7
ಇಂದಿನಿಂದ ಕಬಡ್ಡಿ ಮಾಸ್ಟರ್ಸ್‌ ಟೂರ್ನಿ: ಅಜಯ್‌ ಪಡೆಗೆ ಪಾಕಿಸ್ತಾನದ ಸವಾಲು

ಶುಭಾರಂಭದ ನಿರೀಕ್ಷೆಯಲ್ಲಿ ಭಾರತ

Published:
Updated:

ದುಬೈ: ಭಾರತ ಪುರುಷರ ತಂಡದವರು ಚೊಚ್ಚಲ ಆವೃತ್ತಿಯ ಕಬಡ್ಡಿ ಮಾಸ್ಟರ್ಸ್‌ ಟೂರ್ನಿಯಲ್ಲಿ ಪ್ರಶಸ್ತಿ ಗೆಲ್ಲುವ ಗುರಿ ಹೊಂದಿದ್ದಾರೆ.

ಶುಕ್ರವಾರ ನಡೆಯುವ ‘ಎ’ ಗುಂಪಿನ ತನ್ನ ಮೊದಲ ಪಂದ್ಯದಲ್ಲಿ ಅಜಯ್‌ ಠಾಕೂರ್‌ ನೇತೃತ್ವದ ಭಾರತ ತಂಡ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ಎದುರು ಸೆಣಸಲಿದೆ.

ಆಗಸ್ಟ್‌ನಲ್ಲಿ ಏಷ್ಯನ್‌ ಕ್ರೀಡಾಕೂಟ ನಡೆಯಲಿದ್ದು ಇದಕ್ಕೆ ಸಿದ್ಧತೆ ಕೈಗೊಳ್ಳಲು ಏಷ್ಯಾದ ತಂಡಗಳಿಗೆ ಈ ಟೂರ್ನಿ ವೇದಿಕೆಯಾಗಿದೆ.

ನಾಯಕ ಅಜಯ್‌, ಮಂಜೀತ್ ಚಿಲಾರ, ಗಿರೀಶ್‌ ಮಾರುತಿ ಅವರಂತಹ ಅನುಭವಿಗಳು ಭಾರತ ತಂಡದಲ್ಲಿದ್ದಾರೆ. ಪ್ರೊ ಕಬಡ್ಡಿ ಲೀಗ್‌ನಲ್ಲಿ ಮಿಂಚಿರುವ ದೀಪಕ್‌ ನಿವಾಸ್‌ ಹೂಡಾ, ಸಂದೀಪ್‌ ನರ್ವಾಲ್‌, ಪ್ರದೀಪ್‌ ನರ್ವಾಲ್‌ ಅವರೂ ಮಿಂಚುವ ಹುಮ್ಮಸ್ಸಿನಲ್ಲಿದ್ದಾರೆ.

ಸುರ್ಜಿತ್‌, ರಾಜು ಲಾಲ್‌ ಚೌಧರಿ, ಸುರೇಂದರ್‌ ನಾಡಾ, ಅವರ ಬಲವೂ ತಂಡಕ್ಕಿದೆ. ರೈಡರ್‌ಗಳಾದ ರೋಹಿತ್‌ ಕುಮಾರ್‌, ರಿಷಾಂಕ್‌ ದೇವಾಡಿಗ ಮತ್ತು ರಾಹುಲ್‌ ಚೌಧರಿ ಅವರು ಸುಲಭವಾಗಿ ಪಾಯಿಂಟ್ಸ್‌ ಗಳಿಸಿ ತಂಡಕ್ಕೆ ಗೆಲುವು ತಂದುಕೊಡಲು ಕಾಯುತ್ತಿದ್ದಾರೆ. ಮೋನು ಗೋಯತ್‌ ಕೂಡಾ ಪಾಕಿಸ್ತಾನ ತಂಡಕ್ಕೆ ಸವಾಲಾಗಬಲ್ಲ ಸಾಮರ್ಥ್ಯ ಹೊಂದಿದ್ದಾರೆ.

ಪಾಕಿಸ್ತಾನ ತಂಡವೂ ಗೆಲುವಿಗಾಗಿ ಕಾತರಿಸುತ್ತಿದೆ. ನಾಸೀರ್‌ ಅಲಿ, ವಕಾರ್‌ ಅಲಿ, ಮುದಾಸರ್‌ ಅಲಿ, ಕಾಶಿಫ್‌ ರಜಾಕ್‌ ಮತ್ತು ಮಹಮ್ಮದ್‌ ನದೀಮ್‌ ಅವರು ಈ ತಂಡದ ಆಧಾರ ಸ್ಥಂಭಗಳಾಗಿದ್ದಾರೆ.

ಇರಾನ್‌ಗೆ ಕೊರಿಯಾ ಸವಾಲು: ‘ಬಿ’ ಗುಂಪಿನ ಪಂದ್ಯದಲ್ಲಿ ಇರಾನ್‌ ಮತ್ತು ದಕ್ಷಿಣ ಕೊರಿಯಾ ತಂಡಗಳು ಸೆಣಸಲಿವೆ.

ವಿಶ್ವಕಪ್‌ನಲ್ಲಿ ಮೂರು ಬಾರಿ ರನ್ನರ್ಸ್‌ ಅಪ್‌ ಆಗಿರುವ ಇರಾನ್‌ ತಂಡ ಈ ಪಂದ್ಯದಲ್ಲಿ ಸುಲಭವಾಗಿ ಗೆಲ್ಲುವ ವಿಶ್ವಾಸದಲ್ಲಿದೆ.

ಹಾದಿ ತಜಿಕ್‌, ಮಹಮ್ಮದ್‌ ಅಮಿನ್‌, ಅಮೀರ್‌ ಹೊಸೇನ್‌ ಮಹಮ್ಮದ್‌ ಮಲೇಕಿ ಅವರು ಈ ತಂಡದ ಶಕ್ತಿಯಾಗಿದ್ದಾರೆ.

ಮಹಮ್ಮದ್‌ ಗೊರ್ಬಾನಿ, ಮಹಮ್ಮದ್‌ ಇಸ್ಮಾಯಿಲ್‌, ಅಫ್ಸಿನ್‌ ಜಫಾರಿ ಅವರೂ ಮಿಂಚಲು ಕಾಯುತ್ತಿದ್ದಾರೆ.

ಲೀ ಡಾಂಗ್ ಗೊಯೆನ್‌, ಲೀ ಜೇ ಮಿನ್‌, ಕಿಮ್‌ ಡಾಂಗ್‌ ಗ್ಯೂ ಅವರನ್ನು ಹೊಂದಿರುವ ದಕ್ಷಿಣ ಕೊರಿಯಾ ತಂಡ ಇರಾನ್‌ಗೆ ಆಘಾತ ನೀಡಲು ಹವಣಿಸುತ್ತಿದೆ.

ಶುಕ್ರವಾರ ದುಬೈ ತಲುಪಲಿರುವ ಪಾಕ್‌: ಪಾಕಿಸ್ತಾನ ತಂಡದವರು ಶುಕ್ರವಾರ ಬೆಳಿಗ್ಗೆ ದುಬೈಗೆ ಬರಲಿದ್ದಾರೆ.

‘ಪಾಕ್‌ ಆಟಗಾರರು ನಿಗದಿಯಂತೆ ಗುರುವಾರ ದುಬೈಗೆ ಬಂದು ಅಭ್ಯಾಸ ನಡೆಸಬೇಕಿತ್ತು. ವೀಸಾ ಸಮಸ್ಯೆಯಿಂದಾಗಿ ಆಟಗಾರರು ಶುಕ್ರವಾರ ಬೆಳಿಗ್ಗೆ ಇಲ್ಲಿಗೆ ಬರಲಿದ್ದಾರೆ’ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.


ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !