ಏಷ್ಯನ್‌ ಕ್ರೀಡಾಕೂಟದ ಸಾಧಕರಿಗೆ ಸನ್ಮಾನ

7

ಏಷ್ಯನ್‌ ಕ್ರೀಡಾಕೂಟದ ಸಾಧಕರಿಗೆ ಸನ್ಮಾನ

Published:
Updated:

ನವದೆಹಲಿ: ಇಂಡೊನೇಷ್ಯಾದಲ್ಲಿ ನಡೆದ 18ನೇ ಏಷ್ಯನ್‌ ಕ್ರೀಡಾಕೂಟದಲ್ಲಿ ಪದಕ ಗೆದ್ದು ಐತಿಹಾಸಿಕ ಸಾಧನೆ ಮಾಡಿದ ಭಾರತದ ಅಥ್ಲೀಟ್‌ಗಳಿಗೆ ಮಂಗಳವಾರ ನಗದು ಸನ್ಮಾನ ನೀಡಿ ಗೌರವಿಸಲಾಯಿತು. 

ವೈಯಕ್ತಿಕ ವಿಭಾಗಗಳಲ್ಲಿ ಚಿನ್ನ, ಬೆಳ್ಳಿ ಹಾಗೂ ಕಂಚಿನ ಪದಕ ಜಯಿಸಿದವರಿಗೆ ಕ್ರಮವಾಗಿ ₹ 40 ಲಕ್ಷ, ₹20 ಲಕ್ಷ, ₹10 ಲಕ್ಷ ನೀಡಲಾಯಿತು. 

ಈ ಬಾರಿಯ ಕ್ರೀಡಾಕೂಟದಲ್ಲಿ ಭಾರತ ಒಟ್ಟು 69 ಪದಕಗಳನ್ನು ಜಯಿಸಿತ್ತು. ಇದರಲ್ಲಿ 15 ಚಿನ್ನ, 24 ಬೆಳ್ಳಿ ಹಾಗೂ 30 ಕಂಚಿನ ಪದಕಗಳನ್ನು ತನ್ನ ಖಾತೆಗೆ ಹಾಕಿಕೊಂಡಿತ್ತು. 

ಕೇಂದ್ರ ಗೃಹ ಸಚಿವ ರಾಜನಾಥ್‌ ಸಿಂಗ್‌, ಕ್ರೀಡಾ ಸಚಿವ ರಾಜ್ಯವರ್ಧನ್‌ ಸಿಂಗ್‌ ರಾಥೋಡ್‌ ಹಾಗೂ ಇನ್ನಿತರ ಗಣ್ಯರು ಸಮಾರಂಭದಲ್ಲಿ ಭಾಗಿಯಾಗಿದ್ದರು. 

ಇದೇ ವೇಳೆ ಮಾತನಾಡಿದ ರಾಜನಾಥ್‌ ಸಿಂಗ್‌, ‘ನಮ್ಮ ಅಥ್ಲೀಟ್‌ಗಳ ಸಾಧನೆ ಸಂತಸ ತಂದಿದೆ. ಭವಿಷ್ಯದಲ್ಲಿ ಭಾರತವು ಕ್ರೀಡಾ ಜಗತ್ತಿನ ಸೂಪರ್‌ ಪವರ್‌ ಆಗುವುದರಲ್ಲಿ ಅನುಮಾನವಿಲ್ಲ’ ಎಂದು ಅಭಿಪ್ರಾಯಪಟ್ಟರು. 

‘ಇನ್ನೂ ಹೆಚ್ಚಿನ ಪಾಯಿಂಟ್ಸ್‌ ಸಂಗ್ರಹಿಸಬಹುದಿತ್ತು’: ಹೆಪ್ಟಥ್ಲಾನ್‌ನಲ್ಲಿ ಚಿನ್ನದ ಪದಕ ಗೆದ್ದು ಚಾರಿತ್ರಿಕ ಸಾಧನೆ ಮಾಡಿದ್ದ ಸ್ವಪ್ನಾ ಬರ್ಮನ್‌ ಅವರು ಇನ್ನೂ ಹೆಚ್ಚಿನ ಸಾಮರ್ಥ್ಯ ತೋರಬಹುದಿತ್ತು ಎಂದು ಅಭಿಪ್ರಾಯಪಟ್ಟಿದ್ದಾರೆ. 

‘ಹೈ ಜಂಪ್‌, 100 ಮೀ., 200ಮೀ., 800ಮೀ. ಓಟಗಳಲ್ಲಿ ನಾನು ನನ್ನ ನಿರೀಕ್ಷಿತ ಸಾಮರ್ಥ್ಯ ತೋರಲು ಸಾಧ್ಯವಾಗಲಿಲ್ಲ. ಜಾವೆಲಿನ್‌ ಥ್ರೋನಲ್ಲಿ ಉತ್ತಮವಾಗಿ ಆಡಿದೆ. ಹೀಗಾಗಿ ಮೊದಲ ಸ್ಥಾನ ಪಡೆಯಲು ಸಾಧ್ಯವಾಯಿತು’ ಸ್ವಪ್ನಾ ಹೇಳಿದ್ದಾರೆ. 

ಟಾಪ್‌ ಯೋಜನೆಗೆ ಸೇರಿಸಲು ಮಂಜೀತ್‌ ಮನವಿ: ಕ್ರೀಡಾಪಟುಗಳ ತರಬೇತಿಗೆ ಆರ್ಥಿಕ ನೆರವು ನೀಡುವ ಟಾರ್ಗೆಟ್‌ ಒಲಿಂಪಿಕ್‌ ಪೋಡಿಯಮ್‌ (ಟಾಪ್‌)ಗೆ ತಮ್ಮ ಹೆಸರು ಸೇರಿಸಲು ಅಥ್ಲೀಟ್‌ ಮಂಜೀತ್‌ ಸಿಂಗ್‌ ಅವರು ಮನವಿ ಮಾಡಿದ್ದಾರೆ. 

ಇತ್ತೀಚೆಗೆ ಮುಕ್ತಾಯಗೊಂಡ ಏಷ್ಯನ್‌ ಕ್ರೀಡಾಕೂಟದ ಪುರುಷರ 800 ಮೀಟರ್ಸ್‌ ಓಟದ ಸ್ಪರ್ಧೆಯಲ್ಲಿ ಮಂಜೀತ್‌ ಅವರು ಚಿನ್ನದ ಸಾಧನೆ ಮಾಡಿದ್ದರು. 

‘ನಾನು ಯಾವುದೇ ಉದ್ಯೋಗದಲ್ಲಿಲ್ಲ. ಪ್ರಾಯೋಜಕ ಕಂಪನಿಗಳ ನೆರವು ನನಗಿಲ್ಲ. 2020ರ ಒಲಿಂಪಿಕ್‌ ಕ್ರೀಡಾಕೂಟಕ್ಕಾಗಿ ಹೆಚ್ಚಿನ ತರಬೇತಿಯ ಅಗತ್ಯವಿದೆ. ಹೀಗಾಗಿ ಟಾಪ್‌ ಯೋಜನೆಗೆ ಸೇರಿಸಿದರೆ ಅನುಕೂಲವಾಗುತ್ತದೆ. ಈ ಬಗ್ಗೆ ಕ್ರೀಡಾ ಸಚಿವಾಲಯ ಗಮನಹರಿಸಬೇಕೆಂದು ಮನವಿ ಮಾಡುತ್ತೇನೆ’ ಎಂದು ಮಂಜೀತ್‌ ತಿಳಿಸಿದ್ದಾರೆ.

ಬರಹ ಇಷ್ಟವಾಯಿತೆ?

  • 6

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !