ಐಐಪಿಕೆಎಲ್‌: ಮುಂಬೈಗೆ ಮಣಿದ ಚೆನ್ನೈ ಚಾಲೆಂಜರ್ಸ್

ಬುಧವಾರ, ಜೂನ್ 19, 2019
27 °C
ಮಿಂಚಿದ ಮಹೇಶ್‌, ಮಣಿವೀರ; ಅಂತಿಮ ಹಂತದಲ್ಲಿ ರೋಚಕ ಹಣಾಹಣಿ

ಐಐಪಿಕೆಎಲ್‌: ಮುಂಬೈಗೆ ಮಣಿದ ಚೆನ್ನೈ ಚಾಲೆಂಜರ್ಸ್

Published:
Updated:
Prajavani

ಮೈಸೂರು: ಕೊನೆಯ ಐದು ನಿಮಿಷಗಳಲ್ಲಿ ಮಿಂಚಿನ ಆಟವಾಡಿದ ಮುಂಬೈ ಚೆ ರಾಜೆ ತಂಡ ಇಂಡೊ ಇಂಟರ್‌ನ್ಯಾಷನಲ್‌ ಪ್ರೀಮಿಯರ್‌ ಕಬಡ್ಡಿ ಲೀಗ್‌ (ಐಐಪಿಕೆಎಲ್‌) ಟೂರ್ನಿಯಲ್ಲಿ ಎರಡನೇ ಗೆಲುವು ಸಾಧಿಸಿತು.

ಚಾಮುಂಡಿ ವಿಹಾರ ಕ್ರೀಡಾಂಗಣದಲ್ಲಿ ಶನಿವಾರ ರಾತ್ರಿ ನಡೆದ ಪಂದ್ಯದಲ್ಲಿ ಮುಂಬೈ ತಂಡ 32–28 ರಲ್ಲಿ ಚೆನ್ನೈ ಚಾಲೆಂಜರ್ಸ್‌ ತಂಡವನ್ನು ಮಣಿಸಿತು. ಈ ಗೆಲುವಿನೊಂದಿಗೆ ಮುಂಬೈ ತಂಡ ಆರು ಪಾಯಿಂಟ್‌ಗಳೊಂದಿಗೆ ‘ಬಿ’ ಗುಂಪಿನಲ್ಲಿ ಎರಡನೇ ಸ್ಥಾನಕ್ಕೇರಿತು.

ಪಂದ್ಯದ ಆರಂಭದಿಂದಲೇ ತುರುಸಿನ ಪೈಪೋಟಿ ಕಂಡುಬಂತು. ಪ್ರತಿಯೊಂದು ಪಾಯಿಂಟ್‌ ಗಿಟ್ಟಿಸಲು ಆಟಗಾರರು ಪ್ರಯಾಸಪಟ್ಟರು. ರೇಡಿಂಗ್‌ನಲ್ಲಿ ಯಾರಿಗೂ ಒಂದಕ್ಕಿಂತ ಹೆಚ್ಚು ಪಾಯಿಂಟ್‌ ಬರಲಿಲ್ಲ. ಮೊದಲ ಕ್ವಾರ್ಟರ್‌ ಕೊನೆಗೊಂಡಾಗ ಉಭಯ ತಂಡಗಳು 7–7 ರಲ್ಲಿ ಸಮಬಲ ಸಾಧಿಸಿದ್ದವು.

ಎರಡನೇ ಕ್ವಾರ್ಟರ್‌ನಲ್ಲಿ ಚೆನ್ನೈ ತಂಡ ಅಲ್ಪ ಮೇಲುಗೈ ಸಾಧಿಸಿತು. ಇಳಯರಾಜ ಅವರ ಉತ್ತಮ ರೇಡಿಂಗ್‌ ನೆರವಿನಿಂದ ವಿರಾಮದ ವೇಳೆಗೆ ಮೂರು ಪಾಯಿಂಟ್‌ಗಳ (15–12) ಮುನ್ನಡೆ ಪಡೆದುಕೊಂಡಿತು.

ಎರಡನೇ ಅವಧಿಯಲ್ಲಿ ಚೆನ್ನೈ ತಂಡ ಟ್ಯಾಕ್ಲಿಂಗ್‌ನಲ್ಲಿ ಚುರುಕುತನ ತೋರಿಸಿತು. ಮೂರನೇ ನಿಮಿಷದಲ್ಲಿ ಎದುರಾಳಿ ತಂಡವನ್ನು ಆಲೌಟ್‌ ಮಾಡಿ ಮುನ್ನಡೆಯನ್ನು 20–13 ಕ್ಕೆ ಹೆಚ್ಚಿಸಿಕೊಂಡಿತು.

ಪಟ್ಟುಬಿಡದೆ ಮರುಹೋರಾಟ ನಡೆಸಿದ ಮುಂಬೈ ಹಿನ್ನಡೆಯನ್ನು 19–21ಕ್ಕೆ ತಗ್ಗಿಸಿತು. ಮಹೇಶ್‌ ಮಗ್ದೂಮ್‌, ಮಣಿವೀರ ಕಾಂತ ಮತ್ತು ಅರುಳ್‌ ರೇಡಿಂಗ್‌ನಲ್ಲಿ ಮೇಲಿಂದ ಮೇಲೆ ಪಾಯಿಂಟ್‌ ಕಲೆಹಾಕಿದರು. ಪಂದ್ಯ ಕೊನೆಗೊಳ್ಳಲು ನಾಲ್ಕು ನಿಮಿಷಗಳಿರುವಾಗ ಎದುರಾಳಿ ತಂಡವನ್ನು ಆಲೌಟ್‌ ಮಾಡಿದ26–26 ರಲ್ಲಿ ಸಮಬಲ ಸಾಧಿಸಿತು. ಆ ಬಳಿಕ ಪೂರ್ಣ ಪ್ರಭುತ್ವ ಸಾಧಿಸಿ ಗೆಲುವು ಒಲಿಸಿಕೊಂಡಿತು.

ರಿನೋಸ್‌ ಪಂದ್ಯ ಸಮಬಲ:ಬೆಂಗಳೂರು ರಿನೋಸ್‌ ಮತ್ತು ಹರಿಯಾಣ ಹೀರೋಸ್‌ ನಡುವೆ ಶುಕ್ರವಾರ ರಾತ್ರಿ ನಡೆದ ಪಂದ್ಯ 36–36 ರಲ್ಲಿ ಸಮಬಲದಲ್ಲಿ ಕೊನೆಗೊಂಡಿತು. ಜಿದ್ದಾಜಿದ್ದಿನ ಸೆಣಸಾಟ ನಡೆದ ಪಂದ್ಯದಲ್ಲಿ ವಿರಾಮದ ವೇಳೆಗೆ ಉಭಯ ತಂಡಗಳು 19–19 ರಲ್ಲಿ ಸಮಬಲ ಸಾಧಿಸಿದ್ದವು.

ಬೆಂಗಳೂರು ತಂಡದ ಅರ್ಮುಗಂ ಅವರು ರೇಡಿಂಗ್‌ನಲ್ಲಿ 14 ಪಾಯಿಂಟ್‌ ಕಲೆಹಾಕಿದರೆ, ಹರಿಯಾಣ ತಂಡದ ಸಾಗರ್‌ ಸಿಂಗ್‌ ರೇಡಿಂಗ್‌ನಲ್ಲಿ 12 ಪಾಯಿಂಟ್‌ ಗಳಿಸಿದರು.

ಇಂದಿನ ಪಂದ್ಯಗಳು

ಪಾಂಡಿಚೇರಿ ಪ್ರಿಡೇಟರ್ಸ್– ಮುಂಬೈ ಚೆ ರಾಜೆ

ರಾತ್ರಿ 8ಕ್ಕೆ

ಬೆಂಗಳೂರು ರಿನೋಸ್–ತೆಲುಗು ಬುಲ್ಸ್

ರಾತ್ರಿ 9ಕ್ಕೆ

ಪುಣೆ ಪ್ರೈಡ್– ಚೆನ್ನೈ ಚಾಲೆಂಜರ್ಸ್

10ಕ್ಕೆ

ನೇರ ಪ್ರಸಾರ: ಡಿ ಸ್ಪೋರ್ಟ್ಸ್‌, ಡಿಡಿ ಸ್ಪೋರ್ಟ್ಸ್‌, ಎಂಟಿವಿ

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !