ಟೂರ್ನಿಯುದ್ದಕ್ಕೂ ಅಮೋಘ ಆಟವಾಡಿ ಅತಿ ಹೆಚ್ಚು, 9 ಗೋಲುಗಳ ಸಾಧನೆ ಮಾಡಿರುವ ಹರೀಶ್ ಮುತಗಾರ 28ನೇ ನಿಮಿಷದಲ್ಲಿ ಮ್ಯಾಜಿಕ್ ಮಾಡಿದರು. ಪೆನಾಲ್ಟಿ ಕಾರ್ನರ್ ಅವಕಾಶದಲ್ಲಿ ಪ್ರಣಾಮ್ ಗೌಡ ಪುಷ್ ಮಾಡಿದ ಚೆಂಡನ್ನು ಹರೀಶ್ ಮಿಂಚಿನ ವೇಗದಲ್ಲಿ ಪ್ಲಿಕ್ ಮಾಡಿ ಗುರಿ ಮುಟ್ಟಿಸಿದರು. 51ನೇ ನಿಮಿಷದಲ್ಲಿ ಎದುರಾಳಿ ಡಿಫೆಂಡರ್ಗಳಿಗೆ ಚಳ್ಳೆಹಣ್ಣು ತಿನ್ನಿಸಿದ ವಸಂತ ಕುಮಾರ್ ಕೋಕಾವಿ ಮುನ್ನಡೆ ಹೆಚ್ಚಿಸಿದರು. ಎರಡು ಗೋಲುಗಳ ಬಲದಿಂದ ತಂಡ ಕೊನೆಯ ಹಂತದಲ್ಲಿ ಆಕ್ರಮಣವನ್ನು ಇನ್ನಷ್ಟು ಹೆಚ್ಚಿಸಿತು. ಅಂತಿಮ ನಿಮಿಷದಲ್ಲಿ ಮತ್ತೆ ಮಿಂಚಿದ ಹರೀಶ ಗೆಲುವಿನ ಅಂತರವನ್ನು 3–0ಗೆ ಏರಿಸುವಲ್ಲಿ ಯಶಸ್ವಿಯಾದರು.