ಸಿರಾಜ್ ಏಟು; ರೂಡಿ ಎದುರೇಟು

7
ಕ್ರಿಕೆಟ್: ಭಾರತ ‘ಎ’ –ದಕ್ಷಿಣ ಆಫ್ರಿಕಾ ‘ಎ’ ನಡುವಣ ’ಟೆಸ್ಟ್‌’

ಸಿರಾಜ್ ಏಟು; ರೂಡಿ ಎದುರೇಟು

Published:
Updated:
Deccan Herald

ಬೆಂಗಳೂರು: ಕೇವಲ ಆರು ರನ್‌ಗಳ ಅಂತರದಿಂದ ಶತಕ ತಪ್ಪಿಸಿಕೊಂಡ ರೂಡಿ ಸೆಕೆಂಡ್ , ದಕ್ಷಿಣ ಆಫ್ರಿಕಾ ‘ಎ’ ತಂಡವನ್ನು ಸಂಕಷ್ಟದಿಂದ ಪಾರು ಮಾಡಿದರು.

ಶನಿವಾರ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಆರಂಭವಾದ ‘ಟೆಸ್ಟ್‌’ ಪಂದ್ಯದ ಮೊದಲ ಇನಿಂಗ್ಸ್‌ನ ಆರಂಭದಲ್ಲಿಯೇ ಭಾರತ ‘ಎ’ ತಂಡದ ಮೊಹಮ್ಮದ್ ಸಿರಾಜ್ (20–3–56–3) ನೀಡಿದ್ದ ಆಘಾತಕ್ಕೆ ಪ್ರವಾಸಿ ತಂಡವು ಅಲ್ಪಮೊತ್ತಕ್ಕೆ ಕುಸಿಯುವ ಭೀತಿ ಎದುರಿಸಿತ್ತು. ಆದರೆ ಆರನೇ ಕ್ರಮಾಂಕದಲ್ಲಿ ಕ್ರೀಸ್‌ಗೆ ಬಂದ ಬಲಗೈ ಬ್ಯಾಟ್ಸ್‌ಮನ್ ರೂಡಿ (94; 139ಎಸೆತ, 12ಬೌಂಡರಿ) ತಂಡವು ದಿನದಾಟದ ಕೊನೆಗೆ 88 ಓವರ್‌ಗಳಲ್ಲಿ 8 ವಿಕೆಟ್‌ಗಳಿಗೆ 246 ರನ್‌ಗಳ ಮೊತ್ತ ಗಳಿಸಲು ಕಾರಣರಾದರು.

ಮಧ್ಯಮವೇಗಿಗಳಿಗೆ ನೆರವು ನೀಡುತ್ತಿದ್ದ ಪಿಚ್‌ನಲ್ಲಿ ಸಿರಾಜ್, ನವದೀಪ್ ಸೈನಿ ಮತ್ತು ರಜನೀಶ್ ಗುರುಬಾನಿ ಉತ್ತಮವಾಗಿ ದಾಳಿ ಮಾಡಿದರು. ಪ್ರವಾಸಿ ತಂಡದ ಆರಂಭಿಕ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ಅವರನ್ನು ಎದುರಿಸಲು ಪರದಾಡಿದರು. ಆದರೆ ರೂಡಿ ಮಾತ್ರ ದಿಟ್ಟತನದಿಂದ ಆಡಿದರು. ಅನುಭವಿ ಸ್ಪಿನ್ನರ್‌ಗಳಾದ ಯಜುವೇಂದ್ರ ಚಾಹಲ್ ಮತ್ತು ಅಕ್ಷರ್ ಪಟೇಲ್ ಅವರ ಎಸೆತಗಳನ್ನೂ ಚಾಣಾಕ್ಷತನದಿಂದ ಎದುರಿಸಿದರು.

ರೂಡಿ ಕ್ರೀಸ್‌ಗೆ ಬಂದಾಗ ತಂಡದ ನಾಲ್ವರು ಅಗ್ರಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ಪೆವಿಲಿಯನ್ ಸೇರಿದ್ದರು. ತಂಡದ ಖಾತೆಯಲ್ಲಿ ಕೇವಲ 94 ರನ್‌ಗಳಿದ್ದವು. ಮುತುಸಾಮಿಯೊಂದಿಗೆ ಜೊತೆಗೂಡಿದ ರೂಡಿ ಐದನೇ ವಿಕೆಟ್‌ ಜೊತೆಯಾಟದಲ್ಲಿ 59 ರನ್‌ ಗಳಿಸಿದರು. ಆದರೆ 54ನೇ ಓವರ್‌ನಲ್ಲಿ ಮತುಸಾಮಿ ಔಟಾದ ನಂತರ ಉಳಿದ ಬ್ಯಾಟ್ಸ್‌ಮನ್‌ಗಳು ಹೆಚ್ಚು ವೇಗವಾಗಿ ಆಡಲಿಲ್ಲ. ಆದರೂ ಎದೆಗುಂದದ ರೂಡಿ ತಂಡದ ಮೊತ್ತ ಹೆಚ್ಚಿಸುವ ಪ್ರಯತ್ನ ಮಾಡಿದರು. ಶತಕ ದಾಖಲಿಸುವತ್ತ ಹೆಜ್ಜೆ ಇಟ್ಟರು. 85ನೇ ಓವರ್‌ನಲ್ಲಿ ಹೊಸ ಚೆಂಡು ಪ್ರಯೋಗಿಸಿದ ಸಿರಾಜ್ ಯಶಸ್ವಿಯಾದರು. ಸಿರಾಜ್ ಹಾಕಿದ್ದ ಔಟ್‌ ಸ್ವಿಂಗರ್ ತಡವಿದ ರೂಡಿ ಅವರು ವಿಕೆಟ್‌ಕೀಪರ್ ಶ್ರೀಕರ್ ಭರತ್‌ಗೆ ಕ್ಯಾಚಿತ್ತರು.

ಸಿರಾಜ್ ಮಿಂಚು: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಕ್ರಿಕೆಟ್ ಟೂರ್ನಿಯಲ್ಲಿ ರಾಯಲ್ ಚಾಲೆಂಜರ್ಸ್‌ ಬೆಂಗಳೂರು ತಂಡದಲ್ಲಿ ಆಡುವ ಮೊಹಮ್ಮದ್ ಸಿರಾಜ್ ‘ತವರಿನ ಅಂಗಳ’ದಲ್ಲಿ ಮಿಂಚಿದರು. ಬೆಳಿಗ್ಗೆಯ ವಾತಾವರಣವನ್ನು ಸಮರ್ಥವಾಗಿ ಬಳಸಿಕೊಂಡ ಅವರು ಎದುರಾಳಿ ತಂಡಕ್ಕೆ ಪೆಟ್ಟು ಕೊಟ್ಟರು.
ಹೋದ ವಾರ ಇಲ್ಲಿಯೇ ನಡೆದಿದ್ದ ಅಭ್ಯಾಸ ಪಂದ್ಯದಲ್ಲಿ ಉತ್ತಮವಾಗಿ ಆಡಿದ್ದ ಆರಂಭಿಕ ಬ್ಯಾಟ್ಸ್‌ಮನ್ ಪೀಟರ್ ಮೆಲಾನ್ (7 ರನ್) ಮತ್ತು ಜುಬೇರ್ ಹಮ್ಜಾ ಅವರ ವಿಕೆಟ್‌ಗಳನ್ನು ಸಿರಾಜ್ ಕಬಳಿಸಿದರು.

ಇದರಿಂದಾಗಿ ಕ್ರೀಸ್‌ನಲ್ಲಿ ಉಳಿದ ಸೆರೆಲ್ ಎರ್ವಿ ಮತ್ತು ನಾಯಕ ಖಯಾಯ ಜೊಂಡೊ ಅವರು ನಿಧಾನಗತಿಯ ಆಟಕ್ಕೆ ಮೊರೆ ಹೋದರು. ಇದರಿಂದಾಗಿ ಸ್ಕೋರ್‌ ಬೋರ್ಡ್‌ನಲ್ಲಿ ರನ್‌ಗಳು ಆಮೆಗತಿಯಲ್ಲಿ ದಾಖಲಾದವು.

ಆದರೆ ಇವರಿಬ್ಬರೂ ಮೂರನೇ ವಿಕೆಟ್ ಜೊತೆಯಾಟದಲ್ಲಿ 50 ರನ್‌ ಸೇರಿಸಿದರು. ಊಟದ ವಿರಾಮಕ್ಕೂ ಮುನ್ನದ ಎಸೆತದಲ್ಲಿ ಜೊಂಡೊ ವಿಕೆಟ್ ಪಡೆದ ನವದೀಪ್ ಸೈನಿ ಸಂಭ್ರಮಿಸಿದರು.

ಸಂಕ್ಷಿಪ್ತ ಸ್ಕೋರು: ದಕ್ಷಿಣ ಆಫ್ರಿಕಾ ಎ : 88 ಓವರ್‌ಗಳಲ್ಲಿ 8 ವಿಕೆಟ್‌ಗಳಿಗೆ 246 (ಸೆರೆಲ್ ಎರ್ವಿ 47, ಖಯಾಯ ಜೊಂಡೊ 24, ಸೆನುರನ್ ಮುತುಸಾಮಿ 23, ರೂಡಿ ಸೆಕೆಂಡ್ 94, ಶಾನ್ ವಾನ್ ಬರ್ಗ್ 15 ಮಾಲೂಸಿ ಸಿಬೊಟೊ ಬ್ಯಾಟಿಂಗ್ 13, ಬೆರಾನ್ ಹೆನ್ರಿಕ್ಸ್‌ ಬ್ಯಾಟಿಂಗ್ 6, ಮೊಹಮ್ಮದ್ ಸಿರಾಜ್ 56ಕ್ಕೆ3, ನವದೀಪ್ ಸೈನಿ 47ಕ್ಕೆ2, ಯಜುವೇಂದ್ರ ಚಾಹಲ್ 54ಕ್ಕೆ1)

 

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !