ಬೆಂಗಳೂರು: ಚುರುಕಿನ ದಾಳಿ ನಡೆಸಿದ ಅಜಿಂಕ್ಯ ಪವಾರ್ ಮತ್ತು ಮಂಜೀತ್ ಅವರ ಆಟದ ಬಲದಿಂದ ತಮಿಳ್ ತಲೈವಾಸ್ ತಂಡವು ಜಯಭೇರಿ ಬಾರಿಸಿತು.
ವೈಟ್‌ಫೀಲ್ಡ್‌ನಲ್ಲಿರುವ ಗ್ರ್ಯಾಂಡ್ ಶೆರಟಾನ್ ಹೋಟೆಲ್‌ನಲ್ಲಿ ನಡೆಯುತ್ತಿರುವ ಪ್ರೊ ಕಬಡ್ಡಿ ಟೂರ್ನಿಯಲ್ಲಿ ಗುರುವಾರ ನಡೆದ ಪಂದ್ಯದಲ್ಲಿ ತಮಿಳ್ ತಲೈವಾಸ್ ತಂಡವು 43–25ರಿಂದ ತೆಲುಗು ಟೈಟನ್ಸ್ ವಿರುದ್ಧ ಜಯಿಸಿತು.
ಮಂಜಿತ್ (9) ಮತ್ತು ಅಜಿಂಕ್ಯ (10) ರೇಡಿಂಗ್‌ನಲ್ಲಿ ಪಾರಮ್ಯ ಮೆರೆದರು. ಡಿಫೆಂಡರ್ ಸಾಗರ್ ಕೂಡ ಒಂಬತ್ತು ಅಂಕ ಕಲೆಹಾಕಿ ತಂಡದ ಜಯಕ್ಕೆ ಕಾಣಿಕೆ ನೀಡಿದರು.
ಟೈಟನ್ಸ್ ತಂಡದ ಗೊಲ್ಲ ರಾಜು (9) ಮಿಂಚಿದರು.
ಜೈಪುರಕ್ಕೆ ಜಯ: ದೀಪಕ್ ಹೂಡಾ ಅವರ ಆಲ್‌ರೌಂಡ್ ಆಟದ ನೆರವಿನಿಂದ ಜೈಪುರ ಪಿಂಕ್ ಪ್ಯಾಂಥರ್ಸ್ ತಂಡವು 36–30ರಿಂದ ದಬಂಗ್ ಡೆಲ್ಲಿ ತಂಡದ ವಿರುದ್ಧ ಜಯಭೇರಿ ಬಾರಿಸಿತು.
ದೀಪಕ್ ಹೂಡಾ 12 ಅಂಕಗಳನ್ನು ಸೂರೆ ಮಾಡಿದರು. ಸಚಿನ್ ನರ್ವಾಲ್ ಕೂಡ ನಾಲ್ಕು ಅಂಕಗಳ ಕಾಣಿಕೆ ನೀಡಿದರು.
ಆದರೆದಬಂಗ್ ಡೆಲ್ಲಿ ತಂಡದ ವಿಜಯ್ 16 ಅಂಕ ಗಳಿಸಿದರು. ಆದರೆ ಅವರ ವಿರೋಚಿತ ಆಲ್‌ರೌಂಡ್ ಆಟಕ್ಕೆ ಜಯ ಒಲಿಯಲಿಲ್ಲ.
