ಟೆಸ್ಟ್‌ ಕ್ರಿಕೆಟ್‌: ಶ್ರೀಲಂಕಾ ವಿರುದ್ಧ ನ್ಯೂಜಿಲೆಂಡ್‌ ಜಯಭೇರಿ

ಸಾರಾ ಓವಲ್‌ ಮೈದಾನದಲ್ಲಿ ಸೋಮವಾರ 5 ವಿಕೆಟ್‌ಗೆ 382ರನ್‌ಗಳಿಂದ ಮೊದಲ ಇನಿಂಗ್ಸ್‌ನ ಆಟ ಮುಂದುವರಿಸಿದ ಕೇನ್‌ ವಿಲಿಯಮ್ಸನ್‌ ಸಾರಥ್ಯದ ನ್ಯೂಜಿಲೆಂಡ್‌ 115 ಓವರ್‌ಗಳಲ್ಲಿ 6 ವಿಕೆಟ್‌ಗೆ 431ರನ್‌ ಗಳಿಸಿ ಡಿಕ್ಲೇರ್‌ ಮಾಡಿ ಕೊಂಡಿತು. ವಿಕೆಟ್‌ ಕೀಪರ್‌ ಬಿಜೆ ವಾಟ್ಲಿಂಗ್‌ (105; 226ಎ, 9ಬೌಂ) ಅಜೇಯ ಶತಕ ಸಿಡಿಸಿ ಸಂಭ್ರಮಿಸಿದರು.

ಶ್ರೀಲಂಕಾ ತಂಡ ದ್ವಿತೀಯ ಇನಿಂಗ್ಸ್‌ನಲ್ಲಿ 70.2 ಓವರ್‌ಗಳಲ್ಲಿ 122ರನ್‌ ಗಳಿಸಿ ಹೋರಾಟ ಮುಗಿಸಿತು. ಈ ತಂಡ 75ರನ್‌ಗಳಿಗೆ ಏಳು ವಿಕೆಟ್‌ ಕಳೆದುಕೊಂಡು ಸಂಕಷ್ಟ ಎದುರಿಸಿತ್ತು.

ಡ್ರಾ ಮಾಡಿಕೊಳ್ಳಲು ಲಂಕಾ ತಂಡ ಅಂತಿಮ ದಿನದ ಕೊನೆಯ ಅವಧಿಯಲ್ಲಿ 36 ಓವರ್‌ಗಳನ್ನು ಆಡಬೇಕಿತ್ತು. ಮಂದ ಬೆಳಕಿನ ಕಾರಣ ಆಟವು ಬೇಗನೆ ಸ್ಥಗಿತಗೊಳ್ಳುವ ಸಾಧ್ಯತೆಯೂ ಇತ್ತು. ನಿರೋಷನ್‌ ಡಿಕ್ವೆಲ್ಲಾ (51; 161ಎ, 6ಬೌಂ) ಮತ್ತು ಸುರಂಗ ಲಕ್ಮಲ್‌ (14; 45ಎ, 2ಬೌಂ, 1ಸಿ) ಇದನ್ನು ಗಮನದಲ್ಲಿಟ್ಟುಕೊಂಡು ಆಡಿದರು. ಎಂಟನೇ ವಿಕೆಟ್‌ಗೆ ಈ ಜೋಡಿ 40ರನ್‌ ಸೇರಿಸಿತು. ಅಜಾಜ್‌ ಪಟೇಲ್‌ ಮತ್ತು ವಿಲಿಯಮ್‌ ಸೋಮರ್‌ವಿಲ್‌ ಅವರು ಕ್ರಮವಾಗಿ ಡಿಕ್ವೆಲ್ಲಾ ಮತ್ತು ಲಕ್ಮಲ್‌ ವಿಕೆಟ್‌ ಉರುಳಿಸಿ ಎದುರಾಳಿಗಳ ಡ್ರಾ ಕನಸಿಗೆ ತಣ್ಣೀರು ಸುರಿದರು.

ಸೌಥಿ ಮತ್ತು ಬೌಲ್ಟ್‌ ಅವರು ಟೆಸ್ಟ್‌ನಲ್ಲಿ 250 ವಿಕೆಟ್‌ ಪಡೆದ ಸಾಧನೆಯನ್ನೂ ಈ ಪಂದ್ಯದಲ್ಲಿ ಮಾಡಿದರು.

ಸಂಕ್ಷಿಪ್ತ ಸ್ಕೋರ್‌: ನ್ಯೂಜಿಲೆಂಡ್‌; ಮೊದಲ ಇನಿಂಗ್ಸ್‌: 115 ಓವರ್‌ಗಳಲ್ಲಿ 6 ವಿಕೆಟ್‌ಗೆ 431 ಡಿಕ್ಲೇರ್‌ (ಬಿಜೆ ವಾಟ್ಲಿಂಗ್‌ ಔಟಾಗದೆ 105, ಕಾಲಿನ್‌ ಡಿ ಗ್ರ್ಯಾಂಡ್‌ಹೋಮ್‌ 83, ಟಿಮ್‌ ಸೌಥಿ ಔಟಾಗದೆ 24; ದಿಲ್ರುವಾನ ಪೆರೇರಾ 114ಕ್ಕೆ3, ಲಾಹಿರು ಕುಮಾರ 115ಕ್ಕೆ1, ಲಸಿತ್‌ ಎಂಬುಲ್ದೆನಿಯಾ 156ಕ್ಕೆ2).

ಶ್ರೀಲಂಕಾ; ಮೊದಲ ಇನಿಂಗ್ಸ್‌: 90.2 ಓವರ್‌ಗಳಲ್ಲಿ 244 ಮತ್ತು 70.2 ಓವರ್‌ಗಳಲ್ಲಿ 122 (ಕುಶಾಲ್‌ ಮೆಂಡಿಸ್‌ 20, ನಿರೋಷನ್‌ ಡಿಕ್ವೆಲ್ಲಾ 51, ದಿಮುತ್‌ ಕರುಣಾರತ್ನೆ 21, ಸುರಂಗ ಲಕ್ಮಲ್‌ 14; ಟ್ರೆಂಟ್‌ ಬೌಲ್ಟ್‌ 17ಕ್ಕೆ2, ಟಿಮ್‌ ಸೌಥಿ 15ಕ್ಕೆ2, ಅಜಾಜ್‌ ಪಟೇಲ್‌ 31ಕ್ಕೆ2, ಕಾಲಿನ್‌ ಡಿ ಗ್ರ್ಯಾಂಡ್‌ಹೋಮ್‌ 8ಕ್ಕೆ1, ವಿಲಿಯಮ್‌ ಸೋಮರ್‌ವಿಲ್‌ 49ಕ್ಕೆ2).

ಫಲಿತಾಂಶ: ನ್ಯೂಜಿಲೆಂಡ್‌ಗೆ ಇನಿಂಗ್ಸ್‌ ಮತ್ತು 65ರನ್‌ ಗೆಲುವು.