‘ದೇಸಿ ಜಾವೆಲಿನ್’ ಎಸೆಯಲು ಗೋಧಿ ಹೊಲಗಳನ್ನೇ ಆಶ್ರಯಿಸಿದ್ದ ‘ಚಿನ್ನದ ಹುಡುಗ’

ಎಂಟು ಮಕ್ಕಳಲ್ಲಿ ನದೀಮ್‌ ಮೂರನೆಯವರು. ಮನೆಯಲ್ಲೇ ತಯಾರು ಮಾಡಿದ್ದ ‘ದೇಸಿ ಜಾವೆಲಿನ್’  ಎಸೆಯಲು ಗೋಧಿ ಹೊಲಗಳನ್ನೇ ಆಶ್ರಯಿಸಿದ್ದರು. ಅವರ ಒಲಿಂಪಿಕ್ಸ್‌ ಕನಸು ಚಿಗುರೊಡೆದಿದ್ದು ಇದೇ ಹಳ್ಳಿಯಲ್ಲಿ.

ರಾಜಧಾನಿಯಿಂದ ದೂರದ ಗ್ರಾಮಗಳ ರೀತಿ ಇಲ್ಲೂ ಕುಡಿಯುವ ನೀರಿಗೆ ಸಮರ್ಪಕ ವ್ಯವಸ್ಥೆಯಿಲ್ಲ. ವಿದ್ಯುತ್‌ ಸಂಪರ್ಕವೂ ಅಷ್ಟಕ್ಕಷ್ಟೇ. ಕ್ರೀಡಾ ಸೌಲಭ್ಯಗಳ ಮಾತಂತೂ ದೂರ.

ಕಳೆದ ಗುರುವಾರ ತಡರಾತ್ರಿ ನದೀಮ್‌ ಚಿನ್ನ ಗೆದ್ದಾಗ ಇದೇ ಗ್ರಾಮದಲ್ಲಿ ಸಂಭ್ರಮ ಮುಗಿಲುಮುಟ್ಟಿತ್ತು. ಈ ಹಳ್ಳಿಯ ಹುಡುಗ ದೂರದ ಪ್ಯಾರಿಸ್‌ನಲ್ಲಿ, ಫೆವರೀಟ್‌ ಆಗಿದ್ದ ನೀರಜ್‌ ಚೋಪ್ರಾ ಅವರನ್ನು ಎರಡನೇ ಸ್ಥಾನಕ್ಕೆ ಸರಿಸಿದ್ದರು. ಅದೂ ದಾಖಲೆಯೊಡನೆ.

‘ಅಂದು ರಾತ್ರಿ ನಾವು ನಿದ್ದೆ ಮಾಡಲಿಲ್ಲ. ಇಡೀ ದಿನ ಬಂಧುಗಳು, ಮಾಧ್ಯಮದವರು, ಸ್ನೇಹಿತರು, ಅಭಿಮಾನಿಗಳು ಅಭಿನಂದಿಸುತ್ತಲೇ ಇದ್ದರು. ಖುದ್ದಾಗಿ ಬಂದವರೂ ಇದ್ದರು’ ಎಂದು ಅವರ ದೊಡ್ಡ ಅಣ್ಣ ಶಹೀದ್‌ ನದೀಮ್‌ ಶುಕ್ರವಾರ ತಿಳಿಸಿದರು.

‌‘ಸುತ್ತಮುತ್ತಲಿನ ಗ್ರಾಮಸ್ಥರು ಇಲ್ಲಿಗೇ ಬಂದು ಫೈನಲ್ ನೋಡಿದ್ದರು. ನಾವು ದೊಡ್ಡ ಪರದೆಯ ವ್ಯವಸ್ಥೆ ಮಾಡಿದ್ದೆವು. ಅವರು ಕುಣಿದು ಕುಪ್ಪಳಿಸಿ, ಪಟಾಕಿ ಸಿಡಿಸಿ ಸಂಭ್ರಮಪಟ್ಟರು’ ಎಂದು ಅವರು ಹೆಮ್ಮೆಪಟ್ಟರು.

ನದೀಮ್ ಗೆದ್ದ ಪದಕ, ಪಾಕಿಸ್ತಾನಕ್ಕೆ 1992ರ ಬಾರ್ಸಿಲೋನಾ ಕ್ರೀಡೆಗಳ ನಂತರ ಮೊದಲನೆಯದು. 1984ರ ಲಾಸ್‌ ಏಂಜಲೀಸ್‌ ಕ್ರೀಡೆಗಳ ನಂತರ ಮೊದಲ ಚಿನ್ನ. ‘ಇದು ದೇಶದ ಸ್ವಾತಂತ್ರ್ಯೋತ್ಸವಕ್ಕೆ ನನ್ನ ಕಾಣಿಕೆ’ ಎಂದು ನದೀಮ್‌ ಎಕ್ಸ್‌ನಲ್ಲಿ ಪೋಸ್ಟ್‌ ಹಾಕಿದ್ದರು. 27 ವರ್ಷದ ನದೀಮ್‌ ಎರಡು ಮಕ್ಕಳ ತಂದೆ.

‘ನಾವು ನೀಲಗಿರಿ ಕಾಂಡದಿಂದ ಜಾವೆಲಿನ್ ತಯಾರಿಸಿ, ಅದರ ತುದಿಗೆ ತಗಡನ್ನು ಹೊದಿಸುತ್ತಿದ್ದೆವು. ಗೋಧಿ ಹೊಲಗಳು ನಮಗೆ ತರಬೇತಿಯ ತಾಣವಾಗಿದ್ದವು’ ಎಂದು ಶಹೀದ್‌ ಕಳೆದುಹೋದ ದಿನಗಳನ್ನು ನೆನಪಿಸಿದರು.

‘ನಾವು ದೇಸಿ ರೀತಿಯಲ್ಲಿ ತೂಕ ನಿರ್ವಹಣೆ ತರಬೇತಿ ನಡೆಸುತ್ತಿದ್ದೆವು. ಕಬ್ಬಿಣದ ಸಲಾಕೆ, ಸಿಮೆಂಟ್‌ ತುಂಬಿದ ಎಣ್ಣೆ ಡಬ್ಬ, ಗಟ್ಟಿ ಕಾಂಕ್ರಿಟ್‌ – ಇವೆಲ್ಲವೂ ನಮಗೆ ಜಿಮ್‌ ಪರಿಕರಗಳಾಗಿದ್ದವು’ ಎಂದರು.

ನದೀಮ್ ಅವರು ಪಾಕಿಸ್ತಾನ ನೀರು ಮತ್ತು ಇಂಧನ ಅಭಿವೃದ್ಧಿ ಪ್ರಾಧಿಕಾರಕ್ಕೆ ಸೇರಿದ ಮೇಲೆ ಅವರಿಗೆ ಕ್ರೀಡಾ ಸೌಲಭ್ಯಗಳು ದೊರೆತವು ಎಂದು ಅವರು ಹೇಳಿದರು.

ಕೆಲವೇ ತಿಂಗಳ ಹಿಂದಿನವರೆಗೆ ಅವರು ಕಡಿಮೆ ದರ್ಜೆಯ, ಸವಕಲಾದ ಜಾವೆಲಿನ್ ಬಳಸುತ್ತಿದ್ದರು. ಪ್ಯಾರಿಸ್‌ಗೆ ಹೋಗುವ ಕೆಲವೇ ತಿಂಗಳ ಹಿಂದೆ ಕೊನೆಯ ಕ್ಷಣದ ಮನವಿಗೆ ಸರ್ಕಾರ ಸ್ಪಂದಿಸಿತು ಎಂದು ಅವರ ತಾಯಿ ರಝಿಯಾ ಪರ್ವೀನ್‌ ‘ರಾಯಿಟರ್ಸ್‌’ಗೆ ತಿಳಿಸಿದರು.

‘ಸರ್ಕಾರ ಜಾವೆಲಿನ್‌ಗಳಿಗೆ ಮತ್ತು ಇತರ ಸೌಲಭ್ಯಗಳಿಗೆ ಪ್ರಾಯೋಜಕತ್ವ ನೀಡಿತು. ಅವನು ದಕ್ಷಿಣ ಆಫ್ರಿಕಾಕ್ಕೆ ಹೋಗಿ ಅಂತರರಾಷ್ಟ್ರೀಯ ದರ್ಜೆಯ ಮೂರು ಜಾವೆಲಿನ್‌ಗಳನ್ನು ಕೊಂಡು ತಂದ’ ಎಂದು ಅವರು ತಿಳಿಸಿದರು.