ವಿದಾಯದ ಪಂದ್ಯದಲ್ಲಿ ಮಿಂಚಿದ ಗಂಭೀರ್‌

ಗಂಭೀರ್‌ ಅವರ ಅರ್ಧಶತಕದ ಬಲದಿಂದ ದೆಹಲಿ ತಂಡ ರಣಜಿ ಟ್ರೋಫಿ ಎಲಿಟ್‌ ‘ಬಿ’ ಗುಂಪಿನ ಪಂದ್ಯದಲ್ಲಿ ಆಂಧ್ರ ತಂಡಕ್ಕೆ ದಿಟ್ಟ ಉತ್ತರ ನೀಡಿದೆ.

ದೆಹಲಿ ತಂಡ ಎರಡನೇ ದಿನದಾಟದ ಅಂತ್ಯಕ್ಕೆ ಮೊದಲ ಇನಿಂಗ್ಸ್‌ನಲ್ಲಿ 56 ಓವರ್‌ಗಳಲ್ಲಿ 1 ವಿಕೆಟ್‌ಗೆ 190ರನ್‌ ಗಳಿಸಿದೆ. ಈ ತಂಡ ಎದುರಾಳಿಗಳ ಲೆಕ್ಕ ಚುಕ್ತಾ ಮಾಡಲು ಇನ್ನು 200ರನ್‌ ಕಲೆಹಾಕಬೇಕಿದೆ. ಬಿ.ಸುಮಂತ್‌ ನಾಯಕತ್ವದ ಆಂಧ್ರ, ಪ್ರಥಮ ಇನಿಂಗ್ಸ್‌ನಲ್ಲಿ 121 ಓವರ್‌ಗಳಲ್ಲಿ 390ರನ್‌ ಗಳಿಸಿತ್ತು.

ಬ್ಯಾಟಿಂಗ್‌ ಆರಂಭಿಸಿದ ಧ್ರುವ ಶೋರೆ ಬಳಗಕ್ಕೆ ಗಂಭೀರ್‌ ಮತ್ತು ಹಿತೇನ್‌ ದಲಾಲ್‌ (58; 77ಎ, 9ಬೌಂ) ಉತ್ತಮ ಆರಂಭ ನೀಡಿದರು. ಈ ಜೋಡಿ ಮೊದಲ ವಿಕೆಟ್‌ಗೆ ಶತಕದ (108) ಜೊತೆಯಾಟವಾಡಿತು. 26ನೇ ಓವರ್‌ನಲ್ಲಿ ಹಿತೇನ್‌ ಔಟಾದರು. ನಂತರ ಗಂಭೀರ್‌ ಮತ್ತು ನಾಯಕ ಧ್ರುವ (ಬ್ಯಾಟಿಂಗ್‌ 39; 105ಎ, 1ಬೌಂ) ಸುಂದರ ಇನಿಂಗ್ಸ್‌ ಕಟ್ಟಿ ತವರಿನ ಅಭಿಮಾನಿಗಳನ್ನು ರಂಜಿಸಿದರು.

ಭಿಲ್ಲೆ ಶತಕ: ವಲಸಾಡ್‌ನಲ್ಲಿ ನಡೆಯುತ್ತಿರುವ ಎಲಿಟ್‌ ‘ಎ’ ಗುಂಪಿನ ಗುಜರಾತ್‌ ಎದುರಿನ ಪಂದ್ಯದಲ್ಲಿ ರೈಲ್ವೇಸ್‌ ‍ತಂಡದ ನಿತಿನ್‌ ಭಿಲ್ಲೆ (ಬ್ಯಾಟಿಂಗ್‌ 109; 191ಎ, 14ಬೌಂ, 1ಸಿ) ಶತಕ ಸಿಡಿಸಿ ಗಮನ ಸೆಳೆದಿದ್ದಾರೆ.

ಕರ್ನಾಟಕದ ನಿತಿನ್‌ ಅವರ ಅಮೋಘ ಆಟದ ಬಲದಿಂದ ರೈಲ್ವೇಸ್‌ ತಂಡ ಮೊದಲ ಇನಿಂಗ್ಸ್‌ನಲ್ಲಿ 82 ಓವರ್‌ಗಳಲ್ಲಿ 3 ವಿಕೆಟ್‌ಗೆ 266ರನ್‌ ದಾಖಲಿಸಿದೆ. ಗುಜರಾತ್‌ ತಂಡ ಪ್ರಥಮ ಇನಿಂಗ್ಸ್‌ನಲ್ಲಿ 93.5 ಓವರ್‌ಗಳಲ್ಲಿ 367ರನ್‌ ಗಳಿಸಿತ್ತು.