ಲೈಂಗಿಕ ಕಾರ್ಯಕರ್ತೆಯರನ್ನು ಕರೆದುಕೊಂಡು ಬಂದ ಬ್ಯಾಸ್ಕೆಟ್‌ಬಾಲ್ ಆಟಗಾರರು ವಾಪಸ್‌

5
ಜಪಾನ್‌ ಕ್ರೀಡಾಪಟುಗಳು

ಲೈಂಗಿಕ ಕಾರ್ಯಕರ್ತೆಯರನ್ನು ಕರೆದುಕೊಂಡು ಬಂದ ಬ್ಯಾಸ್ಕೆಟ್‌ಬಾಲ್ ಆಟಗಾರರು ವಾಪಸ್‌

Published:
Updated:

ಜಕಾರ್ತ: ಲೈಂಗಿಕ ಕಾರ್ಯಕರ್ತೆಯರನ್ನು ಕೊಠಡಿಗೆ ಕರೆದುಕೊಂಡು ಬಂದ ಜಪಾನ್‌ನ ನಾಲ್ವರು ಬ್ಯಾಸ್ಕೆಟ್‌ಬಾಲ್ ಆಟಗಾರರನ್ನು ವಾಪಸ್‌ ಕಳುಹಿಸಲಾಗಿದೆ ಎಂದು ಸುದ್ದಿ ಸಂಸ್ಥೆ ‘ಕ್ಯುಡೊ’ ವರದಿ ಮಾಡಿದೆ. ಯೂಯಾ ನಗಯೊಶಿ, ತಕುಯಾ ಹಶಿಮೊಟೊ, ತಕುಮಾ ಸಾಟೊ ಹಾಗೂ ಕಿತಾ ಇಮಾನುರಾ ಅವರು ‘ಶಿಕ್ಷೆ’ಗೆ ಒಳಗಾದವರು.

ಕ್ರೀಡಾಕೂಟ ಅಧಿಕೃತವಾಗಿ ಆರಂಭಗೊಳ್ಳುವುದಕ್ಕೂ ಮೊದಲು, ಕಳೆದ ಗುರುವಾರ ಕತಾರ್‌ ಎದುರು ನಡೆದಿದ್ದ ಪ್ರಾಥಮಿಕ ಸುತ್ತಿನ ಪಂದ್ಯದಲ್ಲಿ ಜಪಾನ್‌ 82–71ರಿಂದ ಗೆದ್ದ ನಂತರ ಈ ಆಟಗಾರರು ತಂಡದ ಜೆರ್ಸಿ ತೊಟ್ಟುಕೊಂಡು ಜಕಾರ್ತದ ಕೆಂಪು ದೀಪದಲ್ಲಿ ಓಡಾಡಿದ್ದಾರೆ. ನಂತರ ಮಧ್ಯವರ್ತಿಯೊಬ್ಬರ ನೆರವಿನಿಂದ ಹೋಟೆಲ್‌ಗೆ ಲೈಂಗಿಕ ಕಾರ್ಯಕರ್ತೆಯರನ್ನು ಕರೆಸಿಕೊಂಡಿದ್ದಾರೆ.

ವಿಷಯ ಸೋಮವಾರ ಬಹಿರಂಗೊಂಡಿದ್ದು ತಕ್ಷಣ ಸ್ವಂತ ಖರ್ಚಿನಲ್ಲಿ ತಾಯ್ನಾಡಿಗೆ ಮರಳುವಂತೆ ಅವರಿಗೆ ಸೂಚನೆ ನೀಡಲಾಗಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಈ ಕುರಿತು ಪ್ರತಿಕ್ರಿಯಿಸಿರುವ ತಂಡದ ಮುಖ್ಯ ಚೆಫ್‌ ಡಿ ಮಿಷನ್‌ ಯಶುಹಿರೊ ಯಮಶಿಟ ‘ಆಟಗಾರರ ವರ್ತನೆ ನಾಚಿಕೆಗೇಡಿನದ್ದು. ಈ ಘಟನೆಗೆ ಜಪಾನ್‌ ಒಲಿಂಪಿಕ್‌ ಸಂಸ್ಥೆ ಮತ್ತು ಜನರಲ್ಲಿ ಕ್ಷಮೆ ಕೋರುತ್ತೇನೆ. ಉಳಿದಿರುವ ಕ್ರೀಡಾಪಟುಗಳಿಗೆ ಸೂಕ್ತ ಮಾರ್ಗದರ್ಶನ ನೀಡಲು ಕ್ರಮ ಕೈಗೊಳ್ಳುತ್ತೇನೆ’ ಎಂದಿದ್ದಾರೆ. 

‘ಜಪಾನ್ ಬ್ಯಾಸ್ಕೆಟ್‌ಬಾಲ್ ಆಟಗಾರರ ಮೇಲೆ ಕೈಗೊಂಡ ಕ್ರಮ ಎಲ್ಲ ಕ್ರೀಡಾಪಟುಗಳಿಗೆ ಪಾಠ ಆಗಬೇಕು. ಕ್ರೀಡಾಪಟುಗಳು ಅಂಗಣದಲ್ಲಿ ಮಾತ್ರವಲ್ಲ, ಸಮಾಜದಲ್ಲೂ ಮಾದರಿಯಾಗಬೇಕು. ಕ್ರೀಡಾಕೂಟಗಳಲ್ಲಿ ಇಂಥ ಪ್ರಕರಣಗಳು ನಡೆಯುತ್ತಿರುವುದು ಬೇಸರದ ವಿಷಯ’ ಎಂದು ಏಷ್ಯಾ ಒಲಿಂಪಿಕ್ ಸಮಿತಿಯ ಅಧ್ಯಕ್ಷ ಶೇಕ್‌ ಅಹಮ್ಮದ್‌ ಅಲ್‌ ಫಹಾದ್‌ ಅಲ್‌ ಸಾಬಾ ಹೇಳಿದ್ದಾರೆ.

ಕಳೆದ ಬಾರಿಯ ಏಷ್ಯನ್ ಕ್ರೀಡಾಕೂಟದ ಸಂದರ್ಭದಲ್ಲಿ ಕ್ರೀಡಾ ವರದಿಗಾರರೊಬ್ಬರ ಕ್ಯಾಮೆರಾ ಕಳವು ಮಾಡಲು ಯತ್ನಿಸಿದ್ದ ಜಪಾನ್‌ನ ಈಜುಪಟು ನಯಾ ತೊಮಿಟಾ ಅವರನ್ನು ವಾಪಸ್ ಕಳುಹಿಸಲಾಗಿತ್ತು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !