ಭುವನೇಶ್ವರ: ಯಮಸಾಕಿ ಕೋಜಿ ಗಳಿಸಿದ ಎರಡು ಸೊಗಸಾದ ಗೋಲುಗಳ ಬಲದಿಂದ ಜಪಾನ್‌ ತಂಡವು ಐಎಚ್‌ಎಫ್‌ ಸಿರೀಸ್‌ ಹಾಕಿ ಕ್ರಾಸ್‌ ಒವರ್‌ ಪಂದ್ಯದಲ್ಲಿ ಪೋಲೆಂಡ್‌ ತಂಡವನ್ನು 6–2 ಗೋಲುಗಳಿಂದ ಸೋಲಿಸಿ ಸೆಮಿಫೈನಲ್‌ ತಲುಪಿತು.
ಜಪಾನ್‌ ಶುಕ್ರವಾರ ನಡೆಯುವ ಸೆಮಿಫೈನಲ್‌ನಲ್ಲಿ ಆತಿಥೇಯ ಭಾರತ ವಿರುದ್ಧ ಆಡಲಿದೆ. ದಕ್ಷಿಣ ಆಫ್ರಿಕಾ, ಇನ್ನೊಂದು ಸೆಮಿಫೈನಲ್‌ನಲ್ಲಿ ಅಮೆರಿಕ ವಿರುದ್ಧ ಆಡಲಿದೆ.
ದಕ್ಷಿಣ ಆಫ್ರಿಕಾ ಇನ್ನೊಂದು ಪಂದ್ಯದಲ್ಲಿ ರಷ್ಯಾ ತಂಡವನ್ನು 2–1 ಗೋಲುಗಳಿಂದ ಮಣಿಸಿತು.
ಜಪಾನ್‌ ತಂಡದ ಪರ ಕೋಜಿ (36, 60ನೇ ನಿಮಿಷ), ಯಮಾದಾ ಶೋಟಾ (20ನೇ ನಿಮಿಷ), ಜೆಂಡಾನಾ ಹೀರೊಟಕಾ (23ನೇ ನಿಮಿಷ), ತಾನಕ ಕೆಂಟಾ (34ನೇ ನಿಮಿಷ), ಕಿಟಜಾಟೊ ಕೆಂಜಿ (47ನೇ ನಿಮಿಷ) ಗೋಲು ದಾಖಲಿಸಿದರು. ಗಮ್ನಿ ಮಿಕೋಲಾಜ್‌ (7ನೇ ನಿಮಿಷ) ಹಾಗೂ ಹುಲ್‌ಬೋಜ್‌ ಮೆಟಿಯುಸ್‌ ಅವರು ಪರಾಜಿತ ಪೋಲೆಂಡ್‌ ತಂಡದ ಪರ ಗೋಲು ಬಾರಿಸಿದರು.
ಏರಿದ ತಾಪಮಾನ: ಉರಿಬಿಸಿಲಿನಲ್ಲಿ ನಡೆದ ಪಂದ್ಯದಲ್ಲಿ ಮೆಕ್ಸಿಕೊ 4–3 ಗೋಲುಗಳಿಂದ ಉಜ್ಬೆಕಿಸ್ತಾನ ತಂಡವನ್ನು ಸೋಲಿಸಿ ಟೂರ್ನಿಯಲ್ಲಿ ಏಳನೇ ಸ್ಥಾನ ಪಡೆಯಿತು.
ಧಗೆ ಹೆಚ್ಚು ಇದ್ದ ಕಾರಣ ಪ್ರತಿ ಕ್ವಾರ್ಟರ್‌ಗಳ ನಡುವೆ ವಿರಾಮದ ಅವಧಿಯನ್ನು ಸ್ವಲ್ಪ ವಿಸ್ತರಿಸಲಾಯಿತು. ನಿಗದಿತ ಎರಡು ನಿಮಿಷಗಳ ವಿಶ್ರಾಂತಿಯನ್ನು ನಾಲ್ಕು ನಿಮಿಷಗಳಿಗೆ ಹೆಚ್ಚಿಸಲಾಯಿತು.
ಉತ್ತರಾರ್ಧದಲ್ಲಿ ಬಿಸಿಲಿನ ಬೇಗೆ ತೀವ್ರವಾಗಿದ್ದು, ನಾಲ್ಕು ಕ್ವಾರ್ಟರ್‌ನಂತೆ ನಡೆಯಿತು.
ಮೂರು ಮತ್ತು ನಾಲ್ಕನೇ ಕ್ವಾರ್ಟರ್‌ನಲ್ಲಿ ಏಳೂವರೆ ನಿಮಿಷಗಳ ನಂತರ ಆಟಗಾರರು ಮತ್ತು ಅಂಪೈರ್‌ಗಳಿಗೆ ನೀರು ಕುಡಿಯಲು ಒಂದು ನಿಮಿಷದ ಬ್ರೇಕ್‌ ನೀಡಲಾಯಿತು. ಈ ಟೂರ್ನಿಯಲ್ಲಿ ಇದೇ ಮೊದಲ ಬಾರಿ ತಾಪಮಾನ ಪಂದ್ಯದ ಮೇಲೆ ಇಷ್ಟೊಂದು ಪರಿಣಾಮ ಬೀರಿದೆ.
ಟೂರ್ನಿಯಲ್ಲಿ ಈ ಎರಡು ತಂಡಗಳು ಕೆಳಕ್ರಮಾಂಕದಲ್ಲಿದ್ದು, ಮೆಕ್ಸಿಕೊ 39ನೇ ಸ್ಥಾನದಲ್ಲಿದ್ದರೆ, ಉಜ್ಬೇಕ್‌ ತಂಡ 43ನೇ ಸ್ಥಾನದಲ್ಲಿದೆ. ಉಜ್ಬೇಕಿಸ್ತಾನ ಒಂದೂ ಪಾಯಿಂಟ್‌ ಪಡೆಯಲಾಗದೇ ಎಂಟನೇ ಹಾಗೂ ಕೊನೆಯ ಸ್ಥಾನಕ್ಕೆ ಸರಿಯಿತು.
ತಾಪಮಾನ 40 ಡಿಗ್ರಿಗಿಂತ ಹೆಚ್ಚು ಇದ್ದು, ಬಿಸಿಗಾಳಿಯ ಕಾರಣ ಶುಕ್ರವಾರದ ಸೆಮಿಫೈನಲ್‌ ಪಂದ್ಯಗಳನ್ನು ಬೆಳಿಗ್ಗೆ 8.45ರ ಬದಲು 8 ಗಂಟೆಗೆನಡೆಸಲಾಗುವುದು ಎಂದು ಇಂಟರ್‌ನ್ಯಾಷನಲ್‌ ಹಾಕಿ ಫೆಡರೇಷನ್ (ಎಫ್‌ಐಎಚ್‌) ತಿಳಿಸಿತು.
ಇಲ್ಲಿನ ಉರಿಬಿಸಿಲನ್ನು ಗಮನದಲ್ಲಿಟ್ಟುಕೊಂಡು ವ್ಯವಸ್ಥಾಪಕರು ಬೆಳಗಿನ ಪಂದ್ಯವನ್ನು 8.45ಕ್ಕೆ, ಸಂಜೆಯ ಪಂದ್ಯಗಳನ್ನು 5 ಮತ್ತು 7 ಗಂಟೆಗೆ ನಿಗದಿಗೊಳಿಸಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.