ಮೆಲ್ಬರ್ನ್: ಒಪ್ಪಂದಕ್ಕೆ ಸಂಬಂಧಿಸಿದ ಹಣ ಪಾವತಿಸಿಲ್ಲ ಎಂದು ಆರೋಪಿಸಿ ಹಿರಿಯ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಆಸ್ಟ್ರೇಲಿಯಾದ ಬ್ಯಾಟ್ ತಯಾರಿಕಾ ಕಂಪನಿಯ ವಿರುದ್ಧ ದೂರು ದಾಖಲಿಸಿದ್ದಾರೆ.
ಕಂಪನಿ ತಯಾರಿಸುವ ಬ್ಯಾಟ್‌ಗಳ ಮೇಲೆ ತಮ್ಮ ಹೆಸರು ಮತ್ತು ಚಿತ್ರ ಹಾಕಿದ್ದಕ್ಕಾಗಿ ನೀಡಬೇಕಾದ ₹ 21 ಕೋಟಿ ಮೊತ್ತವನ್ನು ತಮಗೆ ಪಾವತಿಸಿಲ್ಲ ಎಂದು ಸಚಿನ್ ದೂರಿದ್ದಾರೆ. ಸಿಡ್ನಿ ಮೂಲದ ಸ್ಪಾರ್ಟನ್‌ ಸ್ಪೋರ್ಟ್ಸ್ ಕಂಪನಿ 2016ರಲ್ಲಿ ಒಪ್ಪಂದವನ್ನು ಮಾಡಿಕೊಂಡಿತ್ತು ಎಂದು ವರದಿಯಾಗಿದೆ. ಭಾರತೀಯ ಉದ್ಯಮಿ ಕುನಾಲ್‌ ಶರ್ಮ ಈ ಕಂಪನಿಯ ಸಹ ಸ್ಥಾಪಕರಾಗಿದ್ದರು.
ಕಂಪನಿಯಲ್ಲಿ ಹೂಡಿಕೆ ಮಾಡಿದ್ದರ ಜೊತೆಗೆ ಸಲಹಾ ಸಮಿತಿ ಸದಸ್ಯರಾಗಿದ್ದ ತೆಂಡೂಲ್ಕರ್, ತಮಗೆ ಕೋಟಿಗಟ್ಟಲೆ ಹಣ ಬಾಕಿಯಿರಿಸಿದ ಕಾರಣಕ್ಕೆ ಕಳೆದ ವರ್ಷದ ಸೆಪ್ಟೆಂಬರ್‌ನಲ್ಲಿ ಕಂಪನಿಯನ್ನು ತೊರೆದಿದ್ದರು. ಅವರು ಎಷ್ಟು ಪರಿಹಾರ ಕೇಳಿದ್ದಾರೆ ಎಂಬುದು ಗೊತ್ತಾಗಿಲ್ಲ.
