನು 52 ಓವರ್‌ಗಳಲ್ಲಿ 140 ರನ್‌ಗಳಿಗೆ ಆಲೌಟ್ ಮಾಡಿದ್ದ ಕಪಿಲ್ ದೇವ್ ಬಳಗವು ವಿಶ್ವಕಪ್‌ಗೆ ಮುತ್ತಿಕ್ಕಿತ್ತು.