ರಾಷ್ಟ್ರೀಯ ತಂಡದ ಕದ ತಟ್ಟುತ್ತಾ....

7

ರಾಷ್ಟ್ರೀಯ ತಂಡದ ಕದ ತಟ್ಟುತ್ತಾ....

Published:
Updated:
Deccan Herald

ಏಳನೇ ತರಗತಿಯಲ್ಲಿದ್ದಾಗ ತಾಯಿಯ ಮರಣ. ಕೃಷಿಕ ತಂದೆ ರಾಮಕೃಷ್ಣ ಅವರ ‘ಮಾತೃ ವಾತ್ಸಲ್ಯ’ದಲ್ಲೇ ಜೀವನ. ಸಣ್ಣಂದಿನಿಂದಲೇ ಅಜ್ಜ–ಅಜ್ಜಿಯ ಮಮತೆಯ ನೆರಳು ಇದ್ದ ಕಾರಣ ನೋವು ಮರೆತು ಸಾಧನೆಯ ಹಾದಿಯಲ್ಲಿ ಸಾಗಲು ಸಾಧ್ಯವಾಯಿತು.

ಹಾಸನ ಜಿಲ್ಲೆ ಹೊಳೆನರಸೀಪುರ ತಾಲ್ಲೂಕಿನ ಎಚ್‌.ಆರ್‌. ಅಂಜಲಿ ಈ ಮಾತು ಹೇಳುವಾಗ ಗದ್ಗದಿತರಾಗಿದ್ದರು. ಆದರೂ ಆತ್ಮವಿಶ್ವಾಸ ತುಡಿಯುತ್ತಿತ್ತು. ಬೆಂಗಳೂರಿನ ಸಾಯಿ ಕೇಂದ್ರದಲ್ಲಿ ನಡೆಯುತ್ತಿರುವ ಮಹಿಳಾ ಹಾಕಿ ಆಟಗಾರ್ತಿಯರ ಆಯ್ಕೆ ಶಿಬಿರದಲ್ಲಿ ಕಠಿಣ ಪರಿಶ್ರಮದಲ್ಲಿ ತೊಡಗಿರುವ ಅವರಿಗೆ ರಾಷ್ಟ್ರೀಯ ತಂಡದಲ್ಲಿ ಸ್ಥಾನ ಗಳಿಸುವ ಗುರಿ.

ಶಿಬಿರದಲ್ಲಿರುವ 48 ಆಟಗಾರ್ತಿಯರ ಪೈಕಿ ಮೂವರು ಕನ್ನಡತಿಯರು. ಎಸ್‌.ಪಿ.ಕೃತಿಕಾ ಕೂಡ ಕರ್ನಾಟಕದವರು. ಹಾಸನ ತಾಲ್ಲೂಕಿನ ಶಾಂತಿಗ್ರಾಮದವರು. ಇವರದೂ ಪರಿಶ್ರಮದ ಬದುಕು; ಸಾಧನೆಯ ಕನಸು ಕಾಣುವ ಮನಸ್ಸು. ಇವರ ತಂದೆಯೂ (ಪ್ರಕಾಶ) ಕೃಷಿಕರೇ. ಕ್ರೀಡಾಪ್ರೇಮಿಯಾಗಿದ್ದ ಅವರು ಮಗಳನ್ನು ಸಣ್ಣ ವಯಸ್ಸಿನಲ್ಲೇ ಹಾಕಿ ತರಬೇತಿಗೆ ಸೇರಿಸಿದ್ದರು. ಹೀಗಾಗಿ ವಿವಿಧ ಟೂರ್ನಿಗಳಲ್ಲಿ ಆಡುವ ಅವಕಾಶ ಲಭಿಸಿತು. ಈಗ ರಾಷ್ಟ್ರೀಯ ತಂಡದ ಕದ ತಟ್ಟುತ್ತಿದ್ದಾರೆ.

ಕೊಡಗು ಜಿಲ್ಲೆ ಪೊನ್ನಂಪೇಟೆ ಬೆಕ್ಕೆಸೊಡ್ಲೂರು ಗ್ರಾಮದವರಾದ ಲೀಲಾವತಿ ಮಲ್ಲಮಾಡ ಅವರ ತಂದೆ ಕೂಡ ‘ಮಣ್ಣಿನ ಮಗ‘ನೇ. ಅವರು ಮಗಳನ್ನು ಕೊಡವ ಕುಟುಂಬಗಳ ಹಾಕಿ ಟೂರ್ನಿಗೆ ಕರೆದುಕೊಂಡು ಹೋಗುತ್ತಿದ್ದರು. ಅಲ್ಲಿ ಆಟಕ್ಕೆ ಮರುಳಾಗಿ ಈ ಕ್ಷೇತ್ರಕ್ಕೆ ಬಂದ ಲೀಲಾವತಿ ಈಗಾಗಲೇ ಜೂನಿಯರ್‌ ಹಂತದಲ್ಲಿ ಅಂತರರಾಷ್ಟ್ರೀಯ ಟೂರ್ನಿಗಳನ್ನು ಆಡಿದ್ದಾರೆ. ಈಗ ಸೀನಿಯರ್‌ ವಿಭಾಗದ ಮೇಲೆ ಕಣ್ಣಿಟ್ಟಿರುವ ಅವರಿಗೆ ಮುಂದಿನ ಒಲಿಂಪಿಕ್ಸ್‌ನಲ್ಲಿ ಭಾರತ ತಂಡದ ಪರ ಆಡಬೇಕೆಂಬ ಮಹದಾಸೆ.

ಕೂಡಿಗೆ, ಮೈಸೂರಿನ ಕೊಡುಗೆ
ಮಿಡ್‌ಫೀಲ್ಡ್ ವಿಭಾಗದ ಆಟಗಾರ್ತಿಯರಾದ ಕೃತಿಕಾ, ಅಂಜಲಿ ಮತ್ತು ಫಾರ್ವರ್ಡ್‌ ಆಟಗಾರ್ತಿ ಲೀಲಾವತಿ ಅವರ ಪ್ರತಿಭೆಗೆ ಸಾಣೆ ಹಿಡಿದದ್ದು ಮಡಿಕೇರಿ ಕೂಡಿಗೆಯ ಸಾಯಿ ವಿದ್ಯಾರ್ಥಿ ನಿಲಯ. ಶಾಲಾ ಮಟ್ಟದ ಟೂರ್ನಿಗಳಲ್ಲಿ ಬೆಳಗುತ್ತಿದ್ದ ಈ ಮೂವರು ಆಟಗಾರ್ತಿಯರನ್ನು ಗುರುತಿಸಿದ ಸಾಯಿ, ಅವರ ಆಟದ ಶೈಲಿಗೆ ಹೊಳಪು ನೀಡಿತು.

ಪಿಯುಸಿ ವರೆಗೆ ಕೂಡಿಗೆಯಲ್ಲಿದ್ದ ಕೃತಿಕಾ ಮತ್ತು ಅಂಜಲಿ ನಂತರ ಮೈಸೂರಿನ ಡಿವೈಇಎಸ್‌ ಕ್ರೀಡಾನಿಲಯ ಸೇರಿದರು. ಈಗ ಅಲ್ಲಿನ ಟೆರೇಷಿಯನ್ ಕಾಲೇಜು ವಿದ್ಯಾರ್ಥಿನಿಯರು. ಲೀಲಾವತಿ ಇನ್ನೂ ಕೂಡಿಗೆಯಲ್ಲೇ ಅಭ್ಯಾಸ ಮಾಡುತ್ತಿದ್ದಾರೆ.

ಏಳು ವರ್ಷಗಳಿಂದ ಸಾಯಿಯಲ್ಲಿ ಇರುವ ಲೀಲಾವತಿ ವಿವಿಧ ವಯೋಮಾನದಲ್ಲಿ ಎರಡು ಬಾರಿ ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸಿದ್ದಾರೆ. 2016ನಲ್ಲಿ 18 ವರ್ಷದೊಳಗಿನವರ ಏಷ್ಯಾಕಪ್‌ನಲ್ಲಿ ಕಂಚು ಗೆದ್ದ ಭಾರತ ತಂಡದಲ್ಲಿದ್ದರು. ನಂತರ ಬೆಲ್ಜಿಯಂನಲ್ಲಿ ನಡೆದ 23 ವರ್ಷದೊಳಗಿನವರ ಆಹ್ವಾನಿತ ಟೂರ್ನಿಯಲ್ಲೂ ಭಾರತಕ್ಕೆ ಬೆಳ್ಳಿ ಪದಕ ಗಳಿಸಿಕೊಡುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿದರು. ಎರಡು ವರ್ಷಗಳಿಂದ ಸೀನಿಯರ್‌ ವಿಭಾಗಕ್ಕೆ ‘ಬಡ್ತಿ’ ಪಡೆದಿದ್ದರೂ ಈ ತನಕ ಹಾಕಿ ಇಂಡಿಯಾ ಪರ ಆಡಲು ಆಗಲಿಲ್ಲ. ಹಾಕಿ ಕರ್ನಾಟಕದ ಖಾಯಂ ಸದಸ್ಯೆ.

ಸೀನಿಯರ್‌ ವಿಭಾಗದಲ್ಲಿ ಕೃತಿಕಾ 20 ಬಾರಿ ಹಾಕಿ ಕರ್ನಾಟಕವನ್ನು ಪ್ರತಿನಿಧಿಸಿದ್ದಾರೆ. ಅಂಜಲಿ ಈಗಷ್ಟೇ ಸೀನಿಯರ್ ವಿಭಾಗ ಪ್ರವೇಶಿಸಿದ್ದಾರೆ. ಅವರು ಹಾಕಿ ಕೊಡಗು ಮತ್ತು ಹಾಕಿ ಕರ್ನಾಟಕದ ಪರ ಆಡಿ ಹಾಕಿ ಪ್ರಿಯರ ಮನ ಗೆದ್ದಿದ್ದಾರೆ.


ಲೀಲಾವತಿ(ಬಲ)

ಡೆವಲಪ್‌ಮೆಂಟ್ ಶಿಬಿರ
ಬೆಂಗಳೂರು ಸಾಯಿಯಲ್ಲಿ ಈಗ ನಡೆಯುತ್ತಿರುವುದು ಡೆವಲಪ್‌ಮೆಂಟ್ ಶಿಬಿರ. ಇದರಲ್ಲಿ ಒಟ್ಟು 48 ಮಂದಿ ಪಾಲ್ಗೊಳ್ಳುತ್ತಿದ್ದಾರೆ. ಇಲ್ಲಿ ಉತ್ತಮ ಸಾಮರ್ಥ್ಯ ತೋರಿದವರನ್ನು ಮತ್ತು ದೈಹಿಕವಾಗಿ ಫಿಟ್ ಇರುವವರನ್ನು ರಾಷ್ಟ್ರೀಯ ತಂಡಕ್ಕೆ ಪರಿಗಣಿಸಲಾಗುತ್ತದೆ. ಆರು ಮಂದಿ ಗೋಲ್‌ಕೀಪರ್‌ಗಳು, 13 ಡಿಫೆಂಡರ್‌ಗಳು, 15 ಮಿಡ್‌ಫೀಲ್ಡರ್‌ಗಳು ಮತ್ತು 14 ಮಂದಿ ಫಾರ್ವರ್ಡ್ ಆಟಗಾರ್ತಿಯರು ಶಿಬಿರದಲ್ಲಿದ್ದಾರೆ.

*
ಕರ್ನಾಟದಲ್ಲಿ ಉತ್ತಮ ಮಹಿಳಾ ಆಟಗಾರ್ತಿಯರು ಇದ್ದಾರೆ. ಅವರನ್ನು ಗುರುತಿಸಿ ಪ್ರತಿಭೆ ಬೆಳಗಲು ಅವಕಾಶ ಸಿಗಬೇಕು. ರಾಜ್ಯದ ಕ್ರೀಡಾನಿಯಲಯಗಳು ಮತ್ತು ಕೂಡಿಗೆಯ ಸಾಯಿ ಈ ಕಾರ್ಯವನ್ನು ಮಾಡುತ್ತಿದೆ. ರಾಜ್ಯದ ಪ್ರತಿಭೆಗಳಿಗೆ ಇನ್ನಷ್ಟು ಸಾಣೆ ಹಿಡಿದರೆ ರಾಷ್ಟ್ರೀಯ ಹಾಕಿಯಲ್ಲಿ ಕರ್ನಾಟಕದ ಪ್ರಾಬಲ್ಯ ಹೆಚ್ಚಲಿದೆ.
-ಸುಂದರೇಶನ್‌, ಡಿವೈಇಎಸ್‌ ಹಾಕಿ ಕೋಚ್‌ 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !