ಚಂಡೀಗಡ: ಫಿನ್‌ಲೆಂಡ್‌ನಲ್ಲಿ ನಡೆದ ವರ್ಲ್ಡ್ ಮಾಸ್ಟರ್ಸ್ ಅಥ್ಲೆಟಿಕ್ಸ್ ಚಾಂಪಿಯನ್‌ಷಿಪ್‌ನಲ್ಲಿ 94 ವರ್ಷದ ಭಾರತದ ಭಗವಾನಿ ದೇವಿ ಚಿನ್ನದ ಪದಕ ಗೆಲ್ಲುವ ಮೂಲಕ ಇತಿಹಾಸ ನಿರ್ಮಿಸಿದ್ದಾರೆ.
ಹರಿಯಾಣ ಮೂಲದ ಭಗವಾನಿ ದೇವಿ ಅವರು, 100 ಮೀ. ಓಟವನ್ನು ಕೇವಲ 24.74 ಸೆಕೆಂಡುಗಳಲ್ಲಿ ಕ್ರಮಿಸುವ ಮೂಲಕ ಚಿನ್ನಕ್ಕೆ ಕೊರಳೊಡ್ಡಿದರು.
ಹರಿಯಾಣ ರಾಜ್ಯಪಾಲ ಬಂಡಾರು ದತ್ತಾತ್ರೇಯ ಮತ್ತು ಮುಖ್ಯಮಂತ್ರಿ ಮನೋಹರ್ ಲಾಲ್ ಖಟ್ಟರ್, ಭಗವಾನಿ ದೇವಿ ಅವರನ್ನು ಅಭಿನಂದಿಸಿದ್ದಾರೆ.
94ನೇ ವಯಸ್ಸಿನಲ್ಲೂ ಅವರು ನಮ್ಮ ಸ್ಫೂರ್ತಿಯ ಮೂಲವಾಗಿದ್ದಾರೆ ಎಂದು ಖಟ್ಟರ್ ಕೊಂಡಾಡಿದ್ದಾರೆ.
‘ಆಕೆಯ ಈ ಸಾಧನೆಯು ಯುವ ಸಮುದಾಯಕ್ಕೆ ಉತ್ಸಾಹ ತುಂಬಲಿದೆ. ವಯಸ್ಸು ಸಾಧನೆಗೆ ಅಡ್ಡಿಯಾಗದು ಎಂಬುದನ್ನು ಭಗವಾನಿ ದೇವಿ ಸಾಬೀತು ಮಾಡಿದ್ದಾರೆ’ಎಂದು ಖಟ್ಟರ್ ಅಧಿಕೃತ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ದೆಹಲಿ ಸಿಎಂ ಅರವಿಂದ್ ಕೇಜ್ರಿವಾಲ್ ಸಹ ಭಗವಾನಿ ಅವರ ಸಾಧನೆಯನ್ನು ಹೊಗಳಿದ್ದು, ‘ಅವರ ಇಚ್ಛಾಶಕ್ತಿ ಮತ್ತು ಸಾಮರ್ಥ್ಯವು ನಮ್ಮೆಲ್ಲರಿಗೂ ಸ್ಫೂರ್ತಿ. ನಿಮ್ಮ ಬಗ್ಗೆ ಭಾರತಕ್ಕೆ ಹೆಮ್ಮೆ ಇದೆ ಭಗವಾನಿ ಜೀ’ಎಂದು ಟ್ವೀಟ್ ಮಾಡಿದ್ದಾರೆ.
