ಲಾಕ್‌ಡೌನ್‌: ಆರ್ಥಿಕ ಸಂಕಷ್ಟದಲ್ಲಿ ಸ್ವಸ್ತಿಕಾ ಕುಟುಂಬ

ತಂದೆ ಸಂದೀಪ್‌ ಅವರು ಸ್ವಸ್ತಿಕಾ ಅವರ ತರಬೇತುದಾರ ಹಾಗೂ ಕೋಚ್‌ ಕೂಡ ಹೌದು. ನಾಲ್ಕು ತಿಂಗಳುಗಳ ಕಾಲ ಕೆಲಸವಿಲ್ಲದೆ ಅಲೆದಾಡುತ್ತಿರುವ ಸಂದೀಪ್, ನವೀ ಮುಂಬೈನಲ್ಲಿರುವ ಮನೆ ಬಾಡಿಗೆ ಕಟ್ಟಲು ಪರದಾಡುತ್ತಿದ್ದಾರೆ.

ಸಂದೀಪ್ ಅವರು ಮುಂಬೈನ ನೆರೂಲ್‌ನ ಡಿಎವಿ ಪಬ್ಲಿಕ್ ಶಾಲೆಯಲ್ಲಿ ಟೇಬಲ್ ಟೆನಿಸ್ ತರಬೇತುದಾರರಾಗಿದ್ದರು. ಆದರೆ ಲಾಕ್‌ಡೌನ್ ಆದಾಗಿನಿಂದ ಅವರಿಗೆ ಕೆಲಸವಿಲ್ಲ. ತಮ್ಮ ಎಲ್ಲಾ ಉಳಿತಾಯದ ಹಣವನ್ನು ಜೀವನ ನಿರ್ವಹಣೆಗೆ ಖರ್ಚು ಮಾಡಬೇಕಿದೆ.

‘ಸ್ವಸ್ತಿಕಾ ನಿತ್ಯ ಆರು ಗಂಟೆಗಳ ತರಬೇತಿ ನಡೆಸುತ್ತಾರೆ. ಇದಕ್ಕಾಗಿ ಅವರಿಗೆ ಸೇವಿಸಲು ₹ 1200 ಮೌಲ್ಯದ ಪೂರಕ ಆಹಾರ ಬೇಕು. ಈಗ ಎಲ್ಲವೂ ನಿಂತುಹೋಗಿದೆ. ಇದೇ ರೀತಿ ಲಾಕ್‌ಡೌನ್‌ ಮುಂದುವರಿದರೆ ನಾವು ಬಂಗಾಳಕ್ಕೆ ತೆರಳಬೇಕಾಗುತ್ತದೆ‘ ಎಂದು 1992ರಿಂದ ಮುಂಬೈನಲ್ಲೇ ನೆಲೆಸಿರುವ ಲೆವೆಲ್‌ 2 ತರಬೇತುದಾರ ಸಂದೀಪ್‌ ಹೇಳುತ್ತಾರೆ.

‘ಭವಿಷ್ಯ ನಿಧಿ ಉಳಿತಾಯದಿಂದ ಬಂದ ₹ 60,000 ನನ್ನ ಬಳಿ ಇತ್ತು. ಈಗ ಅದೂ ಖರ್ಚಾಗಿದೆ. ಸಂಬಂಧಿಗಳಿಂದ ಒಂದಷ್ಟು ಸಾಲ ಪಡೆದಿರುವೆ. ಈಗ ಸ್ವಸ್ತಿಕಾಳ ತರಬೇತಿಗೂ ನಮ್ಮ ಬಳಿ ಹಣವಿಲ್ಲ. ಸದ್ಯ ನಮ್ಮ ತವರು ಕೋಲ್ಕತ್ತದ ಅಂದುಲ್‌ಗೆ ತೆರಳಲು ಯೋಚಿಸುತ್ತಿದ್ದೇವೆ. ಕನಿಷ್ಠ ಅಲ್ಲಿ ನಮಗೆ ಇರಲು ಆಶ್ರಯವಾದರೂ ಇದೆ‘ ಎನ್ನುತ್ತಾರೆ ಸಂದೀಪ್‌.

2013ರಲ್ಲಿ ಒಂಬತ್ತು ವರ್ಷದವರಿದ್ದಾಗಲೇ ಕೆಡೆಟ್‌ ರಾಷ್ಟ್ರೀಯ ಚಾಂಪಿಯನ್‌ ಆಗಿದ್ದ ಸ್ವಸ್ತಿಕಾ, ಕಳೆದ ಎರಡು ವರ್ಷಗಳಲ್ಲಿ ಆಟದಲ್ಲಿ ಶೀಘ್ರ ಪ್ರಗತಿ ಕಂಡಿದ್ದಾರೆ. 2018ರ ಜನವರಿಯಲ್ಲಿ ವಿಶ್ವ ಜೂನಿಯರ್‌ ಕ್ರಮಾಂಕದಲ್ಲಿ 278ನೇ ಸ್ಥಾನದಲ್ಲಿದ್ದ ಅವರು ಈ ವರ್ಷದ ಎಪ್ರಿಲ್‌ನಲ್ಲಿ ಜೀವನಶ್ರೇಷ್ಠ ಐದನೇ ಸ್ಥಾನಕ್ಕೇರಿದ್ದಾರೆ.

ಸ್ವಸ್ತಿಕಾ ಅವರು ಪ್ರಸ್ತುತ ಭಾರತದಜೂನಿಯರ್‌ ಅಗ್ರ ಕ್ರಮಾಂಕವನ್ನು ರಾಷ್ಟ್ರೀಯ ಚಾಂಪಿಯನ್‌ ದಿಯಾ ಚಿತಾಲೆ ಅವರೊಂದಿಗೆ ಹಂಚಿಕೊಂಡಿದ್ದಾರೆ. ಗೋಲ್ಡನ್‌ ಹಾಗೂ ಪ್ರೀಮಿಯರ್‌ ಸಿರೀಸ್‌ ಟೂರ್ನಿಗಳಲ್ಲಿ ಶ್ರೇಷ್ಠ ಸಾಮರ್ಥ್ಯ ತೋರಿದ ಕಾರಣ ಸ್ವಸ್ತಿಕಾ ಅವರು ರ‍್ಯಾಂಕಿಂಗ್‌ನಲ್ಲಿ ಏರಿಕೆ ಕಂಡಿದ್ದರು.

ಅಂತರರಾಷ್ಟ್ರೀಯ ಮಟ್ಟದಲ್ಲಿ ಎಂಟು ಕಂಚಿನ ಪದಕಗಳು ಅವರಿಗೆ ಒಲಿದಿವೆ.

ಹಣಕಾಸಿನ ನೆರವು ನೀಡಲು ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳಿಗೆ ಮನವಿ ಮಾಡಿಕೊಂಡಿದ್ದು, ಯಾವುದೇ ಸ್ಪಂದನೆ ದೊರೆತಿಲ್ಲ ಎಂದು ಸಂದೀಪ್‌ ಹೇಳಿದ್ದಾರೆ.

ಎಲ್ಲ ಸಮಸ್ಯೆಗಳು ಬಗೆಹರಿದರೆ, ಸ್ವಸ್ತಿಕಾ ಅವರು ಪೋರ್ಚುಗಲ್‌ನಲ್ಲಿ ನವೆಂಬರ್‌ 29ರಿಂದ ಡಿಸೆಂಬರ್‌ 6ರವರೆಗೆ ನಡೆಯುವ ವಿಶ್ವ ಜೂನಿಯರ್‌ ಚಾಂಪಿಯನ್‌ಷಿಪ್‌ನಲ್ಲಿ ಚಿನ್ನದ ಪದಕ ಗೆಲ್ಲುವ ಗುರಿ ಇಟ್ಟುಕೊಂಡಿದ್ದಾರೆ.