ಸಮಸ್ಯೆಗಳ ‘ಸುತ್ತು’; ಕ್ರೀಡಾಪಟುಗಳು ಸುಸ್ತು

7

ಸಮಸ್ಯೆಗಳ ‘ಸುತ್ತು’; ಕ್ರೀಡಾಪಟುಗಳು ಸುಸ್ತು

Published:
Updated:
Deccan Herald

ಆಸ್ಟ್ರೇಲಿಯಾದ ಗೋಲ್ಡ್‌ಕೋಸ್ಟ್‌ನಲ್ಲಿ ನಡೆದಿದ್ದ ಕಾಮನ್‌ವೆಲ್ತ್ ಕ್ರೀಡಾಕೂಟಕ್ಕೆ ಕೆಲವು ದಿನಗಳು ಬಾಕಿ ಇದ್ದಾಗ ಭಾರತದ ಕುಸ್ತಿಪಟುಗಳಾದ ಸುಶೀಲ್ ಕುಮಾರ್‌ ಮತ್ತು ಪ್ರವೀಣ್‌ ರಾಣ ಸುದ್ದಿಯಾದರು. ಆಯ್ಕೆ ಪ್ರಕ್ರಿಯೆಯ ಸಂದರ್ಭದಲ್ಲಿ ಇವರಿಬ್ಬರ ಬೆಂಬಲಿಗರು ಪರಸ್ಪರ ಹೊಡೆದಾಡಿಕೊಂಡಿದ್ದರು. ಕೊನೆಗೂ ಸುಶೀಲ್ ಕೂಟಕ್ಕೆ ಆಯ್ಕೆಯಾದರು; ಪದಕವನ್ನೂ ಗೆದ್ದರು.

ಇದಾಗಿ ಮೂರು ತಿಂಗಳ ನಂತರ ಈಗ ಏಷ್ಯನ್ ಕ್ರೀಡಾ ಕೂಟಕ್ಕೆ ಸಿದ್ಧತೆ ನಡೆಯುತ್ತಿದ್ದಾಗಲೂ ಪೈಲ್ವಾನರು ಅಖಾಡದಿಂದ ಆಚೆ ‘ಕುಸ್ತಿ’ ಆಡಿ ಸುದ್ದಿಯಾದರು. ಪುರುಷರ 57 ಕೆ.ಜಿ ಫ್ರೀಸ್ಟೈಲ್ ವಿಭಾಗದಲ್ಲಿ ಸಂದೀಪ್‌ ತೋಮರ್‌ ಅವರನ್ನು ಆಯ್ಕೆ ಮಾಡಿದ್ದಕ್ಕಾಗಿ ಉತ್ಕರ್ಷ್ ಕಾಳೆ ತಕರಾರು ಎತ್ತಿದ್ದರು. ರೆಫರಿ ಜೊತೆ ವಾಗ್ವಾದ ನಡೆಸಿದರು. ಹೀಗಾಗಿ ಸ್ಪರ್ಧೆಯ ವಿಡಿಯೊವನ್ನು ಪರಿಶೀಲಿಸಲಾಯಿತು. ಫಲಿತಾಂಶ ತಡೆ ಹಿಡಿದ ಕುಸ್ತಿ ಫೆಡರೇಷನ್ ನಂತರ ಮರು ಸ್ಪರ್ಧೆ ನಡೆಸಲು ನಿರ್ಧರಿಸಿತು. ಕೊನೆಗೂ ಸಂದೀಪ್ ಅವರನ್ನು ಪಟ್ಟಿಯಲ್ಲಿ ಸೇರಿಸಲಾಯಿತು.

ಮಹತ್ವದ ಕ್ರೀಡಾಕೂಟಗಳಿಗೆ ಸಜ್ಜಾಗುವ ಸಂದರ್ಭದಲ್ಲಿ ಭಾರತದಲ್ಲಿ ಅಭ್ಯಾಸಕ್ಕಿಂತ ಇಂಥ ವಿವಾದಗಳೇ ಹೆಚ್ಚು ಗಮನ ಸೆಳೆಯುತ್ತವೆ. ಈ ಬಾರಿ ಏಷ್ಯನ್ ಕ್ರೀಡಾಕೂಟಕ್ಕೆ ಸಜ್ಜಾಗುವ ಕ್ರೀಡಾಪಟುಗಳು ಕೂಡ ವಿವಿಧ ಸಮಸ್ಯೆ, ವಿವಾದಗಳ ಸುತ್ತ ಸಿಲುಕಿ ಸುಸ್ತಾಗಿದ್ದಾರೆ.

ಕೋಚ್‌ ಇಲ್ಲದ ಸ್ಕ್ವಾಷ್ ತಂಡ, ಉತ್ತಮ ಸಾಮರ್ಥ್ಯ ತೋರಿದರೂ ಅರ್ಹತೆ ಗಳಿಸದ ಫುಟ್‌ಬಾಲ್‌ ತಂಡ, ಅಂತಿಮವಾಗದ ಅಥ್ಲೀಟ್‌ಗಳ ಪಟ್ಟಿ, ಅಂತಿಮ ಹಂತದಲ್ಲಿ ಹೆಚ್ಚುವರಿಯಾಗಿ ಸೇರ್ಪಡೆಯಾದ ಕ್ರೀಡಾಪಟುಗಳು, ಉದ್ದೀಪನ ಮದ್ದು ಸೇವನೆ ಆರೋಪಕ್ಕೆ ಸಿಲುಕಿದ ಸ್ಟೀಪಲ್‌ ಚೇಸ್ ಪಟು...ಹೀಗೆ ಸಾಗುತ್ತದೆ ಭಾರತದ ಕ್ರೀಡಾಕ್ಷೇತ್ರದ ‘ಮಹಿಮೆ’.

ಏಷ್ಯನ್‌ ಕ್ರೀಡಾಕೂಟ ಆರಂಭವಾಗಲು 12 ದಿನಗಳು ಬಾಕಿ ಇರುವಾಗ ಭಾರತ ಒಲಿಂಪಿಕ್ಸ್ ಸಂಸ್ಥೆ 34 ಮಂದಿ ಹೆಚ್ಚುವರಿ ಕ್ರೀಡಾಪಟುಗಳನ್ನು ಪಟ್ಟಿಗೆ ಸೇರಿಸಿತು. ಈ ಮೂಲಕ ಕೂಟದಲ್ಲಿ ಪಾಲ್ಗೊಳ್ಳುವವರ ಒಟ್ಟು ಸಂಖ್ಯೆ 575 ಆಯಿತು.

ಕೇಂದ್ರ ಕ್ರೀಡಾ ಸಚಿವಾಲಯಕ್ಕೆ ಆರಂಭದಲ್ಲಿ ಕಳುಹಿಸಿದ್ದ ಪಟ್ಟಿಯಲ್ಲಿ 541 ಮಂದಿ ಇದ್ದರು. ಪಟ್ಟಿ ಅಂತಿಮಗೊಳಿಸಲು ತಡ ಮಾಡಿದ್ದಕ್ಕೆ ಸಚಿವಾಲಯದಿಂದ ಛೀಮಾರಿಗೆ ಒಳಗಾಗಿದ್ದ ಭಾರತ ಒಲಿಂಪಿಕ್‌ ಸಂಸ್ಥೆ ಪರಿಷ್ಕೃತ ಪಟ್ಟಿಯನ್ನು ಬಿಡುಗಡೆ ಮಾಡಿ ಮತ್ತೊಮ್ಮೆ ಮುಜುಗರಕ್ಕೆ ಸಿಲುಕಿತು.

ಭಾರತ ಫುಟ್‌ಬಾಲ್‌ ತಂಡ ಈ ಬಾರಿ ಅಮೋಘ ಆಟ ಆಡಿ ಏಷ್ಯಾದ ಶಕ್ತಿಯಾಗಿ ಬೆಳೆದಿದೆ. ಆದರೂ ಏಷ್ಯನ್ ಕ್ರೀಡಾಕೂಟದಲ್ಲಿ ಪಾಲ್ಗೊಳ್ಳಲು ತಂಡಕ್ಕೆ ಅವಕಾಶ ಸಿಗಲಿಲ್ಲ.

ಏಷ್ಯಾದಲ್ಲಿರುವ ಅಗ್ರ ಎಂಟು ತಂಡಗಳಿಗೆ ಮಾತ್ರ ಕೂಟದಲ್ಲಿ ಪಾಲ್ಗೊಳ್ಳಲು ಅವಕಾಶವಿದೆ ಎಂಬುದು ಅಂತರರಾಷ್ಟ್ರೀಯ ಒಲಿಂಪಿಕ್‌ ಸಂಸ್ಥೆಯ (ಐಒಎ) ನಿಯಮ. ಭಾರತದ ಸ್ಥಾನ ಈಗ 14 ಆಗಿರುವುದರಿಂದ ಕೂಟದಲ್ಲಿ ಆಡಲು ಸಾಧ್ಯವಿಲ್ಲ. ಆದರೂ ಪ್ರಮುಖ ಟೂರ್ನಿಗಳನ್ನು ಗೆದ್ದಿರುವ ಕಾರಣ ತಂಡಕ್ಕೆ ಅವಕಾಶ ನೀಡಬೇಕು ಎಂದು ಅಖಿಲ ಭಾರತ ಫುಟ್‌ಬಾಲ್ ಫೆಡರೇಷನ್‌ ಕೊರಿತ್ತು. ಆದರೆ ಇದಕ್ಕೆ ಐಒಎ ಸೊಪ್ಪು ಹಾಕಲಿಲ್ಲ. ಆದ್ದರಿಂದ ಫುಟ್‌ಬಾಲ್ ಪ್ರಿಯರು ಬೇಸರಗೊಂಡಿದ್ದಾರೆ.

ಉದ್ದೀಪನ ಮದ್ದು ಎಂಬ ರಾಕ್ಷಸ

ಏಷ್ಯನ್ ಕೂಟಕ್ಕೆ ಮುನ್ನ ಉದ್ದೀಪನ ಮದ್ದು ಭಾರತ ಕ್ರೀಡೆಯ ಮೇಲೆ ಕರಿನೆರಳು ಬೀರಿತು. ಸ್ಟೀಪಲ್‌ ಚೇಸ್ ಪಟು ನವೀನ್ ಡಾಗರ್‌ ಗುವಾಹಟಿಯಲ್ಲಿ ನಡೆದಿದ್ದ ಕ್ರೀಡಾಕೂಟದಲ್ಲಿ ಉದ್ದೀಪನ ಮದ್ದು ಸೇವಿಸಿದ್ದರು ಎಂಬುದು ಸಾಬೀತಾದ ಕಾರಣ ಅವರನ್ನು ಭಾರತ ತಂಡದಿಂದ ಕೈಬಿಡಲಾಯಿತು. ಇದು ದೇಶದ ಪದಕದ ಭರವಸೆಯನ್ನು ಚಿವುಟಿ ಹಾಕಿತು.

ಈಜಿಪ್ಟ್‌ನ ಅಚ್ರಫ್‌ ಎಲ್.ಕರರ್ಗುಯಿ ಅವರು ಹುದ್ದೆ ತೊರೆದ ನಂತರ ಸ್ಕ್ವಾಷ್ ತಂಡಕ್ಕೆ ಹೊಸ ಕೋಚ್ ನೇಮಕ ಮಾಡದೇ ಇದ್ದುದರಿಂದ ಏಷ್ಯನ್ ಕೂಟಕ್ಕೆ ತೆರಳುವ ತಂಡದ ಮೇಲೆ ದುಷ್ಪರಿಣಾಮ ಉಂಟಾಗಿತ್ತು. ಪ್ರಮುಖ ಆಟಗಾರರಾದ ಸೌರವ್ ಘೋಷಾಲ್ ಮತ್ತು ಜೋಷ್ನಾ ಚಿಣ್ಣಪ್ಪ ಇಂಗ್ಲೆಂಡ್‌ನಲ್ಲಿ ತರಬೇತಿ ಪಡೆಯುತ್ತಿದ್ದರೆ ದೀಪಿಕಾ ಪಳ್ಳಿಕಲ್‌ಗೆ ಈಜಿಪ್ಟ್‌ನಲ್ಲಿ ಅಚ್ರಫ್‌ ತರಬೇತಿ ನೀಡುತ್ತಿದ್ದಾರೆ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !