ಅಗ್ರಸ್ಥಾನದ ಮೇಲೆ ಆತಿಥೇಯರ ಕಣ್ಣು

7

ಅಗ್ರಸ್ಥಾನದ ಮೇಲೆ ಆತಿಥೇಯರ ಕಣ್ಣು

Published:
Updated:
ರಷ್ಯಾದ ಗೋಲ್ ಕೀಪರ್‌ ವ್ಲಾದಿಮಿರ್ ಗಬುಲೊವ್‌ ಸಮಾರ ಅರೆನಾದಲ್ಲಿ ಭಾನುವಾರ ಅಭ್ಯಾಸ ನಡೆಸಿದರು ಎಎಫ್‌ಪಿ ಚಿತ್ರ

ಸಮಾರ : ಮೊದಲ ಎರಡೂ ಪಂದ್ಯಗಳನ್ನು ಗೆದ್ದು 16ರ ಘಟ್ಟ ತಲುಪಿರುವ ಆತಿಥೇಯ ರಷ್ಯಾ ಮತ್ತು ಮಾಜಿ ಚಾಂಪಿಯನ್ ಉರುಗ್ವೆ ತಂಡಗಳು ವಿಶ್ವಕಪ್‌ ಟೂರ್ನಿಯಲ್ಲಿ ‘ಎ’ ಗುಂಪಿನ ಅಗ್ರಸ್ಥಾನದ ಮೇಲೆ ಕಣ್ಣಿಟ್ಟಿವೆ.

ಉಭಯ ತಂಡಗಳು ಗುಂಪು ಹಂತದ ಮೂರನೇ ಮತ್ತು ಅಂತಿಮ ಹಣಾಹಣಿಯಲ್ಲಿ ಸೋಮವಾರ ಮುಖಾಮುಖಿಯಾಗಲಿದ್ದು ‘ಗುಂಪು ಹಂತದ ವಿಜೇತ’ ತಂಡದ ಪಟ್ಟಕ್ಕಾಗಿ ಪ್ರಯತ್ನಿಸಲಿವೆ. ಈ ಪಟ್ಟಕ್ಕಾಗಿ ಉರುಗ್ವೆಗೆ ಕೊನೆಯ ಪಂದ್ಯದಲ್ಲಿ ಜಯ ಅನಿವಾರ್ಯವಾಗಿದೆ. ರಷ್ಯಾಗೆ ಕನಿಷ್ಠ ಡ್ರಾ ಸಾಧಿಸಿದರೂ ಸಾಕು.

ಟೂರ್ನಿಯಲ್ಲಿ ಉರುಗ್ವೆ ಇನ್ನೂ ಒಂದು ಗೋಲನ್ನು ಬಿಟ್ಟುಕೊಟ್ಟಿಲ್ಲ. ಈಜಿಪ್ಟ್ ಎದುರು ಮತ್ತು ಸೌದಿ ಅರೇಬಿಯಾ ಎದುರು 1–0 ಗೋಲಿನ ಅಂತರದಲ್ಲಿ ಗೆದ್ದಿದೆ. ಆದರೆ ರಷ್ಯಾ ಒಟ್ಟು ಎಂಟು ಗೋಲುಗಳನ್ನು ಗಳಿಸಿದ್ದು ಒಂದು ಗೋಲು ಬಿಟ್ಟುಕೊಟ್ಟಿದೆ. ಮೊದಲ ಪಂದ್ಯದಲ್ಲಿ ಸೌದಿ ಅರೇಬಿಯಾವನ್ನು 5–0ಯಿಂದ ಸೋಲಿಸಿದ ಆತಿಥೇಯರು ಈಜಿಪ್ಟ್ ವಿರುದ್ಧ 3–1ರಿಂದ ಗೆದ್ದಿತ್ತು.

ಆದರೆ ಸೋಮವಾರದ ಪಂದ್ಯದಲ್ಲಿ ರಷ್ಯಾ ಗೆಲುವಿಗಾಗಿ ಭಾರಿ ಪೈಪೋಟಿ ನಡೆಸಬೇಕಾದ ಅಗತ್ಯವಿದೆ. ರಕ್ಷಣೆ ಮತ್ತು ಫಾರ್ವರ್ಡ್ ವಿಭಾಗಗಳೆರಡರಲ್ಲೂ ಬಲಿಷ್ಠವಾಗಿರುವ ಉರುಗ್ವೆಯನ್ನು ಈ ತಂಡ ಲಘುವಾಗಿ ಪರಿಗಣಿಸುವಂತಿಲ್ಲ. ಲೂಯಿಸ್ ಸ್ವಾರೆಜ್‌ ಮತ್ತು ಎಡಿನ್ಸನ್ ಕವಾನಿ ಅವರಂಥ ಆಟಗಾರರನ್ನು ಕಟ್ಟಿ ಹಾಕಬೇಕಾದರೆ ರಷ್ಯಾ ವಿಶೇಷ ರಣತಂತ್ರ ಹೂಡಬೇಕಾದೀತು.

ತವರಿನ ಅಭಿಮಾನಿಗಳ ಮುಂದೆ ಕಣಕ್ಕೆ ಇಳಿಯುವ ರಷ್ಯಾ ಕೂಡ ಈಗ ಬಲಿಷ್ಠ ತಂಡವಾಗಿದೆ. ಹೀಗಾಗಿ ಉರುಗ್ವೆ ತಂಡದ ಕೋಚ್‌ ಆಸ್ಕರ್ ತಬರೇಜ್‌ ಕೆಲವು ಬದಲಾವಣೆಗಳೊಂದಿಗೆ ತಂಡವನ್ನು ಕಣಕ್ಕೆ ಇಳಿಸುವ ಸಾಧ್ಯತೆ ಇದೆ. ಪ್ರತಿಭಾವಂತ ಆಟಗಾರರು ಸಾಕಷ್ಟು ಇರುವುದರಿಂದ ಬದಲಾವಣೆ ಮಾಡುವುದು ತಬರೇಜ್ ಅವರಿಗೆ ಸವಾಲಾಗಲಾರದು.

ರಷ್ಯಾ ತಂಡದಲ್ಲಿ ಬದಲಾವಣೆ ಖಚಿತ
ಪ್ರಿ ಕ್ವಾರ್ಟರ್ ಫೈನಲ್ ಪಂದ್ಯಕ್ಕೆ ಸಜ್ಜಾಗುತ್ತಿರುವ ರಷ್ಯಾ ಕೂಡ ಈ ಪಂದ್ಯಕ್ಕಾಗಿ ತಂಡದಲ್ಲಿ ಬದಲಾವಣೆಗಳನ್ನು ಮಾಡುವುದು ಖಚಿತ. ಈ ವರೆಗೆ ಆಡಲು ಅವಕಾಶ ಸಿಗದ ಕೆಲವರನ್ನಾದರೂ ಸೋಮವಾರ ಕಣಕ್ಕೆ ಇಳಿಸುವ ಸಾಧ್ಯತೆ ಇದೆ. ಹಿಮ್ಮಡಿ ನೋವಿನಿಂದ ಬಳಲುತ್ತಿರುವ ಯೂರಿ ಜಿರ್ಕೊವ್‌ ಅವರು ಬೆಂಚು ಕಾಯುವುದು ಖಚಿತವಾಗಿದೆ.

ಉರುಗ್ವೆ ತಂಡದಲ್ಲಿ ಲೂಕಾಸ್‌ ಟೊರೇರ ಮತ್ತು ರಷ್ಯಾ ಬಳಗದಲ್ಲಿ ಅಲೆಕ್ಸಾಂಡರ್ ಗೊಲೊವಿನ್‌ ಅವರು ಸೋಮವಾರ ಮಿಂಚುವ ಭರವಸೆ ಇದೆ. ಹೀಗಾಗಿ ಫುಟ್‌ಬಾಲ್ ಅಭಿಮಾನಿಗಳ ಗಮನ ಈಗ ಅವರತ್ತ ನೆಟ್ಟಿದೆ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !