ಪುರುಷರ 100 ಮೀಟರ್‌ ಓಟ: ಫೋಟೊ ಫಿನಿಷ್‌ನಲ್ಲಿ ಗೆದ್ದ ಲೈಲ್ಸ್‌ ವೇಗದ ರಾಜ

ಅತ್ಯಂತ ನಿಕಟ ಪೈಪೋಟಿ ಕಂಡ ಸ್ಪರ್ಧೆ ಇದಾಗಿತ್ತು. 9.79 ಸೆಕೆಂಡುಗಳಲ್ಲಿ ಗುರಿ ಮುಟ್ಟಿದ ಲೈಲ್ಸ್‌ ತಮ್ಮ ಪ್ರತಿಸ್ಪರ್ಧಿ ಜಮೈಕಾದ ಕಿಶಾನೆ ಥಾಮ್ಸನ್‌ ಎದುರು ಅಕ್ಷರಶಃ ಕೂದಲೆಳೆ  (0.005 ಸೆಕೆಂಡು) ಅಂತರದಲ್ಲಿ ಗೆದ್ದರು.  ಇದೇ ಸ್ಪರ್ಧೆಯಲ್ಲಿ ಅಪರೂಪದ ದಾಖಲೆಯೂ ನಿರ್ಮಾಣವಾಯಿತು. ಫೈನಲ್‌ನಲ್ಲಿ ಸ್ಪರ್ಧಿಸಿದ್ದ ಎಲ್ಲ ಎಂಟು ಅಥ್ಲೀಟ್‌ಗಳೂ 10 ಸೆಕೆಂಡುಗಳಿಗಿಂತ ಕಡಿಮೆ ಅವಧಿಯಲ್ಲಿ ಗೆಲುವಿನ ಗುರಿ ಮೆಟ್ಟಿದರು. ಇದರಿಂದಾಗಿ ಸ್ಪರ್ಧೆಯ ಮೊದಲ ಮೂವರು ವಿಜೇತರನ್ನು ನಿರ್ಧರಿಸಲು ತೀರ್ಪುಗಾರರು ವಿಡಿಯೊ ದಾಖಲೆಗಳ ಮೊರೆ ಹೋಗಬೇಕಾಯಿತು. 

ಅದರಲ್ಲಿ ಜಮೈಕಾದ ಥಾಮ್ಸನ್ ಕೂಡ 9.79 ಸೆಕೆಂಡುಗಳಲ್ಲಿ ಓಡಿದ್ದರು. ಆದರೆ ಲೈಲ್ಸ್ ಮತ್ತು ಥಾಮ್ಸನ್ ನಡುವೆ 0.005ರಷ್ಟು ಸೂಕ್ಷ್ಮ ಅಂತರವನ್ನು ಗಮನಿಸಲಾಯಿತು. ರೌಂಡೆಡ್ ಅ‍ಪ್ ಟೈಮ್‌ನಲ್ಲಿ ಲೈಲ್ಸ್‌ (.784) ಪ್ರಥಮ ಸ್ಥಾನ ಪಡೆದರೆ, ಕಿಶಾನೆ (.789) ಬೆಳ್ಳಿ ಹಾಗೂ ಅಮೆರಿಕದ ಫ್ರೆಡ್ ಕೆರ್ಲೆ ಕಂಚಿನ ಪದಕ ಜಯಿಸಿದರು. 

ಇದರೊಂದಿಗೆ 2004ರ ನಂತರ ಒಲಿಂಪಿಕ್ಸ್‌ನಲ್ಲಿ ಚಿನ್ನ ಜಯಿಸಿದ ಅಮೆರಿಕದ ಅಥ್ಲೀಟ್ ಎಂಬ ಹೆಗ್ಗಳಿಕೆಯು ಲೈಲ್ಸ್‌ ಅವರದ್ದಾಯಿತು. ಅವರು 200 ಮೀ ಓಟದಲ್ಲಿ ಸ್ಪರ್ಧಿಸಲಿದ್ದಾರೆ.