ಕೆಜಿಎಫ್‌ನ ಕೀರ್ತನಾ ಪಾಂಡ್ಯನ್‌ ಸಾಧನೆಗೆ ಅಪ್ಪನೇ ಪ್ರೇರಣೆ

7
ಜೂನಿಯರ್ ಸ್ನೂಕರ್‌ ವಿಶ್ವಚಾಂಪಿಯನ್‌ ಗೆದ್ದ ಕೆಜಿಎಫ್‌ ಹುಡುಗಿ

ಕೆಜಿಎಫ್‌ನ ಕೀರ್ತನಾ ಪಾಂಡ್ಯನ್‌ ಸಾಧನೆಗೆ ಅಪ್ಪನೇ ಪ್ರೇರಣೆ

Published:
Updated:

ಕೆಜಿಎಫ್‌: ರಷ್ಯಾದ ಸೇಂಟ್‌ಪೀಟರ್ಸ್‌ ಬರ್ಗ್‌ನಲ್ಲಿ ವಿಶ್ವ ಜೂನಿಯರ್ ಸ್ನೂಕರ್‌ ನಲ್ಲಿ ಚಿನ್ನ ಗೆದ್ದ ಕೀರ್ತನಾ ಪಾಂಡ್ಯನ್‌ಗೆ ಅವರ ತಂದೆಯೇ ಮೂಲ ಪ್ರೇರಣೆ.

ಇಲ್ಲಿಯ ಬೆಮಲ್‌ ಕಾರ್ಖಾನೆಯಲ್ಲಿ ಅಧಿಕಾರಿಯಾಗಿರುವ ಕೆ.ಪಾಂಡ್ಯನ್‌ ಅವರ ಎರಡನೇ ಪುತ್ರಿಯಾದ ಕೀರ್ತನಾ, ಬೆಮಲ್‌ ಕ್ಲಬ್‌ನಲ್ಲಿ ತಂದೆಯ ಜತೆಗೆ ಆಟ ನೋಡಲು ಹೋಗುತ್ತಿದ್ದರು. ಏಳನೇ ತರಗತಿಯಲ್ಲಿದ್ದಾಗ ಸ್ನೂಕರ್ ಆಡಲು ಆರಂಭಿಸಿದ ಕೀರ್ತನಾ ಬೇಗನೆ ಗಮನ ಸೆಳೆಯುವ ಮಟ್ಟಕ್ಕೆ ಬೆಳೆದರು. ತಮ್ಮ ಮಗಳ ಆಸಕ್ತಿಯನ್ನು ಕಂಡ ಪಾಂಡ್ಯನ್‌ ಅವರು ಬೆಮಲ್‌ ಕ್ಲಬ್‌ನಲ್ಲಿ ಆಡಲು ಉತ್ತೇಜಿಸಿದರು. ನಂತರ ಬೆಂಗಳೂರಿನ ಕರ್ನಾಟಕ ಬಿಲಿಯಡ್ಸ್‌ ಅಸೋಸಿಯೇಷನ್‌ಗೆ ಹೆಚ್ಚಿನ ತರಬೇತಿಗೆ ಸೇರಿಸಿದರು.

ವಾರಕ್ಕೆರಡು ಬಾರಿ ರೈಲಿನಲ್ಲಿ ಬೆಂಗಳೂರಿಗೆ ಬಂದು ತರಬೇತಿ ಪಡೆಯದರು. ಅವರಿಗೆ ತಾಯಿ ಜಯಲಕ್ಷ್ಮೀ ಬೆಂಬಲವಾಗಿ ನಿಂತರು.

ಅಲ್ಲಿ ಕೋಚ್ ರವೀಂದ್ರನಾಥ್ ಅವರಿಂದ ತರಬೇತಿ ಪಡೆದ ಕೀರ್ತನಾ ಹಲವಾರು ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಂಡರು. ಈಚೆಗೆ ನಡೆದಿದ್ದ ರಾಷ್ಟ್ರೀಯ ಸ್ನೂಕರ್ ಚಾಂಪಿಯನ್‌ಶಿಪ್‌ನಲ್ಲಿ (18, 21 ವಯಸ್ಸಿನ ಒಳಗಿನ) ಮೂರು ಚಿನ್ನ ಮತ್ತು ಒಂದು ಬೆಳ್ಳಿ ಪದಕ ಗಳಿಸಿದರು. 2017ರಲ್ಲಿ ಪುಣೆಯಲ್ಲಿ ನಡೆದಿದ್ದ ರಾಷ್ಟ್ರೀಯ ಬಿಲಿಯಡ್ಸ್‌ ಸಬ್‌ ಜೂನಿಯರ್‌ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನದ ಪದಕ ಗಳಿಸಿದ್ದರು. ಚೀನಾದಲ್ಲಿ ನಡೆದಿದ್ದ ವಿಶ್ವ ಜೂನಿಯರ್‌ ಸ್ನೂಕರ್ ಚಾಂಪಿಯನ್‌ಶಿಪ್‌ನಲ್ಲಿ ಕಂಚಿನ ಪದಕ ಗಳಿಸಿದ್ದರು.

‘ಪ್ರಸ್ತುತ ಸ್ನೂಕರ್‌ನಲ್ಲಿ ರಾಷ್ಟ್ರಮಟ್ಟದಲ್ಲಿ 8ನೇ ರ‍್ಯಾಂಕಿಂಗ್ ಪಡೆದಿದ್ದಾರೆ’ ಎಂದು ತಂದೆ ಕೆ.ಪಾಂಡ್ಯನ್ ಸಂತಸ ವ್ಯಕ್ತಪಡಿಸಿದರು.

‘ತಂದೆಗೆ ಕೆಜಿಎಫ್‌ನಿಂದ ಮೈಸೂರಿಗೆ ವರ್ಗವಾಗಿದೆ. ಅದರಿಂದಾಗಿ ನಾನು ಬೆಂಗಳೂರಿಗೆ ಬಂದು ತರಬೇತಿ ಪಡೆಯಲು ಕಷ್ಟವಾಗುತ್ತಿದೆ. ವಿಶ್ವ ಮಟ್ಟದ ಸ್ಪರ್ಧೆ ಎದುರಿಸುವಾಗ ಕೊಂಚ ಅಳಕು ಇರುತ್ತದೆ. ಆದರೆ ವಿಶ್ವ ಚಾಂಪಿಯನ್‌ ಪಂಕಜ್‌ ಅಡ್ವಾಣಿ ಮತ್ತು ಅವರ ಸಹೋದರರ  ಸಲಹೆಗಳು ನನ್ನ ಭಯವನ್ನು ನೀಗಿಸಿತು. ಏಕಾಗ್ರತೆ ಸಾಧಿಸಲು ಸಾಧ್ಯವಾಯಿತು. ಥೈಲಾಂಡಿನ ನಚಾರತ್ ಪ್ರಸ್ತುತ ವಿಶ್ವದ ಉತ್ತಮ ಆಟಗಾರ್ತಿಯಾಗಿದ್ದಾರೆ. ಅವರನ್ನು ಸೋಲಿಸುವುದು ಮುಂದಿನ ಗುರಿಯಾಗಿದೆ‘ ಎಂಬ ಕನಸನ್ನು ‘ಪ್ರಜಾವಾಣಿ’ಯೊಂದಿಗೆ ಅವರು ಹಂಚಿಕೊಂಡರು.

ಕೀರ್ತನಾ ಪಾಂಡ್ಯನ್‌ ರಷ್ಯದ ಪೀಟರ್ಸ್‌ ಬರ್ಗ್‌ನಲ್ಲಿ ಆಯೋಜಿಸಿದ್ದ 16 ವರ್ಷದೊಳಗಿನ ವಿಭಾಗದ ಸ್ನೂಕರ್ ಚಾಂಪಿಯನ್‌ಶಿಪ್‌ನಲ್ಲಿ ಬಲಾರಸ್‌ನ ಅಲ್‌ಬಿನ ಲೆಸ್‌ಚುಕ್‌ ಅವರನ್ನು ಸೋಲಿಸಿ ಪ್ರಶಸ್ತಿ ಗಳಿಸಿದ್ದಾರೆ.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !